Kipindi 1
Lelo Leza Witutele Mutyima Binebine?
1, 2. I kipangujo’ka kiipangulanga bantu pa mwanda utala Leza, ne mwanda waka beipangulanga namino?
KEKUBULWE padi kodi kala mwiipangule mu būmi bobe amba: ‘Shi Leza witutele mutyima udi’ko binebine, mwanda waka ulekele masusu mavule uno muswelo?’ Batwe bonso tufikilwanga na masusu, nansha kadi tuyukile muntu kampanda ususuka.
2 I bine, tamba kalāa, bantu bafikilwanga nyeke na tusua ne kujondwa mityima pa mwanda wa mavita, butapani, bupolapola, mboloji, bufudile, misongo ne lufu lwa baswe babo. Mu ino yetu myaka ya tutwa 20 kete, mavita ke mepaye bantu midiyo 100 ne kupita. Bakwabo tununu ne tununu batapwa bilonda, bajimija mobo ne bintu byabo. Bintu bivule bilongeka mu ino myaka bileñanga nzuba kashāa, bishiya bantu bavule na byaso ku mityima, na madilo, ne na mityima yampikwa lukulupilo.
3, 4. Le bantu bavule balañanga namani pa kumona kuleka kulekele Leza masusu?
3 Bamo bevwananga bululu ku mityima, batompola’mba shi Leza udi’ko, nankyo bine ketutelepo mutyima. Bakwabo bafula ku kulanga’mba Leza i kutupu’ye. Kifwa, mu Divita I dya Ntanda, mukelenge umo wāmwene malwa a kabo kabila kādi kalondwalondwa, pāipailwe balunda nandi ne kisaka kyabo, wēipangwile’mba: “Lelo Leza wādi kwepi kitatyi kyotwādi tumukimba?” Mukwabo, wāpandile mu milwi ya bantu bāipailwe na umbikalo wa Nazi mu Divita II dya Ntanda wāshele na mutyima upepa pangala pa bantu baādi umona basusulwa, wānena’mba: “Shi watompa kulamba ku mutyima wami, bine ufwa bulembe.”
4 Pa kino, bantu bavule kebevwanijangapo mwanda waka Leza muyampe ulekele bintu bibi bilongeka uno muswelo. Beipangula shi witutele mutyima binebine ne shi udi’ko. Bavule balañanga’mba masusu a bantu akendelela nyeke’nka namino.
[Kifwatulo pa paje 2, 3]
Lelo ntanda impya yakubulwa’mo masusu keidi pabwipi?