Kipindi 6
Mwanda Waka Leza Ulekele’ko Masusu
1, 2. Bambutwile betu babajinji bāonene namani kyalwilo kilumbuluke kyēbapele Leza?
LELO i kibi’ka kyālongelwe? I kika kyālongelwe kyāonakenye kyalwilo kilumbuluke kyāpene Leza ku bambutwile betu babajinji mu Paladisa yādi mu Edena? Mwanda waka nshikani ne masusu bibabikala tununu twa myaka, pa kyaba kya ndoe ne kumvwañana byādi mu Paladisa?
2 Mwanda ba Adama ne Eva bāingidije bibi bwanapabo bwabo bwa kwitongela. Bājimije milangwe ya kuyuka’mba kebāpangilwepo amba bakeludika senene abo bene pampikwa kulamata’bo kudi Leza ne kulonda bijila byandi. Bāsaka kutyiba kipwano na Leza, bālanga’mba būmi bwabo bukanengela kutabuka. Enka namino, bātabuka mikalo ya bwanapabo bwa kwitongela yēbakadīle Leza.—Ngalwilo, shapita 3.
Mwanda Utala Bubikadi bwa Diulu ne Ntanda
3-5. Mwanda waka Leza kāonakenyepo ba Adama ne Eva, wāpanga bantu bangi?
3 Mwanda waka Leza kāonakenyepo ba Adama ne Eva ponka’pa, wāshilula kyalwilo kingi na ba mulume ne mukaji bakwabo? Mwanda bubikadi bwandi bwa diulu ne ntanda, ko kunena’mba bubinga bwandi bwa kuludika, bwāalakenwe.
4 Kipangujo kine i kino: I ani udi na bubinga bwa kuludika, ne buludiki boloke bwine i bwa ani? Leza udi na bubinga bwa kubikadila bipangwa byonso, mwanda aye ye Mwinē Bukomo Bonso kadi Umpangi wabyo. Byadi wa tunangu tonso, bubikadi bwandi bo bulumbuluke ku bipangwa byonso. Ino buludiki bwa Leza bwāikele kwalakanwa. Lelo kudi kibi kampanda kyālongele—muntu—kipangwa kyandi? Kumeso’ku tusa kubandaula kwalakana bululame bwa bantu mokutwelele mu uno mwanda.
5 Muntu pa kutyiba kipwano na Leza, kwālupukile kipangujo kikwabo: Lelo bantu bakokeja kwikala biyampe pakubulwa kubikalwa na Leza? Na bubine, Umpangi wādi uyukile malondololo, ino muswelo muyampe wa kwivwanija’o bantu i kwibapa bwanapabo bonsololo bobādi basaka. Bātongele būmi bwa kulonda bwanapabo bwa kulonga mobasakila abo bene, Leza nandi wēbaleka.
6, 7. Mwanda waka Leza i muleke bantu beendeje kitatyi kilampe mu bwanapabo bwa kulonga monso mobasakila?
6 Leza i mulekele bantu kitatyi kibwane amba batompe bwanapabo bonsololo bobādi basaka, mwa kuyukila lonso shi bantu bakokeja kwikala biyampe mu bubikadi bwa Leza nansha bwa abo bene. Kadi kyādi kilomba kwibapa kitatyi kilampe mwa kufikila’bo palampe mu myanda ya politike, ya busendwe, ya sianse ne ya kiñanga.
7 O mwanda Leza wālekele bantu balonge monso mobasakila kufika ne dyalelo, mwa kupwila lupata lwa kuyuka shi babwanya kwiendeja senene pambulwa kuludikwa na aye. Kyo kikadile muntu na bwanapabo bwa kutonga kanye nansha kasusu, buswe nansha mushikwa, boloke nansha bukondame. Ino butongi bwatonga budi na bipa byobulupula: buyampe bumuletela ndoe; nshikani imuletela masusu.
Butomboki bwa Bipangwa bya Kumushipiditu
8, 9. (a) Butomboki bwāshilwile muswelo’ka mu kīkalo kya mishipiditu? (b) Kutentekela pa ba Adama ne Eva, i bāni bakwabo bātombwelwe na Satana?
8 Kudi kintu kikwabo kifwaninwe kubandaula. Ke’nkapo bambutwile betu babajinji bātombokēle bubikadi bwa Leza, mhm. Ino i bāni bakwabo bādi’ko mu mine myaka’ya? I bipangwa bya kumushipiditu. Kumeso kwa Leza kupanga bantu, wāpangile bidi bipangwa bya būmi bwa peulu, bamwikeulu bavule mpata, ba kushikata mu kīkalo kya mūlu. Nabo bāpangilwe na bwanapabo bwa kwitongela, ino kwibasakila nabo kukōkela ku buludiki bwa Leza.—Yoba 38:7; Mitōto 104:4; Kusokwelwa 5:11.
9 Bible ulombola’mba butomboki bwāshilwile bidi mu kīkalo kya kumushipiditu. Kipangwa kimo kya kumushipiditu kyāsakile kwikala na bwanapabo bonsololo. Kyāsaka bantu bekitōte. (Mateo 4:8, 9) Uno mushipiditu ntomboki ye wāikele kutonona ba Adama ne Eva nabo batomboke, wēbabepela amba Leza wibafīle kintu kimo kilumbuluke. (Ngalwilo 3:1-5) O mwanda utelwa dya bu Dyabola (Vubavuba) ne bu Satana (Kinkwa). Kupwa, wātombola mishipiditu mikwabo. Mwenda mafuku ino mishipiditu yāyukana bu bademona.—Kupituluka 32:17; Kusokwelwa 12:9; 16:14.
10. Butomboki bwa bantu ne bwa bipangwa bya kumushipiditu i bubutule bika?
10 Bantu pa kutombokela Leza, bēsakila abo bene kulonda milongelo ya Satana ne bademona bandi. O mwanda Bible utela Satana bu “Leza wa ino ngikadilo ya bintu,” ‘usaba meso a ñeni a bakubulwa kwitabija.’ Kyo akyo kinenena Kinenwa kya Leza amba ‘ntanda yonsololo ilēle mu lupusa lwa yewa umbi.’ Ne Yesu mwine wāityile Satana bu ‘mulopwe wa ino ntanda.’—2 Kodinda 4:4, NW; 1 Yoano 5:19; Yoano 12:31.
Myanda Ibidi
11. Satana wāpatenye Leza mu mwanda’ka mukwabo?
11 Satana wākolomwene mwanda mukwabo wa kufutulula Leza. Wātopekele Leza amba wētupile mu muswelo waāpangile bantu, i kutupu muntu nansha umo ubwanya kulonga byoloke shi abamutyinye mbavu. Ko kunena’mba, shi muntu atūlwe mu matompo, ukokeja kutuka Leza. (Yoba 2:1-5) Bino bilombola’mba Satana wādi walakana bululame bwa bipangwa byonso.
12-14. Lelo kitatyi kibalombola bubine’ka pa myanda ibidi yākolomwene Satana?
12 O mwanda Leza wāshidile bipangwa byonso bya ñeni kitatyi kibwane kya kupwa lupata pa uno mwanda ne pa wa bubikadi bwa Leza bwa mūlu ne pano panshi. (Enzankanya na Divilu 9:16.) Mushikatyilo wa bantu mwenda myaka o wādi wa kulombola i ani udi na bubinga pa ino myanda ibidi.
13 Dibajinji bidi, le kitatyi kyādi kya kulombola kika pa uno mwanda wa bubikadi bwa mūlu ne pano panshi, wa bubinga bwa kwitubikala budi na Leza? Lelo bantu bādi ba kwiludika abo bene senene kupita kuludikwa na Leza? Lelo kwādi kwa kwikala mubikadilo kampanda wa bantu, ubwanya kuletela ntanda nsangaji, wambulwa mavita, bupolapola ne maviyo, pampikwa Leza kutenga’po kuboko? Ubwanya kupwija bulanda ne kupāna ntundubuko ku bantu bonso? Ubwanya kufundula’ko misongo, bununu ne lufu? Bubikadi bwa Leza abo bukapwijanga byonso bino.—Ngalwilo 1:26-31.
14 Twende ku mwanda wa bubidi, le kitatyi kyādi kya kulombola kika pa mvubu ya kupangwa kwa muntu? Lelo Leza wētupile pa kupanga bantu mu muswelo waēbapangile? Lelo mu bantu mwādi mwa kutanwa bantu kampanda babwanya kulonga byoloke nansha shi abaikala kutompibwa? Lelo kwādi kwa kwikala bantu kampanda balombola’mba basenswe buludiki bwa Leza kupita buludiki bwa bantu beludika abo bene?
[Kifwatulo pa paje 13]
Leza i mulekele bantu kitatyi amba bafikije busendwe bwabo palampe
[Kutambile Kifwatulo]
Apolo: Mulombwela foto ya NASA