Shapita 122

Badi Nandi kwa Pilato Ke kwa Heloda Kadi Ke kwa Pilato

YESU kefindilepo kudi Pilato amba i mulopwe, ino wamushintulwila’mba Bulopwe bwandi kebuletapo kyaka ku Loma. “Buno bulopwe bwami [ke bwa ino ntandapo], mhm,” ye Yesu unena, “shi kadi buno bulopwe bwami bwadi bwa [ino ntanda, NW], longa nankyo bamudyavita bami abandwila, mwanda wa kunena’mba wakafikijibwa kudi [Bayuda]. Ino pano kubapu, buno bulopwe bwami kebu[dipo na nsulo pano], mhm.” Pa kino, Yesu waitabija misunsa isatu mituntulu amba udi na Bulopwe, inoko kebusulukilepo pano pantanda.

Ino Pilato wamuningila’mba: “Lelo wi mulopwe abe nanshi?” Ko kunena’mba, lelo wi mulopwe nansha shi Bulopwe bobe ke bwa ino ntandapo?

Yesu wasapwila Pilato amba wanena biyampe, amba: “Le kadi kubanenapo’mba: Wi mulopwe; po pa mwanda o nabutwidilwe pano, ne o naīdile pano panshi na’mba, nkebasapwile [bubinebine; bonso badi ku mutamba wa bubinebine] bēvwane diwi dyami.”

Bine, kintu kikatampe kiidile Yesu pano pantanda i kupāna bukamoni bwa “bubinebine,” nakampata bubinebine bwa Bulopwe bwandi. Yesu i mwiteakanye senene kulonda buno bubinebine na kikōkeji nansha byobimulomba kujimija būmi bwandi. Nansha Pilato byaipangula’mba: ‘Lelo bubinebine i bika?’ kekukidipo kyeni kya kumushintulwila pa uno mwanda. Byaivwene i bibwane mwa kutyibila mambo.

Pilato wajokela ku kibumbo kikungila panja pa njibo. Watambe ne Yesu, kalombola babitobo bakatampe ne bantu bobadi nabo amba: “Ami nkimumwenepo na mwanda wadi nao uno’u nansha umo.”

Bibumbo pa kwivwana namino, bibakalabala, kebikomeja mwanda’mba: “Ukolomona bantu ufundija monso monso mu bu-Yudea, mushilwile konka ku Ngadilea watūla ne kuno.”

Pilato watulumuka pa kwivwana bubitabija-vidingi bwa Bayuda. Babitobo bakatampe ne bakulumpe nabo koku bakyela mabila, Pilato watadīla kudi Yesu kamwipangula’mba: “Lelo abe kwivwenepo byabyo byonso bivule byo bakujingulula nabyo, a?” Ino Yesu kalondolwelepo nansha. Kuba kwauba Yesu pa matope obamutopeka butopeketopeke kubatulumuja Pilato.

Pilato pa kwivwana’mba Yesu i mwine Ngadilea, wamone mukenga pa kwepela mambo. Mbikavu wa Ngadilea, Heloda Antipese (mwanā Heloda Mukatampe) nandi papo mwiye mu Yelusalema kutanwa ku Pashika, Pilato wamutumina Yesu. Myaka ya kunyuma, Heloda Antipese watyibije Yoano Mubatyiji mutwe, pa kwivwana myanda ya bingelengele byadi bilonga Yesu, Heloda wakwatwa moyo, katyina’mba Yesu ye Yoano wasanguka mu bafwe.

Pano Heloda wasangala mpata pa kumona Yesu. Inoko ino nsangaji ke ya kusakilapo Yesu biyampe, nansha ya kusaka kuyuka matope obamutopeka shi i abine nansha abubela. Kyasaka’tu i amone Yesu ulonga bingelengele.

Ino Yesu wapele kulonga bisaka Heloda. Heloda wamwipangula, ino aye kunena mpika. Heloda ne bashidika bandi bamulama kebazawila Yesu mwanda webafwija bumvu. Abamuvwika mutwelo ukelema kebamusepa bya kibengo. Kupwa abamujokeja kwa Pilato. Papo ba Heloda ne Pilato badi balwana mafuku a kunyuma, abapwana ke balunda.

Yesu pa kujoka, Pilato waityija babitobo bakatampe, bamfumu ba Bayuda, ne bantu bonso pamo, webanena’mba: “Mubandetela muntu uno’mba, ukolomonanga bantu, ino kadi, talaipo bidi, kasha nabambile kumujija ne bānwe ponka, ino ami nkimwenemopo mwanda wa byabyo byo mumubepela, mhm; kutupu nansha kudi Heloda kwine, ke-ne-muntu namutumin[a]’ye, kadi monaipo nanshi, kutupu kyakufwaninwa afwe’tu, kyālongele mpika. Ebiya nanshi mudingile madingi, ebiya mukutulule.”

Pilato wanena ke misunsa ibidi mituntulu amba Yesu kadipo na mwanda. Usaka kumukutulula, mwanda wamone amba babitobo abamukutyija pa mwanda’tu wa mukao obamukwatyilwa. Aye Pilato ukikimba muswelo wa kulekelela Yesu, po pene watambwila’ko milangwe mikwabo imukankamika amulekelele. Aye ukidi pa lupona lwandi patyibilanga mambo, wandi mukaji wamutumina musapu, wamukome amba: “Kokilonga nansha kamo kudi yao muntu wampikwa mambo, mwanda bufuku nadi nakambe mpata mu bilotwa [i bimweke’mba byadi bitamba kwa Leza] pa mwanda wandi.” (MB)

Pilato wayuka’tu amba ufwaninwe kulekelela uno muntu wampikwa mwanda, ino lelo usa kumulekelela namani? Yoano 18:36-38; Luka 23:4-16; Mateo 27:12-14, 18, 19; 14:1, 2; Mako 15:2-5.

▪ Yesu walondolola namani kipangujo kitala pa bumulopwe bwandi?

▪ Lelo “bubinebine” bwadi bupāna Yesu mu būmi bwandi pano pantanda i bubinebine’ka?

▪ Pilato watyibe myanda namani, bantu abalonga’po kika, ne Pilato walonga Yesu bika?

▪ Heloda Antipese i ani, mwanda waka wasangala mpata pa kumona Yesu, ne wamulonga bika?

▪ Mwanda waka Pilato usaka kulekelela Yesu?