Shapita 127

Mujīkwe dya Butano—Dya Yenga mu Kibundu ke Mutupu’ye

PANO ke mu dya Butano kyolwa, dya Sabado mafuku 15 a Nisane kedisa kushilula pa kupona kwa dyuba. Umbidi mufwe wa Yesu ukidi mukobekwe ku mutyi, ino tubwalala tubidi tumwelele pa bukata tukidi tūmi. Dya Butano kyolwa ditwanga bu dya Kuteakanya, mwanda dyo ditekwanga bidibwa ne kuvuya mingilo mikwabo ya bukidibukidi keifwaninwe kwilaija kupwa kwa dya Sabado.

Dino dya Sabado disa kushilula’di ke dya Sabadopo bitupu divulukwanga (mu difuku dya busamba-bubidi mu yenga) kete, mhm, dino i dya Sabado pabidi, “dikatampe.” Ditelwanga namino mwanda difuku dya 15 Nisane, dibajinji mu mafuku asamba-abidi a Masobo a Mikate Yampikwa Kiyūjo (dikalanga nyeke dya Sabado, nansha shi dibaponena mu difuku’ka dya mu yenga), pano dibaponena kadi mu difuku dyonka dya Sabado divulukwanga yenga ne yenga.

Mungya Bijila bya Leza, imbidi keifwaninwepo kukesha bufuku mikobekwe ku mityi. Bayuda abalombe Pilato amba atume ba kukatyumuna maulu a bano bepaibwa, mwa kufwila’bo bukidi. Bashidika abatyumuna maulu a tubwalala tubidi. Ino maulu a Yesu keatyumwinwepo mwanda abamutana ke mufwe kala. Kino kibafikidija kisonekwa kinena’mba: “Kyandi kikupa kekikatyumunwapo, mhm.”

Ino pa kusaka kujingulula shi binebine Yesu i mufwe, mushidika umo wamutape mukobe mu lubavu. Mukobe ubakatape dya ku mukunka wandi, mashi ne mema keazululuka. Mutumibwa Yoano, kamoni wimwenine bino bintu, usekununa’mba kino kibafikidija kisonekwa kikwabo kinena’mba: “Bakamutalanga yewa o batapile.”

Muntu mukwabo udi pano pobepaile Yesu i Yosefa mwine Adimatea, mutumbe wa mu Sanhedrini. Wapelele kwilunga ku maviyo a kidye kikatampe obaponeje nao Yesu. Yosefa i mwanā-bwanga wa Yesu nansha byadi na moyo wa kwiyukanya’bo. Inoko pano wakankamana, waenda kukalomba umbidi wa Yesu kudi Pilato. Pilato waityija mudyavita wibatala, mudyavita pa kwitabija’mba bine Yesu i mufwe, Pilato wape Yosefa lupusa amba bamupe umbidi mufwe.

Yosefa wasela umbidi, weuvungila mu bisandi bya bukonge bitōka mwa kukeujikila. Abamukwasha’ko kudi Nikodema, mukwabo wa mu Sanhedrini. Nikodema nandi wakomenwe kulombola patōka lwitabijo lwandi mudi Yesu, kutyina’mba wakajimija kitenta kyandi. Ino pano waiya na kivungo kya māni a mpakwa ne udi upotwa ku lupeto luvule, kilēma kintu kya kilo 33. Abavungila umbidi wa Yesu mu bipeta, abatūta’mo ne binunka-biya, mungya kibidiji kya Bayuda mobateakenyanga imbidi mwa kukeijīkila.

Kupwa abakatweja umbidi mu kibundu kivulukwa kipya kya Yosefa kikolelwe mu dibwe didi mu budimi pabwipi ponka. Ku mfulo, abakunkulumwina dibwe dikatakata ku ntambilo ya kibundu. I bateakanye umbidi lubilolubilo mwa kukajikila’o kepashilwile dya Sabado. Ba Madia Madaleni ne Madia inandya Yakoba Mwepele padi badi bakwasha’ko na kuteakanya umbidi, abajokela lubilo ku njibo kukateakanya binunka-biya ne māni makwabo a mwenye. Balanga kwiya kuteakanya umbidi wa Yesu dikwabo shi dya Sabado dibapu mwa kwiulamina kitatyi kilampe.

Bubaki ke mu dya Mposo (dya Sabado), babitobo bakatampe ne Bafadiseo abaenda kudi Pilato kebamunena’mba: “Abe mfumwetu, tubavuluka mwanda wanene yewa wakongola bantu pākidi mūmi amba: Mafuku asatu pa kupitapo ami nkasanguka. I binebine nanshi, basoñanye bidi bantu bakalaminineko ku kibundu ano mafuku asatu, tutyina’mba bāna-bandi-babwanga bakaīle bufuku kumwiba, ebiya ke basapwila ku bantu amba: Wasanguka mu lufu; ino kongola kwa kuno kumfulo kutabuke ne kwadipo kubajinji.”

“Katwaleiko banzamu,” ye Pilato ulondolola, “mwende mukalaminine[’ko]” monso momusakile. Nabo abaendelela ku kibundu, abatūla kiyukeno pa dibwe, abashiye’ko ne bashidika bene Loma bu banzamu.

Mu dya Yenga lubanga na bwē, ba Madia Madaleni ne Madia inandya Yakoba, pamo ne Salome ne Njoana ne bana-bakaji bakwabo, abasela binunka-biya kebenda ku kibundu kukashinga’byo pa umbidi wa Yesu. Benda besamba mwishinda’mba: “Lelo i ani uketukunkulwila dibwe didi ku kibelo kya muta?” Abo bafika, abatana kintenshi kitetuke’ko, mwikeulu wa Yehova mukunkulwile dibwe kufula. Banzamu ke bende, ino mu kibundu mutupu’ye! Mateo 27:57–28:2; Mako 15:42–16:4; Luka 23:50–24:3, 10; Yoano 19:14, Yoa 19:31–20:1; Yoa 12:42; Levi 23:5-7; Kupituluka 21:22, 23; Mitōto 34:20; Zekadia 12:10.

▪ Mwanda waka dya Butano ditwanga bu dya Kuteakanya, ne dya Sabado “dikatampe” i dya Sabado’ka?

▪ I bisonekwa’ka byafikidila pa umbidi wa Yesu?

▪ I bika byalonga ba Yosefa ne Nikodema mwa kujīkila Yesu, ne i kipwano’ka kyobadi nakyo na Yesu?

▪ Babitobo abalombe Pilato bika, nandi webalondolola namani?

▪ I bika byalongeka mu dya Yenga lubanga na bwē?