Shapita 101

Ku Betani, mu Njibo ya Shimona

YESU wataluka mu Yediko, kaenda ku Betani. I lwendo lwendwa kintu kya dyuba dituntulu, mwanda i kukanda mukuna usenselela ku makilometele 20 mu dishinda dibi. Yediko udi pantu pasenselela ku metele 250 munshi mwa mbeyabeya ya mema, ino Betani aye udi pantu pasenselela ku metele 760 pangala pa mbeyabeya ya mema. Vuluka, mu Betani mo mwa ba Lazalasa ne banababo bana-bakaji. I kabundi kadi ku makilometele asatu kutamba ku Yelusalema, pa mpulumuko ya kutunduka ya Lulu lwa Impafu.

Bantu bavule ke bafike kala mu Yelusalema ku Pashika. I babadikile mwanda wa kwisubula mobalongelanga nyeke. Kekubulwe padi i batenge ngitu mifwe nansha kulonga bintu kampanda bya disubi. O mwanda balonga mulongelwanga pa kwisubula, mwa kuvulukila Pashika biyampe. Bano babadikile kufika abakongwila ku tempelo, bavule beipangula shi Yesu usa kwiya ku Pashika.

Mu Yelusalema mudi lupata lwa malwa pa mwanda utala Yesu. Bantu bavule bayukile amba bendeji ba bipwilo basaka kumukwata bamwipaye. Byabine, ke basoñanye kala bantu amba, yense uyukile kudi Yesu, ufwaninwe kukebasapwila. Mu myeji yapityile’i, bano bendeji basakile kumwipaya misunsa isatu mituntulu—ku Masobo a Matabenakulo, ku Masobo a Kufikijija, ne pa kupwa kusangula Lazalasa. Ebiya bantu kebeipangula, le Yesu uno ukāya kīmwesha ku bantu’ni? “Lelo bānwe’mba namani?” bo abo beipangula abo bene na bene.

Papo Yesu wafika ku Betani, kukidi mafuku asamba kumeso kwa Pashika ashilule, uponenanga mu mafuku 14 a Kweji wa Nisane mungya kalandadiye ka Bayuda. Bimweka’mba Yesu wafika mu Betani mu dya Butano ku kyolwa, ku ngalwilo kwa difuku dya 8 Nisane. Kadipo mwa kwendela ku Betani mu dya Mposo, mwanda kwenda lwendo mu dya Sabado—tamba dya Butano pa kupona kwa dyuba kutūla ku dya Mposo pa kupona kwa dyuba—i bijidikwe na bijila bya Bayuda. Padi Yesu wakafikila kwa Lazalasa, na mwaakafikile’ko kala, walāla konka dya Butano bufuku.

Mwine Betani umo waendela Yesu ne bendi nandi bidibwa mu dya Mposo kyolwa. Uno muntu i Shimona, wadi na makopo kala, ino bimweka bu Yesu ye wamubelwile’o. Koku Mata, mukinda wa bene, ukitakita na kutūdila beni bidibwa. Aye Madia udi’nka mwaikadilanga, utele mutyima kudi Yesu, pano’ko bibaleta lupata.

Madia wapūtula mukomba nansha kyande kya māni anunka biya, a “nado a buleme,” alēma kipindi kya kilo imo. A bulēme bukatampe. Kyabine, lupoto lwao lusenselela ku mfutwa ya mwaka mutuntulu! Madia pa kutūta Yesu māni ku mutwe ne ku maulu andi, kupwa kapampula maulu andi na nywene yandi, luvumba lununka biya lubasambakana mu njibo monso.

Bana-babwanga abafītwa mutyima, kebepangula’mba: “Lelo kyonakanya kidi nabya i kyaka le?” Yudasa Isakadiota nandi amba: “Le kika le ano mani kyo keapotelwe, nansha tutwa tusatu twa ndenadi, bābila balanda”? Ino binenena Yudasa nenki ke kudidilapo balanda lusa, unenena kwiba kwaibanga mu kibīko kya lupeto lubīkanga bana-babwanga.

Yesu waitabila Madia. “Mulekei,” ye Yesu wibakankaja. “Lelo i bika kadi byo mumupuñanya mwana-mukaji, ke-muntu aye wangubila biyampe byonka. Mwanda balanda mudi nabo pano nyeke na nyeke, ino ami kemudipo nami, nyeke, ehe. Ebiya kadi aye byāntūta ano mani ku mubidi wami nanshi wantūtyila’mba [n]kajikwe nao. I binebine byo nemunena’mba: Konso konso kukasap[ulw]a īno myanda-miyampe panopantanda ponso, ne kino kyāuba uno mwana-mukaji nakyo kikebasapwilwa ke pakumuvulukila.”

Pano Yesu waije mu Betani nsaa 24 ne musubu, bantu abaivwana lupupuji amba udi muno. Bavule abatūtyikila ku njibo ya Shimona kukatala Yesu, ino baila kutala ne Lazalasa, nandi udi konka. Papo babitobo bakatampe bakuta nkuku ya kwipaya Yesu ne Lazalasa mwine kumo. Amba mwanda bantu abaitabija mudi Yesu pa kumona muntu waaikele kusangula au keye mūmi! Bine, bano bendeji ba bipwilo badi na nshikani mpata! Yoano 11:55–12:11; Mateo 26:6-13; Mako 14:3-9; Bilongwa 1:12.

▪ I mīsambo’ka isambwa ku tempelo mu Yelusalema, ne mwanda waka?

▪ Mwanda waka Yesu wafika mu Betani mu dya Butano pa kyaba kya kufika’ye mu dya Mposo?

▪ Pano pafika Yesu mu Betani, i kwa ani kukamupityila dya Sabado?

▪ I kilongwa’ka kya Madia kyaleta lupata, ne Yesu wamwitabila namani?

▪ I kika kilombola’mba babitobo bakatampe badi na nshikani mpata?