Shapita 16

Bupyasakane na Mutōtelo wa Yehova

BANABABO na Yesu ba munda mwa inandi—bana bakwabo ba Madia—i ba Yakoba, Yosefa, Shimona ne Yudasa. Kumeso kwa abo bonso kwenda na Yesu ne bandi bana-babwanga ku Kapanama, kibundi kidi kubwipi na Dijiba dya Ngadilea, kekubulwe padi abaimana mu Nazala, kyabo kisaka kikale kwibakutyila mpao ya lwendo.

Ino mwanda waka Yesu wenda ku Kapanama, pa kyaba kya kwendelela na mwingilo wandi mu Kena, mu Nazala nansha mu kifuko kikwabo kampanda kya mu ngulu ya Ngadilea? Mwanda Kapanama kyo kibundi kitumbe ne kadi kyo kikatampe kutabuka. Kadi bana-babwanga bavule batongele Yesu panopano bekalanga mu Kapanama nansha kupwipi, namino kekikebalombepo kutaluka mwabo pa kukafundijibwa’bo na aye.

Kitatyi kyonso kishikete Yesu mu Kapanama, wingila mingilo itendelwa, pamo na mwaalombwela aye mwine myeji pa kupita’po. Ino ne kwija’po kwine mpika, Yesu ne balunda nandi badi monka mu lwendo. Ke ku muketeko wa mvula, benda ku Yelusalema kukatanwa ku Pashika wa mu mwaka wa 30 K.K. Kwine’kwa, bandi bana-babwanga abamone kintu kampanda kitala padi Yesu kyobadi padi kebamwene kasha.

Mwendele Bijila bya Leza, bene Isalela balombwanga kuleta banyema ba kwela bitapwa. Pa kino, mwanda wa kwibakwasha, bansunga ba mu Yelusalema bapoteja banyema nansha toni. Ino bebipotejeja’nka munda mwa tempelo, kadi banyoñomona bantu lupeto na kukandija lupoto.

Yesu wakalabala, wakute kibaka kya myonji kapangila bansunga bonso panja. Wenda umwanga lupeto lwa bashintudi ne kukuvumika mameza abo. Koku ufunina bansunga bapoteja bankunda’mba: “Fundulai’bo muno kekulengeja īno njibo ya Tata ke ya kikwe kya lupoto.”

Bana-babwanga ba Yesu pa kumona nabya, abavuluka bupolofeto bwisambila pa Mwanā Leza amba: ‘Bupyasakane bondi nabo pa mwanda wa njibo yobe bukandya.’ Ino Bayuda abaipangula’mba: “Lelo kiyūkeno ka, kyo wetulombola kyōlongela namino?” Yesu webalondolola’mba: ‘Bundulai ino tempelo, ino ami nkeimika mu mafuku asatu.’

Bayuda balanga amba Yesu wisambila pa tempelo myūbakwe na makasa, penepo kebamwipangula’mba: ‘Ino tempelo yāshimikilwe mu myaka makumi aná ne isamba, abe ubwanye kwimika’yo mu mafuku asatu?’ Ino Yesu aye wisambila pa tempelo ya umbidi wandi. Myaka isatu pa kupita’po, pa kusanguka’ye mu bafu, bandi bana-babwanga bakavuluka ino myanda yandi. Yoano 2:12-22; Mateo 13:55; Luka 4:23.

▪ Kupwa kwa butundaile bwa mu Kena, i ku bifuko’ka kwaenda Yesu?

▪ Mwanda waka Yesu wakalabala, ne walonga’po kika?

▪ I bika byavuluka bana-babwanga ba Yesu pano pobamona bilongwa byandi?

▪ I bika byanena Yesu pa ‘ino tempelo,’ ne bino bishintulula namani?