Shapita 76

Udya na Mufadiseo

YESU upwa’tu kulondolola bantu batufutululo badi batatana nsulo kutamba bukomo bwandi bwaabelula nabo kamāma, Mufadiseo umo wamwendela bidibwa kwandi. Kumeso kwa kudya, Bafadiseo abashilula kyabo kisela kya koya ku makasa kufikija ne mu nkongweba. Mo moboilanga kumeso ne kupwa kwa kudya, ne pa kusampata bidibwa. Nansha shi kino kisela kekijilulangapo bijila bya Leza bisonekelwe, inoko kibapite ne pa bukundwe bwine busakanga Leza.

Yesu pa kuleka kulonda kino kisela, mwendelañani wandi watulumuka. Nansha kutulumuka kwandi byokekusokwedilwe patōka na binenwa, ino Yesu wekujingulula, wamunena’mba: “Nanshi bānwe baFadiseo mutōkejanga panyuma pa kitomeno, ne pa lūvu, kadi munda mwenu mwine mwimuyūle makomwameso ne bubi. Yō! bānwe balembakane! Lelo aye walongele panyuma’pa, kalongelepo munda’ni, a?”

Pano Yesu walombola buzazangi bwa Bafadiseo balēmekele’ko kisela kya koya ku makasa, ino koija mityima yabo idi na bubi mpika. Webadingila’mba: ‘Panai bintu bidi munda bu byabuntu bya lusa, ebiya, talai! bintu bikwabo byonso bikemwikadila bitōka tōo.’ Kupāna kwabo kufwaninwe kutakikwa na mutyima wa buswe, ke na kusakapo kutulumukija bakwabo na kwimona kobemona bu boloke.

“Bānwe baFadiseo, malwa enu!” ye Yesu ukinena, “ke-mwi-bantu mulambulanga byakujikija ku dikumi kwa ku nana, ne kwa ku mutyitya, ne miswelo yonso ya bya yansakusaku, ino [muleka’ko boloke ne buswe bwa Leza, bino byo bintu byomunenwe kulonga, ino pampikwa kusūla ne byobya bintu bikwabo bine].” Bijila bya Leza byāpelwe Isalela binene kutūla bya kujikija bu dikumi, ko kunena’mba kipindi kimo pa bipindi dikumi, bya byangulwa bya umbudimi. Nana ne mutyitya i tubimuna nansha tubiyombo tuletanga lunsense mu bidibwa. Bafadiseo kebabulwangapo kuleta kyakujikija bu dikumi, nansha ke ku tuno tubiyombo tutyutyutyutyu, ino Yesu webatopeka pangala pa musoñanya mwine utabukile mvubu obasūdile, wa kulombola buswe, kanye, ne kwikala ba bumvubumvu.

Yesu webatopeka monka’mba: “Yō! Yō! bānwe baFadiseo malwa enu! ke-mwi-bantu musanswanga bifuko byakumeso mu shinakoka ne kwimunwa lwimu mu manza ya kikwe kya lupoto. . . . Malwa enu! mwanda mudingakene pamo ne bibundu bya kubulwa kumweka, ino bantu bampikwa kuyūka banyanta ponka.” Bubi bwabo i bufyame. Mutōtelo wa Bafadiseo i muyampe panja bitupu, ino munda mwao i wampikwa kufwaninwa! I wa buzazangi bonka.

Mwinē bijila umo, wa mu boba bepēne mu Bijila bya Leza, waivwana ano matope, kafuna’mba: “A Mufundiji, po wisamba nankyo’po witutukila’ko ne batwe bene!” (MB)

Yesu wekwata’ko na kutuluja bano bapotolodi ba Bijila, amba: “Yō! nanshi bānwe ben[ē b]ijila nenu malwa enu! ke-pantu mutwikanga bantu biselwa bya malwa pakwibisela, ino bānwe bene ne kutengako, nansha munwe mpika ku biselwa. Yō! Yō! malwa enu! ke-mwi-bantu [mūbakanga bibundu bivulukwa] bya bapolofeto, nanshi i bashenu bonka bebēpaīle.”

Bino biselwa bitela Yesu i bisela bya ku kanwa, mwanda bano benē bijila kebasakangapo kupēlejeja’ko bantu kakijila nansha kamo, nansha katyepele namani. Yesu wasabe mwanda, amba nabo i betabije kwipaya kwipaibwanga bapolofeto, kadi webadyumuna’mba: ‘Mashi a bapolofeto bonso, āmwangikile ku ngalwilo ya ntanda, akalandulwa ku luno lukongo lwa bantu. Kushilwila ku mashi a Abele kutūla ku mashi a Zakadia wāipailwe, madabahu koku, njibo nayo koku, aye wāipailwa pa bukata, ino i binebine byonemunena’mba: Akalandulwa ku luno lukongo.’

Ntanda ya bantu ba kukūlwa yāshilwile kitatyi kyādi kibutula ba Adama ne Eva bana; o mwanda Abele watelwa bu wa ‘ku ngalwilo ya ntanda.’ Kinondanonda na lufu lwa Zakadia wāipailwe bibibibi, kibumbo kya bene Shidea kyāile kyāonakanya Yuda. Ino Yesu wabadikila kulombola konakanibwa kubikubi kusa kukafikila ba mu lwandi lukongo, mwanda bubi bwalo bubapite. Kuno konakanibwa kusa kufika kupwa kwa myaka 38, mu 70 K.K.

Yesu ukibatopeka matope, amba: “Bānwe ben[ē b]ijila malwa enu! ke-mwi-bantu mwashikwine lufungulo lwa [buyuki, NW], kadi bānwe bene kemwatwelelemopo, ino ba mityima ya kusaka kukatwelamo mwibakankaja.” Bapotolodi ba Bijila badi na kiselwa kya kushintulwila bantu Kinenwa kya Leza ne kwibashitwila patōka buluji bwakyo. Ino abaleka kushintulula’kyo, bashityila bantu mukenga wa kwivwanija’kyo.

Bafadiseo ne bapotolodi ba Bijila abakalabela Yesu wibatuluja byobaloñanga. Aye amba ataluke ku njibo, po pene kebamukalakanya, abamungwila na bipangujo. Bakimba kuboya mu byanena kakilubo pa kumukwatyila. Luka 11:37-54; Kupituluka 14:22; Mika 6:8; 2 Bilongwa 24:20-25.

▪ Mwanda waka Yesu watopeka Bafadiseo ne bapotolodi ba Bijila?

▪ I biselwa’ka byatwikwa bantu na benē bijila?

▪ ‘Ngalwilo ya ntanda’ yāshilwile kitatyi’ka?