Shapita 109

Yesu Utuluja Bakinkwa Nandi

YESU wavutakanya bikomo bakinkwa nandi ba bipwilo, pano kebatyina’nka ne kumwipangula monka kintu, shi kika shi kika. Washilula kulombola kubulwa kuyuka kwabo patōka. “Lelo mwendele mwanda wa Kidishitu bānwe’mba namani?” ye aye wipangula. “Munenanga’mba i mwan[ā] ani?”

‘I mwanā Davida,’ bo Bafadiseo balondolola.

Nansha Yesu byakapatenye amba Davida i nkambo wa ku mashi wa Kidishitu, Meshiasa, inoko waipangula’mba: “Lelo kadi i bika Davida kwa mu mushipiditu umutela [mu Mitōto 110] dya buMfumwandi amba: Yehova wanenene Mfumwami amba: Kashikate pa lundyo lwami, poso ukunge bidi ngalamune bakukushikwa ke kitulo-kya-maulu obe. Le ino po pene kadi, Davida umutela dya buMfumwandi, ino ēkale mwana wandi paka le?”

Bafadiseo abaube nyā, mwanda kebayukilepo Kidishitu, mushingwe-māni wa bene. Bine Meshiasa ke muntupo’tu bitupu wa ku musuku wa Davida, na mulangila Bafadiseo, ino wādi’ko kala mūlu, o mwanda i Mfumwandya Davida, mumutabuke.

Yesu waalamukila kudi bibumbo ne kudi bandi bana-babwanga, kaebadyumuna belame ku basonekeji ne Bafadiseo. Bano bantu bo bafundijanga Bijila bya Leza, “bashikete pa kipona kya Mosesa,” o mwanda Yesu wanena’mba: “Byonso byo bemusapwila’mba: Jilai byobi, mulonge byobi; nenu mulongele monka.” Ino wabweja’ko amba: “Kemukalonda mo balongela’bo, ke-bantu banena’byo kadi ne kwibilonga mpika.”

I banzazangi, Yesu webatuluja mpata na muneneno umo onka waebatulwije nao paadi udya mu njibo ya Mufadiseo myeji ya kunyuma. “Byonso bīne byo baloñanga,” ye aye unena, “balongela meso a bantu amba, betumone.” Kupwa waleta ne bifwa, amba:

‘Babaijanga tukolo twa mavese a bisonekwa tobavwala bu twa kwibakinga.’ Tuno tukolo tutyutyutyutyu tuvwalwa pa mpala nansha ku kuboko, twikalanga na mikanda iná ya mu Bijila: Divilu 13:1-10, 11-16; ne Kupituluka 6:4-9; 11:13-21. Ino Bafadiseo ababaija’to mwanda wa kwimwekeja amba i bantu bapyasakenine Bijila.

Yesu waendelela’mba “balundila ku manyamvwa a bivwalwa byabo.” Mu Umbadilo 15:38-40, bene Isalela i banenwe kwela manyamvwa ku bivwalwa byabo, ino Bafadiseo abapityija kulepeja abo kupita mulongela bonso. Bine, kintu kyonso kyobalonga, shi kika shi kika, balongelanga’kyo kwimwekeja! ‘Basenswe bifuko bya kumeso mpata,’ ye Yesu unena.

I kya bulanda, ne bandi bana-babwanga nabo ke batengwe na kino kilokoloko kya kusaka bukatampe. O mwanda webadingila’mba: “Ino bānwe nenu kemukasaka kukatelwa dya bu-mufundiji, mhm, mwanda [mufundiji wenu i umo enka], nanshi bānwe bonso mudi bāna na bāna. Kadi kemukatela muntu wa panopantanda dya bu-tata, ke-muntu Shenu i umo enka wa momwa mūlu, kete; nansha kutelwa dya bu-mfumwenu [mwanda mfumwenu] i umo enka Kidishitu.” I kyabine, bana-babwanga bafwaninwe kutalula mushipiditu wa kusaka kwikala umbajinji! “Yewa ukēkala mukatampe wenu nandi ukēkalanga wakwimwingidila mīngilo,” ye Yesu wibadyumuna.

Kupwa watela mulongo wa byamalwa bisa kufikila basonekeji ne Bafadiseo, webatembaula bu banzazangi. ‘Bashityilanga bantu bulopwe bwa mūlu,’ ye aye unena, kadi ‘batukijanga bya mu mōbo a bakaji ba kishala na kulombela mutokitoki milombelo ya bubela.’

‘Malwa enu banwe batulombwe bampofu,’ ye Yesu unena. Watopeka Bafadiseo mwanda wa kwabo kubulwa bulēme ku bintu bya kumushipiditu kumwenwa ku mishalañenyo ya bitupu yobatūdile’ko. Kifwa, banenanga’mba, ‘Shi muntu watyipe mutyipo wa tempelo kekudipo mwanda, ino shi atyipe mutyipo wa nsahabu ya mu tempelo nankyo wapi mambo.’ Bine, abasokwela bupofu bwabo bwa ñeni patōka, mwanda abatūla’ko bulēme bukatampe pa nsahabu ya mu tempelo kupita’ko pa mvubu ya kumushipiditu idi na kino kifuko kya kutōtela’mo.

Kupwa, Yesu watopeka Bafadiseo mwaebatopekele kala, mwanda “byakukila bulemeko bya mu mukanda-wabijila,” “byakoloka mu kidye, ne byakufwilapo bantu lusa, ne byalwitabijo” ye byobalengelwe’ko, ino abate’ko mutyima bininge ku kutūla bya kubwanya, bya kujikija dikumi, bya tubidimibwa twampikwa mvubu.

Yesu watela Bafadiseo bu ‘batulombwe bampofu, basasa kamwe mu bitomibwa, ino ke ngamedia mutuntulu bamina kubyu.’ Basasanga kamwe shi batoma vinyu, kebekasashilangapo amba mwanda’po i keshi, ehe, ino mwanda i ka disubi mwendele bibidiji byabo. Bine, kusebula kobasebula myanda mikatampe ya mu Bijila kudi pamo bwa kumina ngamedia, nandi nyema wa disubi yenka mungya bibidiji byabo. Mateo 22:41–23:24; Mako 12:35-40; Luka 20:41-47; Levi 11:4, 21-24.

▪ Mwanda waka Bafadiseo abaube nyā pebepangula Yesu byānene Davida mu Mitōto 110?

▪ Mwanda waka Bafadiseo babaijanga tukolo twa mavese ne kulepeja manyamvwa ku bivwalwa byabo?

▪ I madingi’ka apāna Yesu ku bandi bana-babwanga?

▪ I mishalañenyo’ka ya bitupu itūdile’ko Bafadiseo, ne Yesu webatopeka namani pa kulengwa kobalengelwe’ko myanda ya bulēme kutabuka?