Yesu Kidishitu—Aye Uno I Ani?
“NANSHA ke bantu bavule bakubulwa kwikala bene Kidishitu nabo bayukile amba Aye ye mufundiji mukatampe kadi wa tunangu. Ye mwine wa kasha ne kashele wabinebine mu bantu bājininye ntanda.” (The World Book Encyclopedia) “Aye” uno i ani? I Yesu Kidishitu, mushimiki wa bwine Kidishitu. Lelo umuyukile bu ani? Le kudi muswelo kampanda waikele kwalamuna būmi bobe?
Bintu byālongele Yesu mu mwingilo wandi i bilembwe mu Bible, mu mikanda iná ya mānga itwa bu Maevanjile. Lelo ino nsekununi i yabinebine? Will Durant mulembi wa mānga mutumbe paāpwile kubandaula’yo, wāsonekele amba: “Kufwatakanya’mba bantu babala-banga, batupwaipwai ba mu lukongo lumo, bo abo bālupwile’ko mulangwe wa muntu wa lupusa lukomokomo uno muswelo ne utendelwa, wa mwiendelejo wanibwa nenki, kyelekejo kya kipwano kya bu bana na bana, i kingelengele kitulumukwa kupita ne byonso bisekunwinwe mu Maevanjile bine.”
Ino bantu midiyo ne midiyo ba Kutunduka ne ba mu bifuko bikwabo kebayukilepo Yesu Kidishitu nansha dimo. Eyo, babwanya kuyuka’mba wādi’ko, inoko pakubulwa kulanga amba udi na mvubu kampanda kobadi. Bakwabo nabo bafutulula amba Yesu kadipo ne kyatelwa mutyima kine, mwanda wa byobamona bilonga boba betela bu balondi bandi. Bantu bamo ba mu Jampani bakokeja kunena’mba i bene Kidishitu bo ‘bālakeshe bombe atomike mu kibundi kya Nagasaki, akyo nakyo kyo kibundi mudi bene Kidishitu bavule kupita bibundi bivule bya mu Jampani.’
Ino lelo ukatopeka muñanga pangala pa misongo ya muntu ubela shi umbemvu mwine kalondangapo misoñanya imupele muñanga ya mwa kutomena malawa? Mhm, kukamutopekapo. Ne bantu ba mu Bipwilo bya Kine Kidishitu nabo mo monka, tamba kalā kebalondangapo misoñanya ya Yesu ya mwa kupwila myanda ibatana bukile bukya. Nanshi, kupita’ko kupela Yesu pa mwanda wa boba betela bya bubela bu bene Kidishitu ino kulonda’bo misoñanya yandi mpika, lelo wabulwa’po abe mwine kwifunda myanda yandi? Tala mu Bible, uyuke binebine Yesu i ani ne kuyuka muswelo wabwanya kwalamuna būmi bobe.
Buswe—Musoñanya Wandi
Yesu Kidishitu i mufundiji mukatampe wādi ushikete mu Paleshitina, pano ke papite kubwipi kwa myaka 2000. Twi bayuke myanda mityetye’tu ya būmi bwandi bwa bunkasampe. (Mateo, shapita 1 ne 2; Luka, shapita 1 ne 2) Yesu, pa kufikila pa myaka 30, wāshilwile mwingilo wa ‘kupāna bukamoni bwa bubinebine.’ (Yoano 18:37; Luka 3:21-23) Balembi baná ba mānga ya būmi bwa Yesu i bemanine nakampata pa mwingilo wandi, waāingile mu myaka isatu ne kipindi ya mfulo mu būmi bwandi bwa pano pa ntanda.
Yesu paākidi wingila wandi mwingilo, wāpele bandi bana-babwanga lufungulo lwa mwa kupwila myanda ya mu bwabo būmi. Luno lufungulo i kika? I buswe. Mu busapudi bwandi butumbe mu mānga yonso, bwitwa bu Busapudi bwa pa Lūlu, wāfundije’mo bandi bana-babwanga mwa kulombwela buswe ku bantu nabo. Amba: “Monso [mo]musaka bantu kwimūbila nenu mwibōbila monka.” (Mateo 7:12) Ino mbila itelwanga bu Kijila Kitabukile Bulēme. Bano “bantu” bādi besambila’po Yesu i ne balwana netu bene. Mwanda mu buno busapudi bumo bonka, wānene’mo amba: ‘Swai balwana nenu, ne kulombelela’ko boba bemupangapanga.’ (Mateo 5:44) Mwene buswe bwa uno muswelo bubwanya kwitukwasha tupwije myanda mivule yotulwa nayo dyalelo? Mo mwādi mulangila Mohandas Gandhi, muludiki mwine Hindu. Teja byaēsambile: “P[otu]kakwatañana . . . na bishima byāfundije Kidishitu mu Busapudi bwandi bwa pa Lūlu, . . . tukapwija [myanda] ya ntanda yonso mituntulu.” I bine, kulonda bufundiji bwa Yesu butala pa buswe kupwanga bikambija bivule bya bantu.
Buswe Bwandi Bwingilanga
Yesu wādi ufundija kadi ulongela monka. Wādi mutūle tumweno twa bakwabo kumeso, ulombola ne buswe mu byalonga. Difuku dimo, Yesu ne bandi bana-babwanga bākweshe bantu bavule, abo bene bābulwa’nka ne kitatyi kya kudya bidibwa. Yesu wāmona amba i biyampe bandi bana-babwanga ‘betūkije’ko bidi kakyaba katyetye,’ penepa wāenda nabo pafula nabya. Ino kibumbo kya bantu kyēbatangidila kumeso kekitengele bafike. Shi wādi amba abe ye Yesu, wādi wa kulonga’po namani? Eyo, Yesu ‘wēbakwatyilwe lusa,’ penepo ‘kaebafundija bingibingi.’ (Mako 6:30-34) Luno lusa lukatampe lwaādi wivwanina bakwabo lo lwādi lumutonona ebakwashe.
Bintu byādi bilonga Yesu bya kukwasha bantu kebyādipo bimanine’nka pa bufundiji bwa ku mushipiditu kete. Wādi wibakwasha ne ku ngitu. Kifwa, wādishishe bantu 5 000 (pampikwa kubadila’mo bana-bakaji ne banuke) bādi bamwivwana difuku’dya kufika ne ku kyolwa. Dikwabo wādisha bantu 4 000. Musunsa umbajinji, wāvudije mikate itano ne tumishipa tubidi, ino musunsa mukwabo, mikate isamba-ibidi ne tumishipa tutyetye. (Mateo 14:14-21; 15:32-38; Mako 6:35-44; 8:1-9) Mwene bino i bingelengele? I amo, wādi mulongi wa bingelengele.
Kadi Yesu wādi undapa ba misongo bavule. Wādi ubelula bampofu, bisheta, ne ba matwi majike. I byabine, usangula’nka ne bafwe! (Luka 7:22; Yoano 11:30-45) Kyaba kimo, wamakopo wāmuzenzele amba: “Shi uswile nankyo uyūke kuñundapapo.” Penepa Yesu wāmulondolola namani? “Waolola kuboko wamutenga kamunena’mba: Nswile ukome.” (Mako 1:40, 41) Yesu wādi utononwa na mutyima wa kusaka kukwasha bantu. Bingelengele byaādi ulonga byālombwele buswe bwaādi uswele bimonya-malwa.
Le bino i bikomo kwitabija? Bingelengele bivule byādi bilonga Yesu wādi wibilonga ku meso a bantu bonso. Nansha ke bakinkwa nandi bene, bādi bakimba kitatyi kyonso pa kumukwatyila, kebādipo batuna amba kādipo ulonga bingelengele. (Yoano 9:1-34) Inoko bingelengele byaādi ulonga byādi na kitungo kampanda. Byādi bikwasha bantu bayuke amba bine Yesu i mutumwe na Leza.—Yoano 6:14.
Kubandaula kotwabandaula mu kīpi bufundiji bwa Yesu ne būmi bwandi kwitutonona tumupe bulēme ne kwiula buswe bwandi. Ino Yesu kabwanyapo kwalamuna būmi bobe mu uno muswelo umo kete. Aye kādipo’tu mufundiji bitupu ufundija buswe. Wālombwele amba wādi wikele bu Mwana wa bunka wa Leza kumeso kwa kwiya’ye pano panshi. (Yoano 1:14; 3:16; 8:58; 17:5; 1 Yoano 4:9) Kadi pano udi na būmi bwine bumwikadije na mvubu mpata kodi, bwishile na būmi bwaādi nabo pano panshi. Bible ulombola amba Yesu wāsangwilwe, pano i mubikikwe bu Mulopwe wa Bulopwe bwa Leza. (Kusokwelwa 11:15) Yesu wānene amba: “Bakuyūke, abe Leza [umo kete wabine], ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.” (Yoano 17:3; 20:31) I bine, kuyuka Yesu Kidishitu kubwanya kukupeja būmi bwambulwa mfulo mu Paladisa! Le bibwanika namani? Lelo wabulwa’po kwifunda myanda mivule itala padi Yesu, wimwene abe mwine ‘buswe bwa Kidishitu mobwituningidila’ kumwiula? (2 Kodinda 5:14) Batumoni ba Yehova bakasangela mpata kukukwasha.—Yoano 13:34, 35.
Poso’nka kilombwelwe mu muswelo mukwabo kete, Bisonekwa byonso i bilupulwe mu Mukanda Ukola wa Mwine Leza.