Kifundwa 12

Kwata Būmi ne Mashi na Bulēme

I muswelo’ka otufwaninwe kumona būmi? (1) kupulumuna dīmi? (1)

I muswelo’ka ulombolanga bene Kidishitu amba badi na mutyima wa mundamunda utōka? (2)

Lelo kwipaya banyema i bibi? (3)

I bilongwa’ka bimobimo bilombola kubulwa kulēmeka būmi? (4)

I kijila’ka kijidikile Leza pa mashi? (5)

Lelo mu kino kijila mubadilwa ne kwelwa mashi mu mijilo? (6)

1. Yehova ye Nsulo ya būmi. Bipangwa byonso byūmi byāpelwe būmi na Leza. (Mitōto 36:9) Būmi i bujila ku meso a Leza. Nansha ke būmi bwa mwana kabutwilwe ukidi munda mwa inandi i bulēme ku meso a Leza. Kwipaya ku kusaka mwana wa lukeke wenda ukivunguluka mu difu i bibi ku meso a Leza.​—Divilu 21:22, 23; Mitōto 127:3.

2. Bene Kidishitu babine badi na mutyima wa mundamunda utōka. Baloñanga buninge myotoka yabo ne bifuko byobashikete’mo bikale byakubulwa byaka. (Kupituluka 22:8) Bengidi ba Leza kebatūlangapo bya bituputupu būmi bwabo mu kyaka pa mwanda’tu wa nsangaji nansha wa kwilangula bidyoma. O mwanda kebakayangapo makayo a bikandangobo a kusanshija bakwabo ku kusaka. Bepukanga makayo akankamika butapani.​—Mitōto 11:5; Yoano 13:35.

3. Būmi bwa banyema nabo i bujila ku meso a Umpangi. Mwine Kidishitu ukokeja kwipaya nyema mwanda wa kumona bidibwa ne bivwalwa nansha mwanda wa kwikinga aye mwine ku misongo ne ku byaka. (Ngalwilo 3:21; 9:3; Divilu 21:28) Inoko kususula banyema nansha kwibepaya pa mwanda wa makayo nansha wa nsangaji bitupu i bibi.​—Nkindi 12:10.

4. Kutoma mfwanka, kutankunya mani akolwañana etwa bu betel, ne kutoma dyamba mwanda wa kwisangaja ke bintupo bifwaninwe kulonga bene Kidishitu. Bino bilongwa i bibi mwanda (1) bitumunanga ketudi bapika babyo, (2) bitonakanya imbidi, kadi (3) i bya disubi. (Loma 6:19; 12:1; 2 Kodinda 7:1) Kuleka bino bibidiji kukokeja kumweka bu kukomo. Ino tufwaninwe kuleka’byo mwanda wa kusangaja Yehova.

5. Mashi nao i ajila ku meso a Leza. Leza unena amba muya, ko kunena amba būmi, udi mu mashi. O mwanda nanshi kudya mashi i bibi. Kadi i bibi kudya mwita wa nyema wakubulwa kusūmijibwa mashi senene. Shi nyema i mufinwe lukono nansha i mwifwile aye mwine mu dikinga, kafwaninwepo kudibwa. Shi i mwaswe nansha mutapwe, nankyo ufwaninwe kusūmijibwa mashi bukidibukidi shi i wa kudibwa.​—Ngalwilo 9:3, 4; Bene Levi 17:13, 14; Bilongwa 15:28, 29.

6. Lelo kwitabija kwelwa mashi i bibi? Vuluka amba Yehova witusakilanga twilame ku mashi. Kino kishintulula amba ketufwaninwepo kuyata mashi a muntu ungi ketwitweja’o mu yetu imbidi shi mu muswelo’ka, shi mu muswelo’ka, nansha ke mashi etu adi mabikwe mu kifuko kampanda mene. (Bilongwa 21:25) Shi ke pano, bene Kidishitu babine kebafwaninwepo kwitabija kwelwa mashi. Bakokeja kwitabija miswelo mikwabo ya bundapi, kifwa kwelwa mu mijilo malawa akubulwa kutyangwa na mashi. Basenswe būmi, ino kebakimbangapo kupandija bwabo būmi na kujilula bijila bya Leza.​—Mateo 16:25.

[Bifwatulo pa paje 25]

Pa kusangaja Leza, tufwaninwe kwepuka kwitabija kwelwa mashi, bibidiji bya disubi ne kutūla būmi bwetu mu byaka bya bituputupu