Bansongwanzele​—Lelo Musaka Kulonga Bika mu Bwenu Būmi?

“AMI nsakanga kyokya kitabukile kuneñena mu būmi bwami.” Mo mwanenene nsongwakaji umo. Na bubine, nobe mo monka mosakilanga. Ino i muswelo’ka okamona kyokya “kitabukile kuneñena” mu būmi bobe? Bisambwa bya luvula ne bakwenu, pakwabo’nka ne bobe badimu, babwanya kunena amba kwikala na lupeto luvulevule ne kwingila kaji ka ntumbo ko kumona kitabukile kuneñena mu būmi​—bine ko kubwina!

Inoko Bible udyumuna bankasampe amba kukimbakimba kubwina mu bintu bya ku ngitu i “kupanga luvula.” (Musapudi 4:4) I amo, mwanda i bankasampe batyetye basokolanga lupeto ne ntumbo byobadi bakimba. Ne basokolanga’byo bene divule kebo kwialakanya byamwiko. Nkasampe umo mwine Beletanye wafundile masomo malamala unena’mba kubwina kwa ku ngitu “kudi pamo’nka bwa kalato kampikwa’mo bintu. Shi utale munda, i mutupu kantu nansha kamo.” Eyo, kaji kakokeja kuletela muntu bupeta ne ntumbo. Ino kekakōkejapo kuvuija ‘bisakibwa bya ku mushipiditu.’ (Mateo 5:3) Ne kadi, 1 Yoano 2:17 uleta kino kidyumu amba “ino ntanda ipitanga.” Nansha shi ubabwina mu ino ntanda, yuka amba i bya lupito.

O mwanda Musapudi 12:1 usoñanya bankasampe amba: “Vuluka Umpangi obe mu mafuku obe pokidi nkasampe.” Bine, kintu kilumbuluke kulonga mu būmi bobe i kwingidila Yehova Leza. Ino dibajinji bidi, ufwaninwe kubwanya bisakibwa pa kwingidila Leza. Le ukebibwanya namani? Ne būmi bwa kwingidila Leza bulomba kulonga bika ne bika?

Kubwanya Bisakibwa bya Kwikala Kamoni wa Yehova

Dibajinji bidi ufwaninwe kutamija kyaka kya kwabila kwingidila Leza. Inoko, kino kyaka kekiilangapo akyo kine, nansha shi bambutwile bobe i bene Kidishitu. Ufwaninwe kupwana abe mwine na Yehova. Nsongwakaji umo unena’mba: “Milombelo ibwanya kukukwasha upwane abe mwine na Yehova.”​—Ñimbo ya Mitōto 62:8; Yakoba 4:8.

Loma 12:2 ulombola ditabula dikwabo dyofwaninwe kutabula. Unena amba: “Mujingulule banwe bene kiswa-mutyima kya Leza kiyampe, kitabijibwe ne kibwaninine.” Lelo kashā kodi mutatane bintu kampanda byobakufundijanga? Nabya londa madingi a Bible; kadi ‘jingulula abe mwine’ shi bino bintu i bya bine! Longa bukimbi abe mwine. Tanga Bible ne mabuku esambila pa Bible. Kwifunda kuyuka Leza ke kwivudijijapo’tu buyuki bonkabonka. Witūdile’ko kitatyi kya kulangulukila pa byotanga, mwa kutwelela’byo mu nkulwe ya mutyima obe. Kino kikatamija buswe boswele Leza.​—Ñimbo ya Mitōto 1:2, 3.

Kupwa, tompa kusapula byowifunda ponso pomona mukenga, kimfwa ku bakwenu ba ku masomo. Ditabula dikwabo i dya kusapula ku njibo ne njibo. Kyaba kimo ukokeja kutulukila mukwenu wa ku masomo posapula, kino kikokeja kukuseleja mutyima kūlu dibajinji. Ino Bible witusoñanya amba ketufwaninwepo kufwa “bumvu kusapula myanda miyampe.” (Loma 1:16) I musapu wa būmi ne lukulupilo oselele! Le kyofwila bumvu i kika?

Shi bambutwile bobe i bene Kidishitu, padi wibatwalanga kala mu busapudi. Ino pa kyaba kya kwimana talala pa kibelo nansha kupāna’nka mapepala ne matrakte kete, mwene ubwanya kulonga bipite pano? Mwene ubwanya kwisamba abe mwine pa kibelo ne kwingidija Bible pa kufundija mwinē njibo? Shi bikukomena, nena bobe bambutwile nansha mwanetu kampanda mupye pa kipwilo akukwashe. Witungile kitungo kya kubwanya bisakibwa bya kufikila pa bu musapudi wa myanda miyampe wa kubulwa kubatyijibwa!

Mwenda mafuku, ukasolokwa mutyima wa kwipāna ne kupika mpiko ku meso a Leza amba ukamwingidila mafuku onsololo. (Loma 12:1) Shako, kwipāna ke mpikopo’tu yowipikila abe mwine. Leza usaka bonso ‘banene patōkelela mwanda wa lupandilo.’ (Loma 10:10) Kitatyi kya kubatyijibwa, usa kulombola bidi lwitabijo lobe ku kanwa. Kupwa ke kukabatyijibwa mu mema. (Mateo 28:19, 20) Kunena na bubine, kubatyijibwa i ditabula disumininwe. Ino kokajokela kunyuma, na kulanga amba padi nsa kukankalwa. Shi wiubije mudi Leza wa kukukomeja, nandi ukakupa “bukomo butabukile bwikalanga na bantu” bwa kukukwasha wimanije pototo.​—2 Kodinda 4:7; 1 Petelo 5:10.

Shi ubabatyijibwa, kodi Kamoni wa Yehova. (Isaya 43:10) Kino kifwaninwe kwikala na lupusa bininge pa byosaka kulonga mu būmi bobe. Kwipāna i ne ‘kwipela abe mwine.’ (Mateo 16:24) Ubwanya padi kuleka bitungo ne bintu bimobimo bikutala, mwa ‘kukimbila bidi nyeke bulopwe bwa Leza.’ (Mateo 6:33) Kwipāna ne kubatyijibwa kukakupa mikenga mivule ya kulonga bino byonso. Tubandaulei’ko bidi mikenga imoimo.

Mikenga ya Kwingidila Leza Kitatyi Kyonso

● Bupania i mukenga umo pa ino. Pania i mwine Kidishitu mubatyijibwe uleta kimfwa kiyampe, mwitungile kupityija kintu kya mansá 70 ku kweji ne kweji mu kusapula myanda miyampe. Kupityija kitatyi kivule mu busapudi kukakukwasha utamije bwino bobe bwa kusapula ne kufundija. Bapania bavule bemwenanga nsangaji ya kukwasha bobefunda nabo Bible bekale ke Batumoni babatyijibwe. Lelo kudi’po kaji kakwabo kakokeja kukuletela nsangaji uno muswelo?

Bapania bavule bengilanga twaji twa kitatyi kyepele mwa kumwena twa kwikwasha nato mu būmi. Bavule bashilwilanga’ko kwiteakanya mwa kwingidila uno mwingilo na kufunda twaji twa makasa ku masomo nansha kudi bambutwile babo. Shi abe ne bambutwile bobe mubamone amba i biyampe ufundile’ko bufundiji bukwabo pa kupwa kwa sekondele, nankyo longa buninge kukanina kobe kuleke kwikala kwa kukimba lupeto kapwila, ino kwikale kwa kukwatakanya mwingilo obe wa busapudi, ne shi bibwanika, kwingila mwingilo wa kitatyi kyonso.

Inoko, kintu kikatampe mu būmi bwa pania ke kajipo ka ku ngitu, i mwingilo wandi wa kukwasha bakwabo nabo bakamone būmi! ­Wabulwa’po nobe kwitungila kitungo kya kwingila bupania? Abo buno butwalanga divule ku madyese makwabo. Kimfwa, bapania bamo bavilukilanga kokwa kusakilwa basapudi ba Bulopwe bavule. Bakwabo befundanga ludimi lweni mwa kukwatakenya kipwilo kya ludimi lweni kya kwabo nansha mu ntanda ya bweni. Bine, bupania i būmi bumwenwa’mo mpalo!

● Masomo a Basapudi ba Bulopwe nao i mukenga mukwabo. Ano masomo a myeji ibidi adi’ko mwanda wa kufundija bapania ba bwino betabije kushiya bifuko byabo amba bakengidile kokwa kusakilwa bukwashi. Bine banenanga’mba, “Ami uno, ntume bidi” na kwiula Musapudi mukatampe kutabuka bonso pano pa ntanda, ke Yesu Kidishitu kadi. (Isaya 6:8; Yoano 7:29) Kuvilukila kulampe na bifuko byabo kubwanya kwibalomba kwibidila būmi bupēla. Bibidiji, kushinta kwa bitatyi ne byakudya bibwanya kwishila bininge na byobadi bebidile. Bibwanya’nka ne kwibalomba kwifunda ludimi lweni. Ano masomo akwashanga banabetu bankungulume ne bankungakaji ne boba besongele, ba myaka 23 kutūla ku 65 batamije ngikadila ya ku mushipiditu yobasakilwa mu mwingilo wabo ne bwino bukebakwasha bengidijibwe bininge na Yehova ne bulongolodi bwandi.

● Mwingilo wa ku Betele i mwingilo wa kwingila pa kubulwa nsengwa ku musambo wa Batumoni ba Yehova. Banabetu bamo ba mu kisaka kya Betele bengididilanga’nka ku mwingilo wa kulupula mabuku esambila pa Bible. Bakwabo nabo bapebwanga mingilo ya kulunga’ko kuboko, kimfwa ya kulongolola mobo ne bingidilwa bikwabokwabo, ne ya buledi bwa ku ngitu bwa kisaka kya Betele. Ano onso i madyese a mu mwingilo ujila otwingidila Yehova. Ne kadi, ba ku Betele badi na nsangaji mwanda bayukile amba byonso byobalonga’ko bidi na kamweno ku banababo ba ntanda yonso.

Pakwabo banabetu bayukile busendwe kampanda betwanga kukengidila ku Betele. Inoko bavule bafundijibwanga mingilo konka shi abafika’ko. Ba ku Betele kebengidilangapo kamweno ka ku ngitu, inoko baloelelwanga mpangiko idi’ko ya bidibwa, byumba, ne kadyeya kepele ka kwikwasha nako. Nkasampe umo wa mu kisaka kya Betele ­wisambila pa mingilo yandi amba: “I kya kuten­delwa! Shako, kulonga bintu bya muswelo umo bukile bukya ke kunekenepo, inoko ne mweselwe madyese mavulevule mu mingilo yoñingila kuno.”

● Mwingilo wa lūbako upanga muntu mukenga wa kūbaka na bobaka mobo a misambo ne Mobo a Bulopwe. Boba bengila mu lūbako, enka na mobetyilwa kala, bakwashanga ku mingilo ya lūbako. Ino nayo i mingilo ijila yonka, idingakene na yāingile boba bāūbakile tempelo ya Solomone. (1 Balopwe 8:13-18) Mpangiko ikwetwe’ko ya kukwatakanya boba bengila mu lūbako i imo yonka na ya kisaka kya Betele. Bine bano batutu ne bakaka badi na madyese makatampe mpata pa kwingila uno mwingilo mwanda wa kutendela Yehova!

Ingidila Yehova na Muya Obe Onso

Kwingidila Yehova kyo kintu kitabukile buya kulonga mu bobe būmi. Wabulwa’po nobe kwitungila kitungo kya kwingidila Leza kitatyi kyonso? Wisambe na bambutwile bobe, na bakulumpe ba pa kipwilo kyenu, ne na mutadi wa kipindi pangala pa mwingilo wa kitatyi kyonso. Shi usangela kwenda ku Betele, ku Masomo a Basapudi ba Bulopwe, nankyo katanwe ku mīsambo īsambwanga ku bitango bya ntanda na boba basaka kwenda’ko.

Na bubine, ke bonsopo bakokeja kubwanya bisakibwa nansha kwingila kitatyi kyonso. Kyaba kimo misongo, bufudile, ne biselwa bya kisaka bikokeja kubudija mwanetu kulonga bintu bivule. Nansha nankyo, mwine Kidishitu yense mwipāne ufwaninwe kulonda mbila ya mu Bible inena’mba: “Sanswa Yehova Leza obe na mutyima obe onso ne na muya obe onso ne na ñeni yobe yonso.” (Mateo 22:37) Yehova ukusakila ulonge kyokya kitabukile kuneñena mungya ngikadilo yodi’mo. Nanshi, nansha shi udi mu ngikadilo’ka, tangidija kumeso kwingidila Yehova mu būmi bobe. Witungile bitungo bya kiteokratike byobwanya kufikila’po. Bine, “vuluka Umpangi obe mu mafuku obe pokidi nkasampe”​—nabya ukeselwa madyese a nyeke ne nyeke!

Poso’nka kilombwelwe mu muswelo mukwabo kete, bisonekwa bya Kihebelu i bilupulwe mu Mukanda Ukola wa Mwine Leza, ino bisonekwa bya Kingidiki i bilupulwe mu Bisonekwa Bijila—Bushintuludi bwa Ntanda Mipya.