Mwa Kusokwela Mutōtelo Wabine

Shi usaka kwikala mulunda na Leza, ufwaninwe kwikala mu mutōtelo waitabije. Yesu wānene amba “batōtyi babine” bakatōtanga Leza na kulonda mwendele “bubinebine.” (Yoano 4:23, 24, NW) Kudi muswelo moloke umo kete wa kutōta Leza. (Efisesa 4:4-6) Mutōtelo wabine utwalanga ku būmi bwa nyeke, ino mutōtelo wa bubela utwalanga ku konakanibwa.—Mateo 7:13, 14.

Shi usaka kuyuka mutōtelo wabine, tala mwikadile bantu batōta’mo. Yehova i muyampe, ne batōtyi bandi babine nabo kebadipo mwa kubudilwa kwikala bantu bayampe. Mutyi muyampe wa olandi ulupulanga maolandi malumbuluke, ne mutōtelo wabine nao mo monka, ulupulanga bantu balumbuluke.—Mateo 7:15-20.

Bantu ba Yehova bakwete Bible na bulēme bukatampe. Bayukile amba Bible i mutambe kwa Leza. Balekanga myanda ya mu Bible iludike būmi bwabo, ipwije makambakano abo, ne kwibakwasha bafunde kuyuka Leza. (2 Temote 3:16) Beelela’ko kulonga bintu byobasapula.

Balunda na Yehova beswele abo bonso. Yesu wālombwele bantu buswe bwaādi wibaswele pa kwibafundija myanda ya Leza, ne kundapa babela. Bantu badi mu mutōtelo wabine nabo baswele bakwabo. Balondanga kifwa kya Yesu, o mwanda kebafutululangapo balanda nansha bantu ba kabila kangi. Yesu wānene amba bantu bakayukila bandi bana-babwanga ku buswe bobeswele abo bene na bene.—Yoano 13:35.

Balunda na Leza balēmekele dijina dya Leza, Yehova. Shi muntu kampanda upela kutela dijina dyobe, lelo yao muntu ukokeja kwikala mulunda nobe wa pa mutyima? Mhm! Shi tudi na mulunda, tutelanga dijina dyandi ne kumunenena mayampe ku bantu bakwabo. Nanshi boba basaka kwikala balunda na Leza nabo bafwaninwe kutela dijina dyandi ne kusapwila bakwabo yandi myanda. Yehova witusakilanga tulonge uno muswelo.—Mateo 6:9; Loma 10:13, 14.

Balunda na Leza bafundijanga bantu Bulopwe bwa Leza, mwāfundijije’bo Yesu. Bulopwe bwa Leza i umbikalo wa mūlu ukalongolola ntanda ke paladisa. Balunda na Leza basapwilanga bantu bonso ino myanda miyampe ya Bulopwe bwa Leza.—Mateo 24:14.

Batumoni ba Yehova i balunda na Leza. Balēmekele Bible, kadi badi na buswe umbukata mwabo. Batelanga ne kulēmeka dijina dya Leza, bafundija ne bakwabo myanda ya Bulopwe bwa Leza. Batumoni ba Yehova batōtanga mu mutōtelo wabine dyalelo pano pantanda.