Shapita 129

Kumweka Kukwabo

BANA-BABWANGA bakidi batyumukwe umbidyoma. Kebevwanijepo kikadile mu kibundu mutupu, ne kebetabijepo nsango ya bana-bakaji. Dyuba ke ku kyolwa mu dya Yenga monka, Keopasa ne mwanā-bwanga mukwabo abataluka mu Yelusalema kebenda ku Emese, i lwendo lwa kintu kya makilometele 11.

Papo benda besamba myanda ya dino difuku, amba batale mweni umo webapeta. “Lelo i myanda ka īno’ī yo mwenda mwisamba bānwe bene”? ye aye wibepangula.

Bana-babwanga abaimana, mapala makute, Keopasa wamutentulula’mba: “Lelo wi mweni mu Yelusalema bunka bobe byo kuyūkile byapityile ano mafuku’ni?” Aye nandi’mba: “Lelo i bintu ka le?”

“Ke bintu bya Yesu wa Nazala,” bo abo balondolola. “Ba[bitobo] bakatampe bakwitulela, bakatampe betu, abamufikija mu kidye’mba bamuponeneje ku lufu, ino bamwipaīle ku mu[tyi]. Nanshi bātwe twadi tukulupile’mba, e yenka usaka kukūla bene Isalela.”

Keopasa ne mukwabo kebamusekunwina myanda mikatampe ilongekele mu dino difuku—ya kumweka kwa bamwikeulu ne ya mu kibundu mushele mutupu—amba bino bintu i bibapwe bunwa ne mwa kwibishintulwila. Mweni kaebatopeka’mba: “Lelo bānwe balembakane ne mityima ilema pa kwitabija byobya byonso byanenene bapolofeto. Lelo kekyasakilwepo’mba, Kidishitu amonepo byobya byamalwa, ebiya atwele mu ntumbo yandi’ni?” Kupwa kaebashintulwila bisonekwa bya mu mukanda ukola bifunkila padi Kidishitu.

Abo kebalumba ku Emese, mweni walonga bwa aye wibashiya. Bana-babwanga basaka kwivwana bivule kwadi, abamunena’mba: “Wikale bidi netu, mwanda pano napo ke pabwipi ne ku kyolwa.” Nandi washikata amba adye nabo bidibwa. Aye upwa kulombela, watyumuna mukate kaebape’o, nabo bamujiwididila’mba bine uno i Yesu wavwala ngitu ya bu muntu. Nandi papo wibajimininina.

Pano abaivwanija kiyukīle uno mweni myanda mivule! “Lelo ketubamwenapo konka ku mityima yetu kwitutēma na mudilo,” bo abo beipangula, “pādi wisamba netu mu dishinda ne byādi witulumbulwila bisonekwa”? Kepejijepo, abataluka lubilo kebajokela ku Yelusalema, abatana batumibwa ne bakwabo bongwidile nabo pamo. Abo ba Keopasa ne mukwabo kebanene ne kunena kwine, bakwabo kala kebebasapwila na nsangaji amba: “Mfumwetu wasanguka binebine, wasokokela kudi Shimona.” Kupwa, bano babidi nabo abebasekunwina mwebamwekela Yesu. Pano ke misunsa iná yamweka Yesu kudi bandi bana-babwanga beshileshile mu difuku dimo dyonka.

Na pano kala, Yesu wamweka musunsa wa butano. Bana-babwanga papo i bashite mikonkole ku bibelo, batyina Bayuda, ino Yesu watwela mobadi kaimene umbukata mwabo, webanena’mba: “Ndoe ikale yenu bānwe.” Moyo ubebakwata, abalanga’mba abamone mushipiditu. Yesu webashintulwila’mba ke kimonwapo kyobamona, webanena’mba: “Lelo i bika byo mukambakenya mityima, mupatenya munda mwenu? Talaipo bidi makasa ami, ne ku maulu, i ami uno, ntengei bidi, mumone, mwanda mushipiditu k[eudipo] ne mwita ne bikupa pamo ne bino byo ndi nabyo ami, ke umbamone bānwe bene.” Ino abo bakikaka kwitabija.

Pa kusaka’mba ebakwashe bamujiule amba i Yesu binebine, webepangula’mba: “Lelo mudi ne bidibwa pano’ni?” Watambula kipindi kya mwita wa lui moshe wekidi, kupwa wanena’mba: “Ke yo myanda yami īno’ī yo nemunenene po nakidi nenu [ami nkyafwile] amba: Poso’nka bifike bidi byonso byo nsonekelwe mu mukanda wa Mosesa, ne mu bapolofeto, ne mu wa Ñimbo-yamitōto.”

Penepo Yesu washilula kwibafundija, pamo na mwifundilwanga kifundwa kya Bible, amba: “E mo kyasonekelwe ne mo kyamufwaninwe Kidishitu amonepo byamalwa, ebiya akasanguke ku lufu mu difuku dya busatu. Ino’mba kwalamuka pa mutyima ne kulekela kwa myanda kusapwilwe mu dijina dyandi ku mizo yonso ya bantu, kushilwila konka ku Yelusalema. Ino bānweko mwi basapudi ba abyo.”

Pa mwanda wa buluji kampanda, Tomase wabulwe kutanwa mu kuno kupwila kukatampe kwa mu dya Yenga kyolwa. O mwanda, mwenda mafuku, bakwabo kebamulombola na nsangaji amba: “Bātwe tubamone Mfumwetu.”

“A-a! poso’nka mumone ami mwine, ne mu makasa mikovu ya misumadi,” ye Tomase upatanya, “ngelemo munwe wami mu mikovu ya misumadi’mwa, kadi ngele ne kuboko kwami kuno mu lubavu nankyo ebiya ngitabije.”

Pabapite mafuku mwanda, bana-babwanga abaungwila monka mu njibo. Pano ne Tomase nandi udi’mo. Nansha ku bibelo byokushityilwe minkonkole, ino amba batale Yesu au wimene monka umbukata mwabo, kanena’mba: “Ndoe i yenu.” Kupwa watadila kudi Tomase kamwite, amba: “Leta munwe obe kuno, umone makasa ami; kadi leta kuboko kobe’ko ungele mu lubavu, kokīkala wampikwa kwitabija poso’nka witabije.”

“Abe Mfumwami! Abe Leza wami!” ye Tomase wiela mūlu.

“I mwanda wa kumona ko waumona o waitabijija, a?” ye Yesu umwipangula. “Nanshi boba baitabija pampikwa kumona, bo badyese ne dyesepo.” Luka 24:11, 13-48; Yoano 20:19-29.

▪ I bipangujo’ka byaipangula mweni kudi bana-babwanga babidi benda ku Emese?

▪ I bika byanena mweni byafikija mityima ya bana-babwanga kutema bwa mudilo munda mwabo?

▪ Bana-babwanga abajiula uno mweni namani?

▪ Ba Keopasa ne mukwabo pa kujokela ku Yelusalema, i lusango’ka lusangaja lobaivwana’ko?

▪ I kumweka’ka kwa butano kwamweka Yesu kudi bandi bana-babwanga, ne i bika byalongwa’po?

▪ I bika byalongeka kupwa kwa mafuku 8 kunyuma kwa kumweka kwa butano kwa Yesu, ne Tomase wafule muswelo’ka ku kwitabija’mba Yesu i mūmi?