Bana ba Bwanga Abatambula Mushipiditu Ujila

Mafuku dikumi pa kupita’po na pākajokēle Yesu mūlu, bana ba bwanga bātambwile mushipiditu ujila. Mwādi mu Pentekosa wa 33 Y.M. (Yesu ke mwiye), kadi bantu bātambile mu bifuko bivule bādi bāye kusoba masobo mu Yelusalema. Kudi bana ba bwanga basenselela ku 120 bādi bebungile mu kyumba kya pangala kya njibo imo. Mu kitulumukila, kwāmweka kintu kitulumuja. Kintu kimo kidi pamo bwa lubimbi lwa mudilo kyātentama pa mutwe wa mwana wa bwanga umo ne umo, abo bonso bāshilula kwisamba mu ndimi mishileshile. Mwinjibo mwāyula lunwa lukatampe ludi pamo bwa kimpumpu kya kivula.

Beni bātambile ku matanda makwabo bādi mu Yelusalema pa kwivwana lunwa, bāenda lubilo ku njibo’ya kukatala bilongeka. Bātulumukile pobāivwene bana ba bwanga banena yabo ndimi. Bano beni kēbanena’mba: ‘Mwene bano bantu i ba ku Ngadilea. Ababwanya’tu namani kunena mu ndimi yetu?’

Kupwa, Petelo ne batumibwa bakwabo bāimana ku meso a kibumbo. Petelo wāsapwila bantu mwāipailwe Yesu, ne amba Yehova wāmusangwile mu bafwe. Petelo wānena’mba: ‘Pano Yesu udi mūlu ku kuboko kwa lundyo kwa Leza, kadi wapungulula mushipiditu ujila wālailwe. O mwanda mubamone ne kwivwana bino bingelengele.’

Bantu bātengelwe bininge na binenwa bya Petelo kēbepangula‘mba: “Le tulonge namani?” Petelo wēbanena’mba: ‘Mwisāsei bubi bwenu, mubatyijibwe mu dijina dya Yesu. Nenu musa kutambula kyabuntu kya mushipiditu ujila.’ Mu dine difuku’dya, bantu basenselela ku 3 000 bābatyijibwa. Tamba pene’pa, bana ba bwanga bāanza kuvula bukidibukidi mu Yelusalema. Na bukwashi bwa mushipiditu ujila, batumibwa bāshimikile bipwilo bivule, kēbafundija bana ba bwanga bintu byonso byēbasoñenye Yesu.