Yesu Wafu ku Ngolongota

Babitobo bakulu bātwele Yesu ku njibo mikatakata ya mbikavu. Pilato wēbepangula’mba: ‘Le uno muntu omwasambila walonga bika?’ Nabo bānena’mba: ‘Witelanga bu mulopwe!’ Pilato wāipangula Yesu amba: “Lelo wi Mulopwe wa Bayuda?” Yesu wālondolola’mba: “Bulopwe bwami ke bwa ino ntandapo.”

Kupwa Pilato wātuma Yesu kwa Heloda, mwendeji wa Ngadilea, nandi atale shi usa kumona kintu kibi mu uno muntu. Heloda byakāsokwelepo kibi mudi Yesu, wāmujokejeja kudi Pilato. Penepo Pilato wālombola bantu amba: ‘Amiwa ne Heloda mwine ketumwenepo kibi kilongele uno muntu. Nsa kumukutulula.’ Kibumbo kyāela mabila’mba: ‘Mwipaye! Mwipaye!’ Basola bākesa Yesu nsonde, bāmupēlela mata, ne kumukupila. Bāmuvwika kilukwa kya miba ku mutwe, kēbamuzawila’mba: ‘Wakoma’po, a Mulopwe wa Bayuda.’ Kadi Pilato wālombola kibumbo monka’mba: ‘Ami nkimwenepo kibi kilongele uno muntu.’ Inoko kibumbo kyāela mabila’mba: “Apopwe ku mutyi!” Penepo Pilato wēbapa’ye bakamwipaye.

Bāenda na Yesu ku kifuko kītwa bu Ngolongota, bāmupopa ku mutyi, kupwa bāimika mutyi’wa. Yesu wālombela’mba: ‘A Tata, wibafwile’ko lusa, mwanda kebayukilepo byobalonga.’ Bantu kēbazawila Yesu na kumunena’mba: ‘Shi wi Mwanā Leza, tūka ku mutyi’ko! Wipandije.’

Nkuma-bibi umo wādi upopelwe kubwipi nandi wāmunena’mba: “Umvuluka’ko posa kutwela mu Bulopwe bobe.” Yesu wāmulaya’mba: “Ukekalanga nami mu Paladisa.” Ku kyolwa, kwāikala mfindi pa ntanda’ya yonso, mu bula bwa mansá asatu. Bana ba bwanga bamo bādi bemene dya kubwipi na mutyi, kubadila’mo ne Madia inandya Yesu. Yesu wālombola Yoano alele Madia pamo’nka bwa inandi umubutwile.

Ku mfulo, Yesu wānena’mba: “Kibafikidila!” Wābandika mutwe wandi ne kufwa wāfwa. Mu mine nsá’ya, ntanda yātenkena bininge. Mpashila ilēma nansha’mba rido yādi mu tempelo pa bukata bwa Kijila na Kijila Nakampata yāsanika pabidi ntwā. Mudyavita umo wānena’mba: ‘Na bubine uno muntu wādi Mwanā Leza.’