Shapita 24
Kyaidile Yesu Pano Pantanda
DIFUKU dyaikala Yesu mu Kapanama ne bandi bana-babwanga baná dyadi dya mingilo, wapu kundapa babela bonso badi baletwa na bantu ba mu Kapanama ku kyolwa. Kekwadipo kyaba kya kushikata’ye pa aye mwine.
Pano bubaki lubanga. Mu meso mukifīta, Yesu walanguka, watambe panja bunka bwandi. Wetolwela kufula, kalombela kudi Shandi pa kasuku. Ino Yesu kejijepo pa kasuku, ba Petelo ne bakwabo pa kuyuka amba kebakidipo nandi, abatambe kebamukimbe.
Abatana Yesu, Petelo wanena’mba: “Bonsololo bakusakanga’tu!” Bene Kapanama basaka Yesu ashikate nabo. Bine abamwanya mpata pangala pa byaebalongela! Ino lelo kyaila Yesu pano pantanda i kubelula bantu na bingelengele? Lelo aye mwine wanena’po kika?
Yesu walondolola bandi bana-babwanga, pamo na munenena Bible amba: “Twendei bidi nanshi ku bibundi bilondakene ne kino nako nkasapwilekopo myanda, mwanda kyo naīdile i kyonka kino’ki.” Nansha bantu byobadi bamuzenza’mba ashikate nabo, ino aye webasapwila’mba: “I kiñendelemo nsap[u]le myanda miyampe ya bulopwe mu bibundi bikwabo namo, ke-kintu i akyo kyonka kyo natalwilwa.”
Eyo, Yesu i mwiye pano pantanda nakampata mwanda wa kusapula Bulopwe bwa Leza, bukayukanya bu-ujila bwa dijina dya Shandi ne kupwididila lonso bibi byonsololo bimwesha bantu malwa. Inoko, mwanda wa kulombola’mba utuminwe na Leza, Yesu walonga bingelengele bya kubelulañana. Mo monka mwādi mulongela’byo ne Mosesa tutwa twa myaka kunyuma, mwanda wa kulombola amba binebine i mwingidi wa Leza.
Pano Yesu wataluka mu Kapanama kakasapula mu bibundi bikwabo, wenda ne bandi bana-babwanga baná. Bano baná i ba Petelo ne mwanabo Andele, Yoano ne mwanabo Yakoba. Vuluka, yenga wapityile’u; Yesu webetyile bekale bengidi nandi babajinji bendakana.
Luno lwendo lwa kwenda kusapula mu Ngadilea lwa Yesu ne bandi bana-babwanga baná i lumwitabe mpata! Kyabine, lusango lwa mwingilo wandi lubaenda ntumbo kufika ne mu Shidea. Bibumbo bikatampe bibatambe mu Ngadilea, mu Yudea, ne bobwa bukila bwa Munonga wa Yodano, kebyenda bilonda Yesu ne bandi bana-babwanga. Mako 1:35-39; Luka 4:42, 43; Mateo 4:23-25; Divilu 4:1-9, 30, 31.
▪ I kika kyalongeka ku lubanga kupwa kwa Yesu kwingila bininge mu Kapanama?
▪ I kika kyatumīnwe Yesu pano pantanda, ne bingelengele byandi bidi na kitungo’ka?
▪ I bāni bendele na Yesu mu luno lwendo lwaenda kukasapula mu Ngadilea, ne mingilo ya Yesu i mimwitabe namani?