Shapita 103

Upempula Tempelo Dikwabo

YESU ne bandi bana-babwanga, batambile panopano ku Yediko, abalāla mu Betani ke bufuku bwa busatu. Pano misanya ya dya Mwanzo, mafuku 10 a Nisane, iyebatambila mu dishinda mobenda ku Yelusalema. Yesu udi na nzala. Wamone kikuyu kishipuke mani, kaenda kukatala’ko shi kudi bikuyu.

Uno mukuyu i mubadikile kushipuka mani bitupu Kweji wa Busamba ushilulanga kushipuka mikuyu kabwene, mukidi mu Kweji wa Busatu. Yesu walanga’mba byashipuka kala mani nenki, ne bipa ke bipe kala. Ino waenda’ko’tu kutupu. Watana’ko’nka mani onkaonka, bipa kutupu. Yesu wafinge mutyi amba: “[Kekudipo muntu] nansha umo ukadya ku bipa byobe kwa nyeke na nyeke.” Mafingo a Yesu ne kifingilo bisa kuyukana kesha lubanga.

Yesu ne bandi bana-babwanga bakyenda, abafika mu Yelusalema. Waenda ku tempelo yaapempwile kesha kyolwa. Ino dyalelo walonga’nka na mwaalongele myaka isatu kunyuma paaile ku Pashika mu 30 K.K. Yesu wapanga bantu bapotejeja ne kupotela mu tempelo, wenda ufulamika mameza a bashintudi ba lupeto ne bishikatwa bya bansunga ba bankunda. Kalekelepo muntu nansha umo uselele kingidilwa utyibulula mu tempelo.

Watopeka bashintula lupeto ne bapoteja banyema mu tempelo, amba: “Kisonekelwe’mba: ‘Njibo yami ikatelwa bu njibo ya bantu ba mizo yonso ya kulombela’mo,’ ino banwe mubeyalamuna bu kikalo kya bangivi!” (MB) Bine i bangivi, mwanda batuñanga lupoto lukomo ku bantu kebadi na kukwabo kwa kukapota banyema ba kwela bitapwa. O mwanda Yesu wamone buno busunga bu manyongonyongo ne bwivi.

Babitobo bakatampe, basonekeji, ne bamfumu ba kibundi pa kwivwana bilonga Yesu, kebakimbe monka muswelo wa kumwipaija. Pa kino, abelombola’mba kebadingidikapo. Ino abakomenwa mwa kwipaila Yesu, mwanda bantu bonso benda bamulonda lunselelemba, basaka kwivwana byanena.

Kutentekela pa Bayuda ba kibutwila, kudi kadi Bajentaila baile ku Pashika. Bano i betūtyile’mo, betabile mu mutōtelo wa Bayuda. Bangidiki bamo, betūtyile’mo bonka, abafwena Fidipa kebamulombe kumona Yesu. Fidipa waenda kudi Andele, padi wakamwipangula shi bibwanika kwitana nabo. Bimweka’mba Yesu ukidi ku tempelo, kukokeja kumumona Bangidiki.

Yesu wayuka’mba mafuku a būmi bwandi amushadila’ko ke matyetye, kaelekeja ngikadilo yandi amba: “Mwaka ubafika wa Mwanā muntu atumbijibwe ntumbo. I binebine byo nemunena’mba: Shi museke wa ñano waponena panshi ne kufwa mpika, nabya ubaikala bunka bwao, ino shi ufwe, nankyo ubape ne bipa bya ntanda ne miseke.”

Museke wa ñano umo udi na mvubu mityetye. Ino wikalanga namani poutumbilwanga mu biloba ne “kufwa,” pafulanga būmi bwao bwa bu lukunwa? Umenanga, mwenda mafuku watama ke kiyombo kipa miseke ya ñano mivulevule. Ne Yesu nandi mo monka, i muntu umo mubwaninine. Pasa kufwa na kikōkeji kudi Leza, usa kwikala dishinda dya kumwena’ko būmi bwanyeke bantu bakikōkeji badi na mushipiditu wa kwipāna wadi nao aye. O mwanda Yesu unena’mba: “Yewa wakusanswa muya wandi aye ukamujiminanga, nanshi yewa ushikilwe muya wandi [mu ino n]tanda aye ukēkala nao, ne ku būmi bwa kulādila nyeke ne nyeke.”

I bine, Yesu kelangilangapo’nka aye mwine, mwanda washintulula’mba: “Kadi wivwane muntu añingidile mīngilo nabya anonde, ne po ndi ami mwine ne mwingidi wami ukēkala ponka, ino muntu wakuñingidila ami nankyo Tata ukamupanga buleme.” Bine, kulonda Yesu ne kumwingidila kudi na mpalo milumbuluke mpata! I mpalo ya kulēmekwa na Tata pa kwilunga na Kidishitu mu Bulopwe.

Pano Yesu ulanga masusu ne lufu lwa malwa bimutengele, kanena’mba: “Ino ne pano pene mutyima wami ubamfīta fututu! kyo nsaka kunena i kika? nene na’mba: Abe Tata, mpandije ku kino kitatyi?” Shi bimutengele byadi nansha byepukwa! Ino kebyepukwapo, pamo na mwanenena aye mwine amba: “Po pa mwanda o naīdile pa kino kitatyi kino’ki.” Yesu i mwitabije mpango yonso ya Leza, kubadila’mo ne lufu lwandi lwa bu kitapwa. Mateo 21:12, 13, 18, 19; Mako 11:12-18; Luka 19:45-48; Yoano 12:20-27.

▪ Mwanda waka Yesu walanga’mba usa kutana bikuyu nansha kitatyi kyabyo byokekyabwene?

▪ Mwanda waka Yesu watela bano bapoteja mu tempelo bu “bangivi”?

▪ Yesu udi bwa museke wa ñano ufwa mu buluji’ka?

▪ Yesu weivwana namani pa mwanda utala masusu ne lufu bimutengele?