Yesu Wapyasakena Mutōtelo wa Bine

Pa kupwa kwa masobo a mu Kana, Yesu waenda ku Kapanama. Abaenda pamo na inandi ne bamwanabo​—ba Yakoba, Yosefa, Shimona, ne Yudasa.

Ino mwanda waka Yesu waenda ku Kapanama? Kino i kibundi kitumbe bininge kadi i kikatampe kupita Nazala nansha Kana. Kadi, bana ba bwanga bamo bapya ba Yesu badi bashikata mu Kapanama nansha kubwipi. Nanshi Yesu ubwanya kwibafundija bufundiji kampanda kwabo.

Yesu pashikete mu Kapanama, namo walonga’mo bilongwa bya kutendelwa. Nanshi bantu bavule ba mu kibundi ne ba kufulakufula abaivwana bintu byalonga’mo. Ino Yesu ne bapwani nandi, Bayuda bepāne, pano bafwaninwe kwenda ku Yelusalema kukatanwa ku masobo a Pashika a mu 30 Yesu ke mwiye.

Bana ba bwanga ba Yesu pobadi mu tempelo mu Yelusalema abamone kintu kimo kyokebamwene kashā kitala padi Yesu kyebatulumuja bininge.

Bijila bya Leza ku bene Isalela byādi bibalomba kwela bitapwa bya banyema ku tempelo, kadi beni bādi basakilwa bidibwa mafuku obekele’mo. O mwanda Bijila bitabije boba batamba kulampe bāya mu Yelusalema basele lupeto lwa kupota “bañombe, mikōko, bambuji,” ne bintu bikwabo bibasakilwa pobakidi mu kibundi. (Kupituluka 14:24-26) Ne kino kibalengeja bansunga mu Yelusalema bapoteje banyama ne byoni enka munda mwa kipango kikatampe kya tempelo. Kadi bamo kebebe bantu na kwibatunga lupoto lukande.

Yesu pa kufītwa’byo, wamwanga bityele bya lupeto lwa badi bashinta, wakuvumika mameza abo, ne kwibapangila panja. Kupwa Yesu wanena’mba: “Fundulai byabyo muno! Lekai kwalamuna njibo ya Tata ke njibo ya busunga!”​—Yoano 2:16.

Bana ba bwanga ba Yesu pa kumona kino, abavuluka bupolofeto butala padi Mwanā Leza, bwa amba: “Bupyasakane mwanda wa njibo yobe bukandya.” Ino Bayuda kebepangula’mba: “Le i kiyukeno’ka kyodi nakyo kya kwitulombola, byolonga bino bintu?” Yesu webalondolola’mba: “Bundulai ino tempelo, kadi mu mafuku asatu nkeimika.”​—Yoano 2:17-19; Ñimbo ya Mitōto 69:9.

Bayuda abalanga’mba Yesu wisambilanga pa tempelo mine idi mu Yelusalema, o mwanda abamwipangula’mba: “Ino tempelo yāubakilwe mu myaka 46, abewa ukeimike mu mafuku asatu?” (Yoano 2:20) Ino Yesu wisambilanga pa umbidi wandi waaita bu tempelo. Myaka isatu pa kupita’po, bana bandi ba bwanga basa kuvuluka bino binenwa kitatyi kisa kusangulwa Yesu.