Petelo Watune Yesu

Yesu paādi na batumibwa bandi mu kyumba kya pangala, wēbalombwele’mba: ‘Banwe bonso munkanyemanga.’ Petelo wānena’mba: ‘Ami’ko aa! Nansha shi bonso abakunyema, ami nkikakunyemapo.’ Inoko Yesu wālombola Petelo amba: ‘Kumeso kwa nzolo kudila, ukatuna misunsa isatu amba kundyukilepo.’

Basola pobāselēle Yesu ku njibo ya Kaifasa, batumibwa bavule bānyemene. Inoko batumibwa bandi babidi bādi balonda mu kibumbo. Umo bidi i Petelo. Wātwelele mu kipango kya njibo ya Kaifasa kāote mudilo. Mwingidi umo nsongwakaji wāmona Petelo mu kitōkeji kya mudilo, wāmunena’mba: ‘Nakuyuka! Nobe wadi na Yesu!’

Petelo wānena’mba: ‘Aa, nkyadipo nandi! Nkiyukilepo ne byonena’byo bine!’ Petelo wāenda dya ku kibelo. Inoko kepejije, mwingidi mukwabo nsongwakaji wāmumona, wālombola kibumbo’mba: ‘Uno muntu nandi wadi na Yesu!’ Petelo wānena’mba: ‘Nkiyukilepo ne Yesu mwine!’ Mwana-mulume umo wānena’mba: ‘Nobe wadi nabo! Ne muneneno obe ulombola’mba wi mwine Ngadilea, pamo bwa Yesu.’ Ino Petelo wātyipa’mba: ‘Nkimuyukilepo!’

Enka papo, nzolo wādila. Petelo wāmona Yesu umutala. Wāvuluka byāmunenene Yesu, wātamba panja wādila bininge.

Mu kine kitatyi’kya, ba mu kitango kya Sanedini bātweja Yesu mu njibo ya Kaifasa mwanda wa kumusambija. Bādi kala kebakwate butyibi bwa kumwipaya, pano bādi’tu bakimba bubinga. Inoko kebātenepo kibi mudi Yesu. Ku mfulo, Kaifasa wāipangwididila Yesu amba: ‘Le wi Mwanā Leza?’ Yesu wānena’mba: ‘En-en.’ Kaifasa wānena’mba: ‘Ketukisakilwapo bukamoni bukwabo. Kuno i kutuka Leza!’ Kidye kyāitabija na kunena’mba: ‘Uno muntu ufwaninwe kufwa.’ Penepo kēbakupila Yesu mapi, kumupēlela mata, bāmukuta mu meso, kebamukupila koku bāmunena’mba: ‘Shi wi mupolofeto, tela wakukupila!’

Bufuku pa kukya, bāselela Yesu ku njibo ya Sanedini, kēbamwipangula monka’mba: ‘Le wi Mwanā Leza?’ Yesu wālondolola’mba: ‘Banwe bene mubanena’mba ne Mwanā Leza.’ Ponkapo bāmutyibila mambo’mba utukanga Leza, bāmutwala ku njibo mikatakata ya Pontyusa Pilato, Mbikavu mwine Loma. Le byāfudile kwepi? Tusa kumona.