Shapita 119

Abaenda Nandi kwa Anasa, Kupwa Ke kwa Kaifasa

YESU wakutwe bwa nkuma-bibi, abaenda nandi kwa Anasa wadi kitobo mukatampe pa kala inoko ukidi na lupusa. Anasa wakidi kitobo mukatampe patulumwije Yesu bafundiji ba Bafadiseo mu tempelo aye na myaka 12. Bana bana-balume bavule ba Anasa baingile bu babitobo bakatampe kupwa kwa shabo, ino pano i wandi muko Kaifasa ye wingila uno mwingilo.

Mobimwekela, Yesu watwalwa bidi kwa Anasa, mwanda uno i kiboto mukatampe wāingile mwingilo mukatampe mu mutōtelo wa Bayuda. Kino kitatyi kyobeja kuno kwa Anasa kibape Kaifasa Kitobo Mukatampe mukenga wa kukumankanya bantu 71 babundile Sanhedrini, kidye kikatampe kya Bayuda, ne wa kukongakanya batumoni ba bubela.

Pano Anasa kitobo mukatampe kaipangula Yesu bandi bana-babwanga ne bufundiji bwandi. Ino Yesu watentulula’mba: “Nadi nena kawimbila panopantanda, kadi ne mu shinakoka, ne mu njibo ya Leza mwine mo bēbungilanga [Bayuda] mafuku onso nyeke, nadi mfundija bitupu nansha kimo kyo nadi nenena kufula, mhm. Lelo i mwanda ka kadi o koungipangwila amiwa? nanshi kēpangule boba badi bēvwana mo nadi nēsambila nabo. Ke bobapo, abo bene kadi bayūkile mo nadi nenena amiwa.”

Umo wa mu batulama wimene kubwipi na Yesu pa kwivwana namino, wamukupila lupi mu mpala, amba: “Le i bika byōtentulwila [kitobo] mukatampe namino?”

“Shi i bibi byo nanena nankyo umfikijije pa kabubi ko natūpa,” ye Yesu utentulula, “ino wivwane shi i biyampe byo nanena, lelo kankupidiloko i kaka?” Kupwa kwisamba namino, Anasa watume Yesu mukutwe kwa Kaifasa.

Papo babitobo bakatampe bonso ne bakulumpe ne basonekeji abaungwila, Sanhedrini yense mutuntulu. Mobimwekela, abetanina kwa Kaifasa. Kukuta kīmu kya uno muswelo bufuku bwa Pashika i kujilula bijila bya Bayuda. Ino kino kekilekejepo bendeji ba bipwilo mpango yabo imbi.

Mayenga a kunyuma, paikele Yesu kusangula Lazalasa, Sanhedrini watyibile kala nsambu amba Yesu ufwaninwe’nka kufwa. Mu dya Busatu, mafuku abidi kunyuma, bakata ba mutōtelo bakutyile kitumba kya kukwata Yesu mu budyumuku amba bamwipaye. Langa’po bidi, i mutyibilwe kala nsambu aye kasambijibwe!

Pano balonga buninge bwa kutana batumoni ba kulombola bukamoni bwa bubela bwa kuponeja nabo Yesu mu kīmu. Inoko kebatenepo batumoni banena bikwatañane. Kupwa, babidi abapite kumeso, amba: “Bātwe twamwivwene’mba: Nkatūtanga īno njibo ya Leza mishimikwe ku maboko, kadi mafuku asatu nkepashimika mikwabo yampikwa kushimikwa mu maboko, mhm.”

“Lelo abe kulondololapo nansha dimo?” ye Kaifasa wipangula. “Le bidi namani bino byo bakujingulula nenki?” Ino Yesu waube nyā. Nansha byobamusambila bya bubela, ino ba mu Sanhedrini abafu bumvu, mwanda byanena batumoni kebikwatañenepo. O mwanda kitobo mukatampe katompa manwa makwabo.

Kaifasa uyukile amba Bayuda batenekwanga mpata shi muntu witēla bu Mwanā Leza. Ke banene kala misunsa ibidi amba Yesu i muntu utuka Leza ufwaninwe kwipaibwa, bamufwatakenya bya bubela’mba wienzankanyanga na Leza. Pano Kaifasa kamwipangula na budyumuku amba: “Nakutyipila mutyipo kudi Leza wa būmi witusapwilepo shi abe udi Kidishitu, aye Mwanā Leza.”

Mifwatakanyo ya Bayuda ke ya kubangapo, binebine Yesu i Mwanā Leza. Nanshi shi ōbe talala, basa kumona’mba watune amba ke Kidishitupo. O mwanda Yesu walondolola na kininga’mba: “I ami uno, kadi mukamona Mwanā muntu ushikete ku lundyo lwa [lupusa] wiya mu makumbi a mūlu.”

Kaifasa pa kwivwana namino, wepepa’tu, wasana mitwelo yandi kafuna’mba: “Ubapu kutuka Leza. Le kadi i kika kyo tusakila bangi bakumujingulula? Kemwivwene byātuka Leza kadi. Ino le bānwe’mba namani?”

“Wapi mambo afwe’nka kufwa,” bo ba mu Sanhedrini banena. Kebamuzawila ne kumushola mutonko. Bamukupila mapi mu mpala, bamupelela’mo ne mata. Bakwabo bamupūta mu mpala monso kebamukupila bikoni ne kumubenga pamo, amba: “Witusapwilepo abe Kidishitu wakukupilapo i wepi?” Bino i bintu bibi, byampikwa kukwatañana na bijila, byalongwa mu kīmu kya bufuku. Mateo 26:57-68; 26:3, 4; Mako 14:53-65; Luka 22:54, 63-65; Yoano 18:13-24; 11:45-53; 10:31-39; 5:16-18.

▪ Yesu watwalwa dibajinji kwepi, ne i bika byamufikila’ko?

▪ I kwepi kukwabo kwakatūlwa Yesu, ne kyobakamutūdila’ko i kika?

▪ Kaifasa wabwanya muswelo’ka kuneneja ba mu Sanhedrini amba Yesu ufwaninwe kufwa?

▪ I bilongwa’ka bibi, byakubulwa kukwatañana na bijila, byalongwa Yesu mu kīmu?