Waingila Bininge mu Ngadilea

Yesu waingila bininge mu difuku dyaapityija mu Kapanama na bana bandi ba bwanga baná. Kyolwa bantu ba mu Kapanama abamuletela bantu babela amba ebabelule. Yesu kadipo na kitatyi kya kwikala’po ne pa bunka.

Pano abo bukya lubanga pakifīta, Yesu wataluka ne kwenda kwa bunka. Wamone kifuko kyakokeja kulombela Shandi kwa bunka. Napo i mu kitatyi’tu kityetye. Pa kumona’mba Yesu kadipo, “Shimona ne boba baadi nabo” abaanza kumukimbakimba. Bimweka bu Petelo ye utangidile kibumbo mwanda kwandi ko kufikīle Yesu.—Mako 1:36; Luka 4:38.

Abo pa kutana Yesu, Petelo wamunena’mba: “Bantu bonso aba bakukimba.” (Mako 1:37) I bine, bantu ba mu Kapanama basaka Yesu ashikate nabo. I basangele bintu byalonga, o mwanda ‘kebamukankaja aleke kwibashiya.’ (Luka 4:42) Ino le Yesu wāile pano pa ntanda mwanda’nka wa kulonga bingelengele bya kubelulañana? Ne kadi le mwingilo wandi ufwaninwe kwimanina’nka mu kino kibundi? Le webalondolola namani?

Yesu walondolola bandi bana ba bwanga amba: “Twendei ne kungi nako, mu bibundi bya kubwipi, amba nkasapule ne kwine’kwa, mwanda kino e kyonaidile.” Kadi Yesu wasapwila ne boba badi basaka ashikate nabo amba: “Mfwaninwe kusapula myanda miyampe ya Bulopwe bwa Leza ne mu bibundi bikwabo namo, mwanda kino’ki e kyonatumīnwe.”—Mako 1:38; Luka 4:43.

Bine, bubinga bwine bukatampe bwiidile Yesu pano pa ntanda i kusapula myanda ya Bulopwe bwa Leza. Buno Bulopwe bukapandula dijina dya Shandi ne kupwa lonso misongo yonso ya bantu. Yesu walombola’mba i mutumwe na Leza na kubelulañanga mu kingelengele. Mo monka, ne mu myaka mivule kunyuma, Mosesa nandi wālongele mingilo ya kutendelwa yālombwele amba bine i mutumwe na Leza.—Divilu 4:1-9, 30, 31.

O mwanda Yesu watambe ne bana bandi ba bwanga baná mu Kapanama mwanda wa kukasapula mu bibundi bikwabo. Bano bana ba bwanga baná i ba Petelo ne mwanabo Andele ebiya ne Yoano pamo ne Yakoba mwanabo. Yenga umo kunyuma, baityilwe na Yesu baikala bengidi nandi babajinji ba kwenda nandi.

Bine lwendo lubajinji lwa Yesu ne bana bandi ba bwanga baná mu Ngadilea lubapite biyampe! Myanda ya Yesu ibafika ne kulampe. “Myanda yandi yasambakene mu Shidea monso,” kufika ne ku ntanda ya bibundi dikumi bitwa bu Dekapodi, ne ku bukila bukwabo bwa Munonga wa Yodano. (Mateo 4:24, 25) Bibumbo bikatampe bya bantu mu ino mitamba ne bya ku Yudea, bibalonda Yesu ne bana bandi ba bwanga. Bavule abamuletela babela ba kundapa. Yesu kebatyumwinepo mutyima—webondapa ne kupanga mishipiditu mibi mu bantu bakwetwe nayo.