Shapita 113

Kwityepeja ku Pashika wa Mfulo

BA PETELO ne Yoano ke bafike kala mu Yelusalema mwibatumine Yesu kukateakanya bintu bya pa Pashika. Mobimwekela, Yesu ne batumibwa bakwabo dikumi abafika ke ku kyolwa. Yesu ne badi nabo beka Lūlu lwa Impafu, dyuba papo kedilumba pa kalaba. Dino dyo dyuba dya mfulo dyamona Yesu kibundi kuno ku lūlu, kutūla ne ku kupwa kwa kusanguka kwandi.

Kepejijepo, Yesu ne badi nabo abafika mu kibundi benda ku njibo kobakavulukila Pashika. Abakanda matebwe kufika ne mu kyumba kikatampe kya peulu, abatana bintu byonso biteakanibwe mwa kuvulukila Pashika wa bunka bwabo. Yesu wadi utengele kino kyaba, mwaebasapwidila’mba: “Kusaka nadi nsakile ne mutyima onso kudya nenu kino kya Pashika, byo nkyaivwene byamalwa byami.”

Mungya kishi, boba badi ku Pashika batomanga bitomeno biná bya vinyu. Yesu pa kutambula kitomeno, mobimwekela i kya busatu, wafwija’ko, amba: “Tambulai kino mwishīlei bānwe bene. Ke-ne-muntu nemunena’mba: Nkikitomepo bya bipa bya mañanza, poso bulopwe bwa Leza bufike.”

Kitatyi kimo abo bakidya, Yesu waimana, watūla bivwalwa byandi bya pangala pafula, wasela kisandi, wadinge ne mema mu nsāni. Mungya kibidiji, mwinē njibo ye wielaelanga mwanda wa koija maulu a beni. Ino muno mobadi kemudipo mwinē njibo nansha umo, Yesu wetalukila aye mwine kaingila uno mwingilo. Kwadi kwa kutaluka nansha mutumibwa umo engile uno mwingilo, ino mobimwekela bakidi na bimyanda umbukata mwabo, i kutupu wingile’o. Pano bumvu bubebakwata pa kumona Yesu wiboija maulu.

Aye Yesu ufika padi Petelo, Petelo kapele, amba: “Kungoījapo ku maulu nansha patyetye pene.”

“Shi nkikoīje nankyo kudipo nansha na katyetye kene kudi ami,” ye Yesu unena.

“Mfumwami,” ye Petelo ulondolola, “nanshi ke ku maulu onka kete, mhm, bangoījije’tu ne ku maboko ne ku mutwe kwine.”

“Moījibwe kala kadipo kadi kyāsaka,” ye Yesu utentulula, “poso ke koya konka ku maulu, watōkelela, aye ense to-o! Ino bānwe kutōka umbapu kutōka, [ino ke] bānwe bonso[po], mhm.” Wanena namino mwanda uyukile amba Yudasa Isakadiota ukala ñeni ya kumwaba.

Yesu pa kupwa koija maulu a bonso 12, ne a Yudasa usa kumwaba mene, wavwala bivwalwa byandi bya pangala wakasendalala monka ku meza. Kaipangula’mba: “Lelo umbayūka kyo nemulongela nankyo’kyo’ni, a? Bānwe muntelanga’mba: Mufundiji! kadi amba: Mfumwetu! i biyampe byo munenanga. Ami uno mo monka. Ino talaipo bidi byo nemwoīja ku maulu enu ami Mfumwenu—ami Mufundiji—kibemufwaninwa ne bānwe bene kwioīja ku maulu enu. Ino napu kwimushīla kala mwakulondela’mba, monka mo nemulongela nenu mukalongele monka. I binebine byo nemunena’mba: Mupika katabukapo mfumwandi, kadi wakutumwa kakīlepo umutumine, mhm. Wivwane muyūke byabyo ne kwibilonga monka, nabya mwi badyese ne dyesepo.”

Bine buno i bufundiji bulumbuluke mpata mu tumingilo tutyetutye! Batumibwa kebafwaninwepo kukimba kwitūla pa kifuko kibajinji, nansha kwilangila’mba badi na mvubu kutabuka, bakwabo bo ba kwibengidila nyeke. Bafwaninwe kulonda kifwa kyashiya Yesu. Kuno koija ba maulu ke kwa kibidijipo, mhm. I mutyima wa kwingidila bakwabo pampikwa kusañuna’mba yeu ye yeu, nansha shi i mwingilo welwa mwenji, wingidilwa mfudilwa. Mateo 26:20, 21; Mako 14:17, 18; Luka 22:14-18; 7:44; Yoano 13:1-17.

▪ Mwanda waka kumona kwamona Yesu Yelusalema, kibundi mwatwela kukavulukila’mo Pashika, i kwishile na kukwabo?

▪ Mu bula bwa Pashika, mobimwekela i kitomeno kya bunga kyapāna Yesu ku batumibwa 12 pa kupwa kufwija’ko?

▪ Mungya kibidiji, i mwingilo’ka wādi wingidilwa beni pākidi Yesu pano pantanda, ne mwanda waka kewāingilwepo mu bula bwa Pashika wāvulukile Yesu ne batumibwa?

▪ I kika kyādi kisaka kulonga Yesu pa kwingila mwingilo welwa mwenji wa koija maulu a batumibwa bandi?