Shapita 123

“Talai, Muntu Au!”

PILATO watengwa na mwikadilo wa Yesu, kakimbe muswelo mukwabo wa kumukutulula, mwanda wajingulula’mba kekudipo mambo apile. ‘Banwe mwibidile nemukutulwila muntu umo pa Pashika,’ ye aye unena bibumbo.

Balabasa, ngipayañani wa mu meso fututu, nandi i mukutwe, o mwanda Pilato waipangula’mba: “Lelo o musaka nemukutulwile i wepi le? I Balabasa’ni i Yesu, wakutelwa dya bu-Kidishitu?”

Bantu basoñanibwe kala na babitobo bakatampe bebatonona abalombe kukutululwe’ko Balabasa, ino Yesu epaibwe. Pilato kakokelepo, webalondolola na kwibepangula monka’mba: “Lelo po badi bubidi’pa o nemupa i wepi?”

“Balabasa,” bo abo batūta kyungwe.

“Lelo nkōba namani ne uno Yesu wa dijina dya bu-Kidishitu?” ye Pilato wipangula na mpungiji.

Abapūkija bonso kiundaunda’mba: ‘Apopwe!’ ‘Mupope! Mupope!’

Pilato wayuka’mba abauminija muntu lufu mwanda ke mwanda, webesāshila’mba: “Lelo kyāubile kibi i kika? Nkimwene’kyopo kyakufwaninwa kufwa mudi aye, nanshi [m]udingil[e’tu] madingi ebiya mukutulule.”

Nansha Pilato byatompa kulonga namino, ye pene kibumbo kitononwa na bendeji ba bipwilo kibakalabala, kipūkija’nka kupūkija’mba: ‘Apopwe!’ Kino kibumbo kikolomwenwe na babitobo kibatengela’nka kumwanga mashi. Langa’po bidi, mafuku atano kete kunyuma, bamobamo mu bano bantu badi padi mu boba batundaile Yesu mu Yelusalema bu Mulopwe! Palongwa bino byonso, bana-babwanga ba Yesu, ekale badi’po, ye bano bobile nyā, bafyamakana.

Pilato pa kumona’mba byonso byaebazenza kekudipo kyobilonga, ino abyo bine po pene bikolomona byungwe, wayata mema kaoye ku makasa ku meso a kibumbo, amba: “Ami nkidimopo mu ano mashi a moloke uno’u, mhm. I bānwe bene mutwamwisebela konka ko mudiko.” Pa kino, bantu abalondolola’mba: “Eyo, mashi andi tubeombela’[o] kyadi, ne ku bāna betu bene.”

Ebiya Pilato walonda mobasakila—wasake kusangaja kibumbo kupita’ko kulonga byobya byayukile bu byoloke—webakutulwila Balabasa. Wakwata Yesu, wamuvudija bisandi, kebamukupila mfimbo. Bine, kuno ke kukupidilapo kukaya. Julunale umo (Journal de l’Association des médecins américains) ushintulula mukupidilo-mpata wa bene Loma’mba:

“Kintu kyobādi bakupilañana nakyo i lusonde lwīpi (flagrum nansha flagellum) lwa mikānda nansha mizelo ya biseba ya bula bwishileshile, mijinge nansha yakubulwa kujinga, bakutyile’mo byuma nansha bibese bitapana bya mikupa ya mikōko bilondakane. . . . Bashidika bene Loma bādi bakupila na lupaka pa nyuma pa bakutwa misunsa ne misunsa, o mwanda bino byuma byādi bidinga bantu bivimvilwa bikatampe, ebiya mizelo ya biseba ne mikupa misongoke ya mikōko yasana lukoba ne ngitu mine idi munshi. Bikupilo pa kwendelela, mizelo yenda itwela mu misunya ya munshi ilamete ku mikupa ne kushamuna ngitu isūma mashi.”

Bapwa’tu kukupila Yesu bibibibi namino, abamutweja mu njibo ya mbikavu, kupwa abaite bibumbo bya bashidika byonso, bibaungwila pamo. Bashidika abamumweshesha’ko malwa makwabo na kumulukila kilukwa kya miba kebamufinikila’kyo ku mutwe. Abamupe dibungu ku kuboko kwandi kwa lundyo, abamuvwika ne mutwelo utyiluluka pyā wiīfwene na uvwalanga benē bulopwe. Kupwa kebamupunika’mba: “Wakamapo! abe mulopwe wa [Bayuda].” Bamupēlela mata, bamukupila ne mapi mu mpala. Abayata dibungu dyumu didi mu dikasa dyandi kebamukupila’dyo ku mutwe, nadyo kedikomena mu lukoba lwa mutwe miba idi ku ‘kilukwa’ kya kumufwija bumvu kyobamuvwikile.

Bulēmantu ne kininga bidi na Yesu umweshibwa malwa bibatenga Pilato bininge, katompa muswelo mukwabo wa kumulekelela. “Talai bidi, byo nemulupwila’mo uno’u, kadi ne kuyūka muyūke byo nkimumwenemopo mwanda wadi nao nansha umo,” ye aye usapwila bibumbo. Padi ulanga’mba shi bano bantu bamone Yesu na bipunyupunyu byamupululwa, basa kunekenya mityima. Yesu papo wimene kumeso kwa kibumbo kya bantu ba mityima myumu, uvwele kilukwa kya miba ne mutwelo wa pangala utyiluluka pyā, mpala yandi isūma mashi kadi mijingalale bisanso, Pilato waela lubila’mba: “Talai, muntu au!” (MB)

Uno wimene pano, nansha byatapilwe bipunyupunyu ne kukupilwa, i mwana-mulume utabukile bantu bonso ba mu mānga yonsololo, bine ye muntu mukatakata wa kasha ne kashele! I amo, bulēmantu bwabinebine ne kutalala nyā kwa Yesu bibalombola bukatampe bwandi bwaitabijibwa ne na Pilato, mwanda binenwa byandi i bya bulēme ne lusa pamo. Yoano 18: 39–19:5; Mateo 27:15-17, 20-30; Mako 15:6-19; Luka 23:18-25.

▪ Pilato watompa muswelo’ka kukutulwija Yesu?

▪ Pilato watompa kwilupula mu mwanda namani?

▪ Bikupilwa bine i bikupilwa bya muswelo’ka?

▪ Yesu pa kupwa kukupilwa mfimbo, wapunikwa muswelo’ka?

▪ Pilato watompa kadi muswelo’ka kukutulula Yesu?