Shapita 131

Kumweka kwa Mfulo, ne Pentekosa wa mu 33 K.K.

KYABA kimo, Yesu waumvwañana na batumibwa bandi bonso 11 amba bakamutane ku lūlu mu Ngadilea. Mobimwekela, bana-babwanga bakwabo nabo i balombolwe kuno kubungakana; abaungwila bantu 500 ne musubu. Bine, kino i kitango kya nsangaji mpata mwanda Yesu webamwekela, washilula kwibafundija!

Mu bintu bivule byafundija Yesu, washintulwila’mo kino kibumbo kikatampe amba Leza i mumupe lupusa lonso lwa mūlu ne pano panshi. “Endai nanshi,” ye aye wibasoñanya, “mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya [m]ushipiditu [s]andu. Kadi ne kwibalombola balaminine byonso byo nemulaīle ami mwine.”

Langa’po bidi! Bana-balume, bana-bakaji ne bana, abapebwa kukengila mwingilo umo onka wa kulonga bana-babwanga. Kudi bakinkwa bakatompa kukalakanya busapudi ne bufundiji bwabo, ino Yesu webakankamika’mba: “Ebiya, ami nami kadi, ngidi nenu mafuku onso nyeke, ne [ku kuvuika kwa ngikadilo ya bintu, NW].” Yesu wikele na balondi bandi kupityila ku mushipiditu sandu, wibakwasha mobengila mwingilo wabo.

Yesu welombola mūmi ku bandi bana-babwanga mu bula bwa mafuku 40 kupwa kwa kusanguka kwandi. Mu kuno kumweka konso, wibalombola myanda ya Bulopwe bwa Leza, ne kwibakoma i biselwa’ka bya bu bandi bana-babwanga byobapelwe. Kyaba kimo, wakamwekela ne Yakoba, mwanabo wa munda mwa inandi wadi kaitabije, wamupe kikulupiji amba bine Aye ye Kidishitu.

Abo batumibwa bakidi mu Ngadilea, Yesu webanena bajokele mu Yelusalema. Pa kwitana nabo mwine’mo, webanena’mba: “Kemukafunduka mu Yelusalema, poso’nka mukungile bidi kyokya kyālaīle Tata, kyo mwaivwene ne kudi ami. Ke-muntu Yoano i binebine byādi ubaty[i]ja mu mema, ino bānwe mukabatyijibwa mu [m]ushipiditu [s]andu, napo kepakidipo mafuku mangi, mhm.”

Kupwa Yesu wetana monka na batumibwa bandi, waenda nabo panja pa kibundi kufika ne ku Betani, kibundi kidi pa mpulumuko ya kutunduka kwa Lūlu lwa Impafu. I kya kutulumukwa kashāa, Yesu ke munene bintu bivule bitala pa lwendo lwandi lwa mūlu lwafwena, ino abo bakikulupile amba Bulopwe bwandi busa kushimikwa pano pantanda. Kebamwipangula’mba: “Abe Mfumwetu! lelo kōsake kujokeja bulopwe panopano ponka ku bene Isalela’ni?”

Pa kyaba kya kulemununa milangwe yabo yambulwa kwendela’mo, Yesu walondolola’tu amba: “Kyakyo kekidipo kyenu kyo muyūka. Bitatyi bikidipo ne myaka i kibīkile Tata aye mwine.” Kupwa, webakome monka mwingilo obanenwe kwingila, amba: “Bānwe mukapebwa bukomo bwa [m]ushipiditu [s]andu ukemwīla ko mudi, mukēkale basapudi bami bakusapula mu Yelusalema, ne monso mu Yudea, ne mu Samadia, ne kulampe kwine kumfulo kwa ntanda.”

Abo bakimutala, Yesu washilula kukanda mūlu, kupwa dikumbi dibamujike kebakimumwenepo. Wapu kuvula umbidi wandi wa misunya, kakanda mūlu bu muntu wa kumushipiditu. Bano 11 bakibambile meso mūlu sō, amba batale, bantu 2 bavwele bisandi bitōka tō abebamwekela. Bano bamwikeulu bavwele ngitu ya misunya abebepangula’mba: “Bānwe bene Ngadilea! Lelo kyo mwimanine mubambile mūlu, so-o, i kika le? Uno Yesu enka wemutekunwa mūlu, monka mwāendela’mwa kadi e monka mwākaila.”

Muswelo wataluka Yesu pano pantanda i wa mu kitalala nyā, pampikwa kutūtyilwa byungwe, wadi’nka na bandi balondi bakikōkeji bamubandila mwaendela. Nanshi ukajoka muswelo umo onka—pampikwa kutūtyilwa byungwe, enka balondi bandi bakikōkeji bo bakajingulula’mba wajoka, washilula kwikala’po kwandi mu lupusa lwa Bulopwe.

Pano batumibwa kebatūka ku Lūlu lwa Impafu, abatabuka Lupongo lwa Kidelone kebatwela mu Yelusalema monka. Abashikata’mo, balonda kyebalaile Yesu. Mafuku dikumi pa kupita’po, pa Masobo a Bayuda a mu dya Pentekosa 33 K.K., papo bana-babwanga kubwipi kwa 120 babungakenine mu kyumba kya peulu mu Yelusalema, kubatambe lunwa pamo bwa lwa kivula kitūta, lubayula mu njibo monso. Amba batale ndimi idi pamo bwa mimbi ya mudilo, iyatentama umo ne umo mu bano batenwe’po, bana-babwanga bonso abashilula kunena mu ndimi mishileshile. Kuno ko kupungululwa kwa mushipiditu sandu kwalaile Yesu! Mateo 28:16-20; Luka 24:49-52; 1 Kodinda 15:5-7; Bilongwa 1:3-15; 2:1-4.

▪ I bāni bapebwa na Yesu misoñanya ya mfulo ku lūlu mu Ngadilea, ne ayo mine i misoñanya’ka?

▪ I busengi’ka bwaleta Yesu kudi bandi bana-babwanga, ne ukekalanga nabo muswelo’ka?

▪ Yesu musanguke wamweka kudi bandi bana-babwanga mu bula bwa mafuku anga, ne i bika byaebafundija?

▪ Yesu wamwekela muntu’ka kadipo mwanā-bwanga kumeso kwa lufu lwandi?

▪ I kubungakana’ka kubidi kwabungakana Yesu na bandi batumibwa, ne i bika byamweka mu bino byaba?

▪ Yesu ukajoka monka mwaaendela mu buluji’ka?

▪ I bika byamweka mu dya Pentekosa 33 K.K.?