Yesu Utōkeja Tempelo

Ku muketeko wa mwaka wa 30 Y.M., Yesu wāendele ku Yelusalema. Bantu bavule bādi bāye mu Yelusalema ku Pashika. Pa kukwatakanya ano masobo, bāletele byabuntu bya banyama ku tempelo. Bantu bamo bāile na banyama babo, inoko bakwabo nabo bāpotēle’bo mu Yelusalema.

Yesu pawāendele ku tempelo, wāmwene’ko bantu bapoteja banyama. Bādi basungila mu njibo ya Yehova ya kutōtela’mo! Lelo Yesu wālongele’po namani? Wājingile lusonde lwa myonji, ne kupanga nalo mikōko ne bañombe mu tempelo. Wākuvumika mameza a bantu bādi bashintula lupeto ne kumwanga bityele byabo panshi. Yesu wāsapwila boba bādi bapoteja bankunda amba: ‘Tambijai bino bintu muno! Kemukyalamunai njibo ya Tata bu kifuko kya bya busunga!’

Bantu bādi ku tempelo bātulumukile pa byālongele Yesu. Bana bandi ba bwanga bāvulukile bupolofeto butala Meshiasa bwa amba: ‘Nkapyasakenanga bininge njibo ya Yehova.’

Mwenda mafuku, Yesu wātōkeje tempelo musunsa wa bubidi, mu mwaka wa 33 Y.M. Kālekelepo muntu nansha umo abulwe kulēmeka njibo ya Shandi.