Shapita 114

Bidibwa bya Kivulukilo

YESU upwile’tu koija batumibwa maulu, watela kisonekwa kya Mitōto 41:9, amba: “Wakudya nami mukate wanzatukila.” Papo ñeni iyamuvutakana, kanena’mba: ‘Umo pomudi’po usa kungaba.’

Batumibwa abashilula kufītwa mityima, umo ne umo kaipangula Yesu amba: “I amiwa, ni?” Ne Yudasa Isakadiota nandi waipangula. Yoano ushikete ku meza kubwipi na Yesu, waeyalala welele nyuma mu kyadi kya Yesu, kamwipangula’mba: “Mfumwami le i ani le?”

“I umo wa mu banwe dikumi ne babidi o tukabeleja nandi pamo mu nsahani,” ye Yesu ulondolola. “Bine Mwan[ā] muntu ukafwa monka mo kimusonekelwe. Ino nanshi yo! Malwa andi yewa muntu ukaaba Mwan[ā] muntu ku bangi. Wadi kafwanyinwe nansha ne kubutulwa kwine!” (MB) Kupwa papo, Satana watwela kadi mudi Yudasa, watwelela pa kipunzu kya mutyima wandi mubi kala. Ke mungya kala bonka bufuku’bo, Yesu watela Yudasa byendele’mo amba i “mwana wadi moneke kala.”

Pano Yesu wanena Yudasa amba: “Kyōsaka kulonga, kalonge’kyo bukidi bukidi.” I kutupu mutumibwa mukwabo uyukile bikimba kunena Yesu. Bamo bafwatakanya’mba, Yudasa byadi kalama wa kibīko kya lupeto, Yesu umulombola’mba: “Kapote byo tusaka bya pa masobo,” nansha amba ufwaninwe kwenda kukapāna bintu kampanda ku balanda.

Aye Yudasa utaluka, Yesu washilula bidibwa bingi bipya, bya kivulukilo, na batumibwa bandi bakikōkeji. Watekuna mukate, wafwija’ko, kupwa weutyumuna, webape’o, amba: “Yatai, mudyei.” Washintulula’mba: “Uno [mukate welekejanga] mubidi wami wimupaninwa, mukaloñanga enka namino pa kumvuluka.”

Bonso pa kupwa kudya mukate, Yesu watekuna kitomeno kya vinyu, bimweka bu i kya buná kitomenwanga’mo ku masobo a Pashika. Wafwija’ko dikwabo mu milombelo, kupwa webape’kyo batome, amba: ‘Kino kitomeno nakyo kyelekejanga kipwano kipya kya pa mashi ami asa kumwangwa pa mwanda wa banwe.’

Bine, kino kyo kivulukilo kya lufu lwa Yesu. Kipitulukwanga’mo mwaka ne mwaka mu mafuku 14 Nisane bu pa kumuvulukila, na mwanenena aye mwine. Kivulujanga boba batanwanga’ko bintu byālongele Yesu ne Shandi wa mūlu mwanda wa kunyongolola muzo wa muntu mu bupika bwa lufu. Ku Bayuda bālamuka ke balondi ba Kidishitu, kino kivulukilo kibapingakena pa Pashika.

Kipwano kipya kyapwaninwa pa mashi a Yesu amwangilwe kibapingakena pa kipwano kya kala kya pa Bijila. Yesu Kidishitu i mupwanije mitamba ibidi—koku Yehova Leza, aku nako bene Kidishitu 144000 babutulwe kumushipiditu. Kutentekela pa kulekelwa kwa bubi, kino kipwano i kishitule ne dishinda dya kubunda muzo wa mūlu wa balopwe babitobo. Mateo 26:21-29; Mako 14:18-25; Luka 22:19-23; Yoano 13:18-30; 17:12; 1 Kodinda 5:7.

▪ I bupolofeto’ka bwa mu Bible bwatela Yesu pa mwanda utala umpwani nandi umo, ne webushintulula namani?

▪ Mwanda waka batumibwa abafītwa mityima fututu, ebiya umo ne umo umbukata mwabo waipangula namani?

▪ Yesu wanena Yudasa akalonge bika, ino batumibwa bakwabo abaivwana bino binenwa namani?

▪ I bidibwa’ka byashilula Yesu aye Yudasa ke mutambe kala, ne i mpango’ka yobyalongelwa?

▪ I bāni batwejibwe mu kipwano kipya, ne kino kipwano kisa kufikidija bika?