Shapita 110

Mwingilo wa ku Tempelo Ubapu

YESU welombola ku tempelo dya mfulo. Kavuya mwingilo wandi wa patōkelela pano pantanda, kumushadile’nka matompo ne kwipaibwa bikimutengele mu mafuku asatu. Pano ukyendelela na kushimika basonekeji ne Bafadiseo bishima bya kwibatuluja.

Wanena misunsa isatu mikwabo amba: “Bānwe basonekeji ne baFadiseo; malwa enu!” Dibajinji wanena’mba, malwa abo mwanda batōkejanga “panyuma pa kitomeno, ne pa lūvu, mundako muyūle makomwameso a kudimbañana ne byabupanuke byamalwa.” O mwanda webasoñanya’mba: “Kabadikile bidi ukende munda mwa kitomeno, ne mwa lūvu, nabya ne panyuma pene napo pakatōka tō!”

Dya bubidi wanena’mba malwa abo basonekeji ne Bafadiseo mwanda wa bubole ne bukondame bwabo bwa munda bobatompa kushiñanya na bwine Leza bwa ku meso bitupu. “Mudyingakene pamo na bibundu bya kushinwinwa tō,” ye aye unena, “pano peulu mwipamwene payampe, nanshi momwa munda muyūle bikupa bya bafu ne bubi bonso.”

Ku mfulo, buzazangi bwabo bubamweka patōka mu byobalonga, bobaka’ko bibundu bya bapolofeto ne kwibineñenya mwanda wa kwimwekeja’mba baloñanga biyampe. Ino abo i “bāna ba boba baipaīle bapolofeto,” pamo na mwibatulwija Yesu. Bine, muntu yense utompa kusokola buzazangi bwabo udi mu kyaka!

Yesu ukibashimika bishima bya kwibatuluja. “Bānwe banyoka! Yō! bānwe lubutulo lwa banyoka!” ye aye unena, “lelo mukapandila kuka, po mukaponejibwa bakemutunge kwelwa mu Ngehena?” Ngehena i lupongo lwingidijibwa bu kyala kya Yelusalema. Nanshi Yesu unenanga’mba basonekeji ne Bafadiseo bakonakanibwa lonso mwanda wa mwiendelejo umbi obadi nao.

Yesu kaesambila pa bantu batuma bu bantunguluji bandi, amba: “Bānwe . . . mukebatapa bamo, bangi mwibapopela ku [mityi], kadi bakashalapo nabo mukebatumbukile ne bikupilo mu mashinakoka enu, ebiya mukebapangilepangile ku bibundi bikwabo. Nanshi mashi onso a boba boloke bonso amwangikīle panopanshi akemufikilanga ko mudi ke mambo, kushilwila ponka pa mashi a Abele moloke swā, kutūla ne pa mashi a Zakadia mwana Balakia [witwa bu Yehoyada mu Bilongwa bya Mafuku wa Bubidi] o mwatapile pa mampatankanya a ku njibo ya Leza ne a ku madabahu. I binebine byo nemunene’mba: Byonso bino’bi bikafikilanga luno lukongo.”

Zakadia wātopekele bakulumpe ba Isalela, o mwanda bāmukutyīle “kitumba kwadi, ke bamwase mabwe pa kinenwa kya mulopwe, mu kipango kya njibo ya Yehova.” Ino monka mwanenena Yesu, Isalela usa kufuta ano mashi onso a boloke amwangilwe. Usa kufuta’o kupwa kwa myaka 37, mu 70 K.K., pasa kwiya bashidika bene Loma konakanya Yelusalema ne kwipaya Bayuda mudiyo umo ne kupita.

Yesu pa kwela milafwe ku bino bintu bilengeja moyo, wafītwa mutyima fututu. “Yō! Yō! Yō! abe Yelusalema! abe Yelusalema!” ye aye utompola, i “dingi dine dyo nadi nsaka na’mba nkubungakenye pamo bāna bobe, bwa nzolo wa bāna wibabungakenya mu mapapa, nanshi bānwe byobya kemuswele’byo. Monaipo bidi, njibo yenu byo yemushīlwa masala.”

Kupwa Yesu wabweja’ko amba: “Kemukamonepo kadi ami dikwabo, nansha patyetye, poso [difuku dy]o mukanena’mba: Keye! Wadyese, yewa shandi, wakwiya mu dijina dya Yehova.” Dino difuku dikekala mu kitatyi kya kwikala’po kwa Kidishitu, pakāya mu Bulopwe bwandi bwa mūlu, pakamumona bantu na meso a lwitabijo.

Pano Yesu waenda pa kifuko pakokeja kumona bilambwilo bya mu tempelo, papo bantu bibumbo batūla’mo lupeto. Bampeta kebatūla lupeto luvule. Ino mukaji wa kishala mulanda nandi waiya, watūla’mo tulupeto tubidi twa mvubu mityetye.

Yesu waite bandi bana-babwanga, kaebasapwila’mba: “I binebine byo nemunena’mba: Uno mukaja-mufu mulanda waelamo aye wakile bonso bakwela mu kilambwilo.” Dimodimo beipangula mwaebapityila. Yesu webashintulwila’mba: “Boba bonso balambulamo i ne mwanda wa bintu byabo bingi, ino aye wampikwa’byo watūdidilamo tonso twādi nato, ne kakupandila kakola.” Yesu upwa’tu kunena namino, walupuka musunsa wa mfulo mu tempelo.

Umo mu bandi bana-babwanga pa kubezemuka bukata ne buya bwa tempelo, katendela’mba: “Abe Mufundiji, batalepo bidi mwikadile ano mabwe a ku mōbo nao, leka! leka! ne mishimikilo mīne, ē-ē!” I byabine, ano mabwe adi na metele 11 ne musubu mu bula, metele 5 ne kupita mu bunkimbwa ne metele 3 ne musubu mu bwimwa!

“Lelo [m]ubamone mishimikilo mikatampe, a?” ye Yesu ulondolola. “Nanshi kekukashyalangapo dibwe pa dibwe dikwabo ditentamine dya kubulwa kukabundwilwa panshi, mhm.”

Yesu ne batumibwa bandi bapwa’tu kunena namino, abakābuka Lupongo lwa Kidelone, kebakanda ku Lūlu lwa Impafu. Kuno babwanya kumona tempelo milumbuluke idi munshi. Mateo 23:25–24:3; Mako 12:41–13:3; Luka 21:1-6; 2 Bilongwa 24:20-22.

▪ I bika byalonga Yesu mu bupempudi bwandi bwa mfulo ku tempelo?

▪ Buzazangi bwa basonekeji ne Bafadiseo i bumweke patōka muswelo’ka?

▪ Kutyibilwa ‘butyibi bwa mu Ngehena’ bishintulula namani?

▪ Mwanda waka Yesu wanena’mba mukaji wa kishala watūla bivule kupita bampeta?