Shapita 105

Ngalwilo ya Difuku dya Mvubu Mikatampe

YESU wataluka mu Yelusalema mu dya Mwanzo ku kyolwa, wajokela ku Betani pa mpulumuko ya kutunduka ya Lūlu lwa Impafu. Wavuya mafuku abidi a mwingilo wandi wa mfulo mu Yelusalema. Kepadipo kyalakanwa, Yesu wakalāla monka bufuku kwa mulunda nandi Lazalasa. Buno ke bufuku bwa buná bwaalāla mu Betani, mwanda wafikile’mo dya Butano utamba ku Yediko.

Pano ke dya Bubidi mafuku 11 Nisane, lubanga bwē Yesu ne bandi bana-babwanga abataluka kebenda. Dino i difuku dya mvubu mu mwingilo wa Yesu, dya mingilo mivule kashāa. Dyo difuku dyandi dya mfulo kumweka mu tempelo. Kadi dyo difuku dya mfulo dya mwingilo wandi wa patōkelela kumeso kwa kwimukijibwa kīmu ne kwipaibwa kwandi.

Yesu ne bandi bana-babwanga abalonda dishinda dyonka dya kukanda Lūlu lwa Impafu kebenda mu Yelusalema. Mu dino dishinda ditamba ku Betani, Petelo wamone mutyi wafingilwe na Yesu kesha lubanga. “E! Mufundiji,” ye aye unena, “talapo kikuyu kyo wafingile mafingo’kya kibauminina’tu, tē, nanshi.”

I kika kyaumijija Yesu mutyi? Aye mwine wekilombola’mba: “I binebine byo nemunena’mba: Shi mudi ne lwitabijo lwakubulwa kupatanya, nankyo longa kemukalongelepo kyonka kino kya kikuyu, nanshi ne lūlu luno nalo [Lūlu lwa Impafu lobemene’po] mukelunena’mba: Tekuka papo, ukēle mu mema; monka mo mwanenena kyalongwa monka. Kadi byonso byo mukasaka pa kulombela, ne kwitabija ponka, mukebitambula.”

Nanshi kyaumijija Yesu mutyi i kupa bandi bana-babwanga bufundiji bulombola mvubu yobafwaninwe kwikadila na lwitabijo mudi Leza. Monka mwanenena’mba: “Byonso byo musaka pa kulombela, nansha bika, itabijai’tu amba: Tubapu kutambula’byo, ino binebine mukatambula’byo.” Byabine, buno i bufundiji bukatampe mpata bobafwaninwe kukwatyila’po, nakampata mu matompo makomokomo asa kwibafikila! Ino kudi kukwatañana kukwabo pa kūma kwa kikuyu ne bukomo bwa lwitabijo.

Muzo wa Isalela udi na mumwekelo bitupu pamo bwa kino kikuyu. Nansha uno muzo byoudi mu kipwano na Leza, umweka ku meso bitupu amba ulamine misoñanya yandi, ino bilongwa byao bibalombola’mba keudipo na lwitabijo, udi bwa ñumba kalupula bipa biyampe. Kubulwa lwitabijo kwao kubeufikija ku kupela ne Mwanā Leza mwine! Nanshi Yesu wafingile kikuyu kyume mwanda wa kuleta kifwa kilombola bintu bisa kufikila uno muzo wakubulwa kupa bipa, wampikwa lwitabijo.

Yesu ne bandi bana-babwanga kebejijepo, abatwela mu Yelusalema, abai ku tempelo mobalongelanga nyeke, kwine’ko Yesu washilula kufundija. Babitobo bakatampe ne bakulumpe ba kibundi, bakivuluka byalongele Yesu kesha ku bantu badi bashintula lupeto, abamukolomona’mba: “Lelo i ku lupusa ka kōlongela bidi namino? Ne ko wapelwe’lo i kwani le?”

Yesu webatentulula’mba: “Ami nami nkemwipangulapo bidi kamwanda kamo, shi munsapwileko nabya nami nkemusapwila lupusa mo nongela bino’bi. Lelo lubatyijo lwa Yoano nalo lwatambile kwepi, i mūlu’ni le ku bantu?”

Babitobo ne bakulumpe kebeipangula abo bene na bene, bakimba mwa kulondolwela. “Wivwane tunene’mba i lwa mūlu, kadi nankyo ētunene’mba, lelo kika kadi kyo kemwaitabije kwādi? Kadi shi tunene’mba, i lwa ku bantu, ino le kibumbo’ki nakyo namani? Ke-bantu bonso bamwitabije’mba: Yoano i mupolofeto.”

Bano bendeji abakomenwa kya kulondolola. Abatentulula Yesu amba: “Ketuyūkilepo.”

Yesu nandi kishima tentu amba: “Nanshi nami nkikimusapwidile’lo lupusa mo nongela bino’bi.” Mateo 21:19-27; Mako 11:19-33; Luka 20:1-8.

▪ I kintu’ka kikatampe kyalongeka mu dya Bubidi mafuku 11 Nisane?

▪ I bufundiji’ka bwaleta Yesu pa kūmija kikuyu?

▪ Yesu walondolola namani bantu bamwipangula lupusa lwalonga nalo bintu?