Lelo Bantu Bonso Bakesanswanga Umo Ne Mukwabo?

BUSWE KU MUKWETU BWENDANGA BUTALALA

BANTU bavule bemwene bu i belwe, babimonya-malwa, kebadi na kwa kunyemena. Nsunga umo mwana-mukaji mukwate pasho usekununa amba: ‘Difuku dimo bufuku, mwana-mukaji wakishala wādi ushikata munshi mwa kyami kyumba, wāile, wānkokola ku kibelo, wānena amba kadipo na balongo. Nami nāmutentulula na bulēme, inoko na mpumpu yonso na’mba panoko nakidi na kaji. Nandi wālomba kufwilwa lusa pamwanda wa kunkambakanya, kupwa wāenda.’

Kyabulanda, uno mwana-mukaji wakishala wēyoa’nka bufuku’bwa. Ebiya, mwana-mukaji nsunga unena amba nātyipa, “nkyakakolwa dikwabo.”

Divule kubulwa buswe ku mukwetu kuletanga musala. Mu malwi elwa ba tubila na tubila mu Bosni ne mu Herzegovine, bipindi byādi bibundile ntanda ya Yugoslavi wa kala, bantu mudiyo umo ne kupita bavilwilwe ku bukomo, bakwabo tutwa twa tununu baipaibwa. Na bāni? “Na bekalwa nabo, twibayukile,” momwadi mutompwela nsongwakaji umo wapangilwe ku bukomo mu kyabo kibundi.

Mu Rwanda, i tutwa na tutwa twa tununu twa bantu baipailwe, pavule enka na bekalwa nabo. Julunale umo (The New York Times) unena amba: “Bahutu ne Batutsi [bekalanga nyeke] pamo, besonga, pampikwa kubanga nansha kwisañuna amba yeu i Muhutu, au ye Mututsi. Ino enka na mu kukopa kwa diso,” ne “kwiipaya kwashilula.”

Ne mu Isalela namo muswelo umo onka, Bayuda ne Baalabu bashikete njibo na kibelo, ino bavule i beshikwe umo ne mukwabo. Kidi pamo ponka ku bene Katolika bavule na bene Mishoni mu Irlande, ne ku bantu bavule bene ba mu matanda makwabo. Kubulwa buswe kwa uno muswelo kekwamwekele pano pantanda kashaa mu mānga yonso.

Lelo Kyenda Kitalela Buswe ku Mukwetu I Kika?

Umpangi wetu witupa kilondololwa. Bible, Kinenwa Kyandi, utela ino myaka yotudimo bu “mafuku a kumfulo.” Kino i kitatyi kibudilwe bantu “lusa lwa bubutule,” enka na mwikinenena bupolofeto bwa Bible. Yesu Kidishitu wātobele butobo butala pa ino “myaka ya malwa,” itelwa na Bisonekwa bu ‘kuvuika kwa ngikadilo ya bintu,’ amba ‘buswe bwa bavule bene bukatalala.’​—2 Temote 3:​1-5; Mateo 24:3, 12.

Nanshi kubulwa buswe kudi’ko dyalelo i kipindi kya bukamoni kilombola amba tudi mu mafuku a mfulo ya ino ntanda. I kya nsangaji, mwanda kadi kulombola amba ino ntanda ya bantu bakubulwa bwine Leza ikapingakanibwa panopano ponka na ntanda impya myoloke ikabikalwa na buswe.​—Mateo 24:3-14; 2 Petelo 2:5; 3:7, 13.

Ino lelo kudi buluji botufwaninwe kwitabijija binebine amba kwalamuka kwa uno muswelo kubwanika—amba bantu bonso bakokeja kwifunda kwisanswa umo ne mukwabo ne kwikala pamo mu ndoe umo ne mukwabo?

BUSWE KU MUKWETU​—BUDIKO

MWINĒ BIJILA umo wa mu myaka katwa imbajinji wāipangwile Yesu amba: “Lelo mukwetu kadi i ani le?” Bine, wādi utengele Yesu anene amba: ‘I Bayuda pamo bwa abe.’ Ino Yesu wālombwele mu mānga ya mwine Samadia wa mutyima muyampe amba bantu ba mizo ingi nabo i bakwetu.​—Luka 10:29-37; Yoano 4:7-9.

Yesu wākokele milangwe pa kino amba, pa kupwa kusanswa Leza, tufwaninwe kubikalwa umbūmi bwetu na buswe bwa kusanswa mukwetu. (Mateo 22:34-40) Ino, lelo kudi kisumpi nansha kimo kya bantu basenswe bakwabo binebine? Bene Kidishitu babajinji bādi basenswe bakwabo! Bādi bayukene pamwanda wa buswe bobādi nabo ku bantu bangi.​—Yoano 13:34, 35.

Lelo dyalelo nadyo? Le kudi muntu nansha umo udi na buswe pamo na bwa Kidishitu? Dibuku dimo (Encyclopedia Canadiana) dinena amba: “Mwingilo wa Batumoni ba Yehova i mwimike ne kushimikulula bwine Kidishitu bubajinji bwādi na Yesu ne bandi bana-babwanga . . . Abo bonso i bana na bana.”

Kino kishintulula namani? Kishintulula amba Batumoni ba Yehova kebalekelepo kintu nansha kimo—shi lukoba, shi muzo, nansha ke kabila kene—kibatonone ku kushikwa bakwabo. Kebepayangapo muntu, mwanda mu muneneno wa kyelekejo, i bafule bipete byabo ke makasu ne kubunda mikobe yabo bu mpete ya kukukula nayo mityi. (Isaya 2:4) Bine, Batumoni bayukenanga ku kansontomokela kobadi nako ka kukwasha bakwabo.​—Ngalatea 6:10.

Ke kyakutulumukapo shi julunale wa mu Californi (Sacramento Union) unena’mba: “I kyendelemo kunena amba shi ntanda yonso yadi ishiketwe na bantu badi na lwitabijo lwa Batumoni ba Yehova, longa kumwanga mashi ne mushikwa ke kutupu’byo, kadi longa buswe i bubikale bulopwe.” Musoneki wa dipepala dimo (Ring) dya mu Hongri, unena’mba: “Nafule ku kumona amba shi pano pantanda ponso padi pashikete enka Batumoni ba Yehova kete, longa mavita apwile kalāa, kadi longa mingilo ya bampulushi ke enka kutala mwendela myotoka ne kupāna mikanda ya dishinda kete.”

Tuyukei nanshi amba kufwaninwe kwikala kwalamuka kukatampe kwa ntanda yonso shi tusaka bantu bonso besanswe umo ne mukwabo. Lelo kuno kwalamuka kukekala’ko muswelo’ka? (Ketukupuñenye bidi, pūtula paje udi mu nyuma mwa uno.)

PAKESANSWA BANTU BONSO UMO NE MUKWABO

MILOMBELO yāfundije Yesu Kidishitu ilombola amba kwalamuka kukatakata kekudi pabwipi. Mu Bufundiji bwa Yesu bwa ku Lūlu bushele busekununwa, wētufundije’mo kulombela’mba: “Bulopwe bobe bufike. Kiswamutyima kyobe kilongeke pano panshi enka mo kikadile mulu.”​—Mateo 6:10, Myanda Miyampe ku Bonso.

Bulopwe bwa Leza i kika? I umbikalo wabinebine, uludika ao momwa mūlu. Omwanda witwanga ne bu “Bulopwe bwa mūlu.” Yesu, “Mwana-mulopwe wa ndoe,” ye utongelwe na Shandi kukekala mulopwe wabo.​—Mateo 10:7; Isaya 9:6, 7; Mitōto 72:1-8.

Pakāya Bulopwe bwa Leza, le i kika kikafikila ino ntanda miyule mushikwa? “Bulopwe,” “bukatyumuna bipindibipindi” imbikalo yonso myoneke ya ino ntanda. (Danyele 2:44) Bible ushintulula amba: “Panopantanda papitanga . . . ; nanshi yewa ulonga kiswa-mutyima wa Leza aye wikele nyeke.”​—1 Yoano 2:17.

Bible unena pa mwanda utala ntanda impya ya Leza namino amba: “Boloke bakapyananga ntanda, ne kwikala monka nyeke.” (Mitōto 37:9-11, 29; Nkindi 2:21, 22) Bine kikekala kitatyi kya ndoe! “Ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika.” (Kusokwelwa 21:4) Ne boba bāfwile bakekala monka bōmi, ntanda yonsololo ikālamunwa ke paladisa yabinebine.​—Isaya 11:6-9; 35:1, 2; Luka 23:43; Bilongwa 24:15.

Shi tusaka kukekala mu ntanda impya ya Leza, nankyo tufwaninwe kwisanswa umo ne mukwabo monka mwitufundijija’kyo Leza. (1 Tesalonika 4:9) Mwifundi umo wa Bible wa Kutunduka wanene amba: “Ntengele kitatyi kikesanswa bantu bonso umo ne mukwabo, pamo na mwikilaile Bible.” Tufwaninwe kukulupila amba Leza ukafikidija milao yandi! Aye mwine unena amba: “Nesambe’kyo, nkafikija’kyo.”​—Isaya 46:11.

Ino, shi usaka kukaloelelwa mu ano madyese munshi mwa Bulopwe bwa Leza, nankyo wifunde buyuki bwa mu Bible, pamo na mwifundila midiyo ya bantu ba mityima yakubulwa budimbidimbi kujokoloka ntanda yonso. (Yoano 17:3) Mukanda wa mapaje 32 I Kika Kisaka Leza Kotudi? ukakukwasha. Ukokeja kutambula mukanda obe na kudinga kakipindi kadi pa paje ubadikile’u ne kwikatuma ku adelese idi kubwipi na kodi.