Kukunga mu Yelusalema

BANO bantu i balondi ba Yesu. Abamukōkela ne kushikata mu Yelusalema. Pobakunga abo bonso pa kimo, lunwa lukatampe lubayula mu njibo yonso. Lutūta’nka bwa kimpumpu kya luvula. Kadi ndimi ya mudilo ibamweka pa mutwe wa mwanā bwanga yense. Mwene umwene mudilo pa mutwe wa umo ne umo? Byonso’bi bishintulula bika?

I kingelengele! Yesu ke mujokele mūlu mudi Shandi, kadi wapungulwila mushipiditu sandu wa Leza pa balondi bandi. Uyukile uno mushipiditu ubebatonona kulonga bika? Abashilula kunena ndimi mishileshile.

Bantu bavule mu Yelusalema abaivwana lunwa lutūta pamo bwa kimpumpu kya luvula, kupwa kebāya kutala i bika byalongeka. Bantu bamo i beni ba mizo ingi baile kuno ku masobo a Pentekosa a Bene Isalela. Bano bantu abatulumuka kashā! Abaivwana bana ba bwanga besamba mu ndimi yabo bintu bya kutendelwa byalongele Leza.

Beni abanena’mba: ‘Bano bonso’ba i Bene Ngadilea. Ino ababwanya namani kwisamba mu ndimi mishileshile ya matanda etu otutambile’ko?’

Penepo Petelo waimana kaebashintulwila. Wakandija diwi ne kushintulula mwaipailwe Yesu ne mwamusangwidile Yehova. Petelo wanena’mba: ‘Pano Yesu kadi mūlu ku lundyo lwa Leza. Kadi wapungulula mushipiditu sandu waalaile. O mwanda mubamone ne kwivwana kino kingelengele.’

Bine, Petelo pa kunena bino bintu, bantu bavule abakwatwa bulanda bwa byobya byobalongele Yesu. Kupwa abaipangula’mba: ‘Tufwaninwe kulonga kika?’ Petelo webalombola’mba: ‘Alamunai būmi bwenu mubatyijibwe.’ Penepo mu dyonka difuku’dyo, kubabatyijibwa bantu 3 000 nabo abaikala balondi ba Yesu.