Shapita 112

Pashika wa Mfulo wa Yesu Kadi Pabwipi

DYA Bubidi, mafuku 11 Nisane, kedikapu; Yesu wapu kufundija batumibwa ku Lūlu lwa Impafu. Bine, dyadi difuku dya mingilo ne mpungiji ya kashāa! Pano bajokela padi ku Betani kobakalāla bufuku, wasapwila bandi batumibwa’mba: “Bānwe bene muyūkile kala papite mafuku abidi bidibwa bya Pashika bifikile ne Mwanā muntu ukasokolwa ku bangi kwipaībwa ku [mutyi].”

Mobimwekela, Yesu usa kupityija difuku dilonda’ko, dya Busatu mafuku 12 Nisane, ushikete ku matwi talala kufula na batumibwa bandi. Kesha, watopekele bendeji ba bipwilo ku meso a bantu bonso, mwanda uyukile amba bakimba kumwipaya. O mwanda kalupukilepo patōka mu dya Busatu, ke-pantu kasakilepo kintu nansha kimo kimubudije kuvuluka Pashika na batumibwa bandi kyolwa kya kesha.

Papo babitobo bakatampe ne bakulumpe ba kibundi bongwidile mu lubanza lwa Kaifasa, kitobo mukatampe. Bakuta nkuku ya kukwata Yesu bamwipaije, mwanda byaebanene kesha i bibasanse mpata. Kebanena’mba: “Kemukamukwatyila mu difuku dya kidilo, mhm, tutyina’mba bantu bakalengapo lupotopoto.” Batyina bantu basangela Yesu.

Abo bendeji ba bipwilo bakikimba manwa mabi a kwipaya Yesu, abatambula mweni. Amba batale, Yudasa Isakadiota, umo wa mu batumibwa ba Yesu, Satana i mukune munda mwandi mulangwe umbi wa kwaba Mfumwandi! Abasangala bininge pebepangula Yudasa amba: “Le byo musaka kumpa i bika, nkemusokwele’ye ko mudi?” Abaitabija na nsangaji kumupa bityele 30 bya ndalama, lupoto lupotwanga umpika mungya kipwano kya Bijila bya Mosesa. Tamba papo, Yudasa kakimbe mukenga wa kwaba Yesu kobadi pampikwa kibumbo kya bantu kyungwidile.

Difuku dya 13 Nisane dibashilula pa kupona kwa dyuba mu dya Busatu. Yesu wafikile mu dya Butano utamba ku Yediko, nanshi buno bufuku bo bwa busamba kadi bwa mfulo kulāla mu Betani. Kesha dya Buná, basa kuteakanya bintu bya mfulo bya Pashika, ushilulanga pa kupona kwa dyuba. Pano po pakatapwa kana-ka-mukōko ka Pashika ne kwikosha konso katuntulu. Le kobakasobela ano masobo i kwepi, ne usa kuteakanya bintu mwine i ani?

Yesu kalombwelepo bino byonso, padi watyinija’mba Yudasa wakasapwila babitobo bakatampe bāye bamukwate kitatyi kivulukwa Pashika. Ino pano, mobimwekela i mu dya Buná, adyo dyuba dikumbuluka, Yesu watume ba Petelo ne Yoano kutamba ku Betani, amba: “Badikilaipo, mwitulongolwele Pashika tudye.”

“Lelo kōsaka tukalongolwele[’ye] i kwepi?” bo abo bepangula.

“Pa kutwela mu kibundi,” ye Yesu ushintulula, “muntu ukemusambakana uselele mulondo wa mema, ebiya mulondei ne ku njibo kwākatūla. Kadi mumunene mwine wa njibo’mba: Mufundiji wakunena’mba: Lelo ku njibo īfikilanga bēni i kwepi? Ami nsaka kudilamo Pashika ne bāna-bami-babwanga. Aye ukemulombola njibo mikata ya peulu milongolole kala, ino mukalongolole monka.”

Pampikwa kutatana, uno mwinē njibo i mwanā-bwanga wa Yesu wadi padi usaka Yesu alombe njibo yandi ya kwiya kudīla’mo ano masobo a pa bula. Ba Petelo ne Yoano pa kufika mu Yelusalema, abatana bintu byonso’nka na mwadi mwibalombwedile’byo Yesu. O mwanda bano babidi abateakanya kana-ka-mukōko ne bintu bikwabo byonso biyampe shē bibwana bantu 13, Yesu ne batumibwa bandi 12 bāya kutanwa ku Pashika. Mateo 26:1-5, 14-19; Mako 14:1, 2, 10-16; Luka 22:1-13; Divilu 21:32.

▪ Mobimwekela, Yesu usa kulonga bika mu dya Busatu, ne mwanda waka?

▪ I kungwila’ka kwaungwilwa ku njibo ya kitobo mukatampe, ne Yudasa wakapempula bendeji ba bipwilo pa mwanda’ka?

▪ I bāni batumwa na Yesu mu Yelusalema mu dya Buná, ne kitumino kine i kika?

▪ I bika byatana bano batumwa bilombola monka’mba Yesu udi na bukomo bwa kulonga bingelengele?