Kipindi 4
Leza Wetuyukija Mpango Yandi
1, 2. Tubayuka namani amba Leza upānanga malondololo ku boba bepangula na mutyima umo?
LEZA wa buswe usokwelanga mpango yandi ku bantu bamukimba na mutyima umo. Upānanga malondololo ku bantu beipangula bipangujo pamo bwa kino kya kusaka kuyuka mwanda waka ulekele’ko masusu.
2 Bible unena’mba: “Shi umukimba [Leza], ukatanwa kōdi.” “Kudi Leza wa mūlu usokolanga bifibwe.” “Mfumwetu Leza kakalongapo nansha kamo kene, ino usokwela kifibwe kyandi bengidi bandi, ke bapolofeto kadi.”—1 Bilongwa 28:9; Danyele 2:28; Amose 3:7.
I Kwepi Kutanwa Malondololo?
3. I kwepi kotukokeja kutana bubinga bulekēle’ko Leza masusu?
3 Malondololo a bipangujo, pamo bwa kino kya kuyuka mwanda waka Leza ulekele masusu ne i kika kyakalonga’po, atanwanga mu myanda yaāsonekeje ku bukomo bwa mushipiditu pa mwanda wa kamweno ketu. Ino myanda idi mu Kinenwa kyandi, Mukanda Ukola. “Kisonekwa kyonso i kya ku bukomo bwa mushipiditu wa Leza ne kya kamweno mwanda wa kufundija, mwanda wa kutopeka, mwanda wa kolola bintu senene, mwanda wa kulemununa umboloke, mwanda wa muntu wa Leza ekale wa bwino bubwaninine, mukumbanye byonso mwanda wa mwingilo onso muyampe.”—2 Temote 3:16, 17, NW.
4, 5. I kika kikadije Bible bu dibuku ditabukile mabuku onso?
4 Bine Bible i dibuku ditabukile mabuku onso. Udi na lusango lwabinebine lwa mānga ya muzo wa muntu, usekununa ne myanda yādi’ko kala ne muntu mwine kapangilwe. Udi na myanda ilongeka dyalelo, mwanda bupolofeto bwandi i bwa bintu bilongeka mu ano mafuku ne bisa kulongeka panopano kumeso’ku.
5 I kutupu dibuku dikwabo didi na mānga yabine ikulupilwa pamo bwa Bible. Kifwa, bilembwa bya ku makasa byālembelwe na balembi bañeni ba kala byotudi nabyo dyalelo i bityetye’tu. Ino bilembwa bya ku makasa bya Bible tudi nabyo bivule, bimo bituntulu, bikwabo bipindi: kubwipi kwa mivungo 6 000 ya Bisonekwa bya Kihebelu (mikanda 39 ya “Kipwanino kya Kala”) ne kubwipi kwa mivungo 13 000 ya Bisonekwa bya Kingidiki bya bwine Kidishitu (mikanda 27 ya “Kipwanino Kipya”).
6. Mwanda waka tufwaninwe kukulupila’mba Bible otudi nandi dyalelo udi’nka mwaādi wikadile pāmusonekeje Leza ku bukomo bwa mushipiditu?
6 Leza Mwinē Bukomo Bonso, wāsonekeje Bible na mushipiditu wandi, wātele mutyima ku kulamija bululame bwa bilembwa mu ano makopi a bilembwa bya ku makasa. O mwanda Mabible otudi nao dyalelo keashalañenepo na bilembwa bibajinjibajinji byāsonekelwe ku bukomo bwa mushipiditu. Kintu kikwabo kyotwibikwatyile na kikulupiji i kino, makopi a Bisonekwa bya Kingidiki bya bwine Kidishitu ālembelwe ku makasa i a kala, eshidile’tu ku myaka katwa na bilembwa bibajinjibajinji. Ino bilembwa bya balembi ba kala ba myanda ya ntanda byotudi nabyo i bityetye’tu, kadi byāsonekelwe tutwa tuvule twa myaka kunyuma kwa balembi babyo babajinjibajinji.
Kyabuntu kya Leza
7. Lelo Bible i musambakane kwepi na kwepi?
7 Bible ye dibuku dimo kete disambakanibwe pi na pi kupita onso. Ke kutampwe kala kubwipi kwa Mabible midiyala isatu. Kekudipo dibuku dikwabo disenselela’ko ku buvule. Kadi Bible, yense mutuntulu nansha kipindi, ke mwalamunwe mu ndimi kubwipi kwa 2 000. O mwanda, bimweka bu kubwipi kwa bekadi 98 pa katwa pano pantanda ponso badi kala na Bible.
8-10. I buluji’ka bumobumo botufwaninwe kubandawila Bible?
8 Bine dino dibuku dītela bu ditambe kudi Leza, diselele bubinga bwabine mu myanda yonso ya munda ne ya panja, tufwaninwe netu kwidibandaula.a Dishintulula kitungo kikadile’ko būmi, buluji bwikadile’ko ino ngikadilo pano pantanda, ne mukekadila būmi bwa kumeso. I kutupu dibuku dikwabo dibwanya kwibishintulula.
9 Eyo, Bible i musapu wa Leza wapene ku muzo wa muntu. Wāludikile bulembi bwandi na mushipiditu, bukomo bwandi bwingila, wāsonekwa na bantu kubwipi kwa 40. Nanshi Leza wisambanga netu kupityila mu Kinenwa kyandi, Mukanda Ukola. Mutumibwa Polo wāsonekele amba: “Popa po mwatambwile mwanda wa Leza, o mwaivwene kudi bātwe, mweusepelela, kepamo na mwanda wa bantupo, ehe, i na mwanda wa Leza.”—1 Tesalonika 2:13.
10 Abraham Lincoln, Mulopwe wa 16 wa Amerika (États-Unis), wātelele Bible bu “kyabuntu kya Leza kitabuke kunengela kashāa kyaāpene ku muntu . . . Ke-pantu pakubulwa akyo ketukokejapo kuyuka kushiyañanya kiyampe ne kibi.” Shi ke pano, kino kyabuntu kitulombolanga kika pa mwāshilwidile’ko masusu, mwanda waka Leza ukialekele ne i bika byakalonga’po?
[Kunshi kwa dyani]
a Shi usaka kuyukila’ko myanda mikwabo pa bubinebine bwa Bible, tala dibuku Biblia—Neno la Mungu au la Binadamu?, dyālupwilwe mu 1991 na Batumoni ba Yehova.
[Kifwatulo pa paje 10]
Bible, musonekwe ku bukomo bwa Leza, i musapu wandi wapene ku muzo wa muntu