Lelo Nobe Ubulwe’po Kwitaba ku Lwito?

¹ Kudi mwanda mukomokomo wālupukile mu mwaka wa 778 K.K.K. Mupolofeto Isaya wāmwene Yehova “ushikete pa kipona kilakila, kizunzulwe.” Ebiya Isaya wāivwana baselafimi bela lubila lwa ntumbo ya Yehova amba: “Ukola, Ukola, Ukola, Yehova wa bibumbo.” Bine kyādi kimonwa kilenga moyo kashā! Ponka’po Yehova wāipangula kipangujo kikomo amba: “Lelo o nkatuma i ani; i ani le uketwendela, a?” Kekudipo bushintuludi nansha bumo bulombola mwingilo ukengila mwine obatuma’wa nansha kulombola mfutwa yakafutwa. Nansha nankyo, Isaya wālondolola pakubulwa kwikaka amba: “Ami uno, ntume bidi.”​—⁠Is. 6:​1, 3, 8.

² Uno mutyima wa kwituma kukalonga kintu kyo-kyonso kinena Yehova o uyukilwa’po bantu bandi. (Mit. 110:⁠3) Pano napo kudi lwito lwa pa bula lwitwa bonso basaka kwitaba’ko. Lelo usa kwitaba na mutyima wakubulwa nsengwa mwāitabile Isaya?

³ Pano kudi mingilo mivule isakilwa banabetu ba kwingila ku Betele. Kino kilomba banabetu bekale na mutyima wabila bininge kutūla tumweno twa Bulopwe pa kifuko kibajinji ne kulonga mingilo yo-yonso ya kukwatakanya mwingilo wa busapudi wingilwa ntanda yonso. (Mat. 6:33) Eyo, kwikala mwingidi wa mu kisaka kya Betele kwitupanga mukenga wakubulwa mukwabo udingakene nao wa kwingidila Yehova na muya wetu onso. Muswelo’ka?

⁴ Mingilo Ingilwanga ku Betele: Langa’po bidi mingilo ingilwanga nyeke ne nyeke mu mobo a Mabetele asatu adi mu Etats-Unis: ku Brooklyn, ku Patterson, ne ku Wallkill, mu New York. Batutu ne bakaka 5 730 babundile kisaka kya Betele mu bino bifuko bisatu badi na dyese dya kukwasha bininge umpika wabinebine ne wamanwa ne kyandi Kitango Kyendeji ku mwingilo wa kulupula Mabible ne mabuku esambila pa Bible a kwingidija mu budimi kujokoloka ntanda yonso ne mu kwifunda kwa kasuku. (Mat. 24:45) Kifwa mu mwaka wa mingilo wapityile’u, kwaikele mabuku 24 364 670, tubuku ne mikanda 39 813 464, mapepala 270 528 000, ne mabande a kasete 1 271 041 alupwilwe ne kutumwa, bino byonso pangala pa buninge bwa kikonge bwalongele kisaka kya Betele kya mu Etats-Unis. Kwalongelwe bukomo bwa kasha bwa kukimba ne kutonga “binenwa bifwaninwe, ne [bilembwa byoloke], ke binenwa bya bu-binebine” kadi, bya kutweja mu ano mabuku. (Mus. 12:​9, 10) Kudi kadi buludiki buletwanga bwa kukwatakanya balamuni 1 900 ne kupita kujokoloka ntanda yonso bakwasha ku mwingilo wa kwalamuna mabuku mu ndimi 300 ne bya pangala. Kadi kuletwanga bwendeji bwa kuludika mwingilo wingilwa mu misambo 110 kujokoloka ntanda yonso, ne mu bipwilo 11 500 ne kupita bidi mu Etats-Unis. Kudi kadi ne bukwashi bukwabo bukwashibwanga misambo imanine myanda ya busendwe ne ya lūbako lwa mobo mapya a Mabetele, Mobo a Kubungakena’mo, ne Mobo a Bulopwe 15 248 akimbwa pano kūbakwa mu matanda akubulwa misokwe mivule. Pano kusakibwa tutwa twa banabetu ba kwituma ba kwingila mwingilo wa kutampa ne kutuma mabuku, kukundula mobo, kulongolola bintu byoneka, kuteka bidibwa, kupota bintu, kundapa, ne mingilo mikwabo ya ku Betele.

⁵ Kwingila ino mingilo yonso i kiselwa kikatampe, akyo’ko kifukatyija mutyima ku mushipiditu. Kuyuka amba bukomo ne kininga kyetu, byonso tukwatakanyanga nabyo mwingilo wa kusapula ne kufundija, kuletanga nsangaji mikatampe mpata. Mwingilo wa ku Betele witukwashanga tuyuke bulongolodi bwa Yehova biyampe shē. Tuvulukei binenwa byānene mulembi wa mitōto pa kukankamika bene Isalela amba bayukidije senene kité kwādi kutamba buludiki bwa kiteokratike pano pa ntanda mu abo mafuku’a.​—⁠Mit. 48:​12, 13.

⁶ Madyese a mu Mwingilo wa ku Betele: Boba bengidila ku Betele bamonanga namani madyese abo a mwingilo? Teja binenwa binene bengidi ba kisaka kya ku Betele, bakulumpe ne bankasampe bene kumo. Mwingidi umo wa mu kisaka kya Betele wingile’ko mu bulwa bwa myaka isatu unena’mba: “Kwikala ku Betele kwaningishe kipwano kyami na Yehova. Ami ñenda ngija mu mwingilo, po pene ñenda ndyukila’ko mwingidilo wa Betele, ñenda mfundila’ko ne mwikadile bumuntu bwa Yehova. Kadi mwingilo wa ku Betele i mumpūtule meso kemone mwingidijija Yehova bantu​—⁠bantu ba miswelo yonso. Kadi kekilombepo amba enka wikale bidi mubwaninine nabya koitabijibwa na aye.”

⁷ Tutu umo nkasampe unena’mba: “Navuluka difuku dimo dyonadi nanga amba, ‘Kikekala kya nsangaji mpata pa kutwela mu ntanda impya, kemangila bantu bakikōkeji ba pa kala amba nāingile myaka mivule ku Betele, kyādipo panja ñenda mfwila kumona lupeto.’ ”

⁸ Tutu nkasampe mukwabo nandi ulanguluka pangala pa bufundiji bwaafundijibwe’ko, amba: “Kwifunda bumuntu bwami ami mwine ne bintu byomfwaninwe kwilemununa’mo, kupwa ke kutamija mine ngikadilo’i dyadi dyese dikatampe kondi. Namone amba pano mbwanya kwingidila Yehova senene. Pano nemone amba kendi’ko bidi na ditūkijetyima, ne kwīfula kubwanine, pano kendi muswe bantu buswe bukatampe.”

⁹ Kaka umo nandi ulanguluka pa madyese aeselwe kufika ne pano, amba: “Kuno kondi mpangiko ya ku mushipiditu ibamfundija bivule padi Yehova ne muswelo onkokeja kumwiula senene mu mulangilo, mu mwiivwanino, ne mu bilongwa. Kuno kufunda byokekudipo mpwilo, ne madyese nao keadipo mpwilo.”

¹⁰ Tutu umo upityije myaka 59 mu mwingilo wa kitatyi kyonso, myaka 43 ku Betele, wesambile amba: “Betele ke kuvapo, pamo na mulangila bamobamo. Twingilanga bivule mwanda tudi na būmi bulonda mpangiko kampanda. . . . Kekudipo difuku nansha dimo dyoñingilanga naleka kusangela mingilo ya dine difuku’dya. Mwanda waka? Mwanda kwipāna kotwipāna kudi Yehova na muya wetu onso, kwitufukatyijanga mutyima pa kuyuka amba ‘tubalonga’nka kyotufwanyinwe kulonga.’ ”​—⁠Luka 17:​10, MB.

¹¹ Tutu mukwabo wingilanga ku Betele pano ke myaka 62 unena’mba: “Nkulupile na bubinebine amba kyo kifuko kilumbuluke pano pa ntanda pano kepaile Paladisa. Nkyealakenye kashā amba mwanda waka natūdile mwingilo wa kitatyi kyonso bu mwingilo wa mu būmi bwami bonso. Bine i nsangaji mikatampe pa kwimwena ne kwela kuboko ku mwingilo wa kutantyija bulongolodi bwa Yehova bwa pano panshi! Ne mutyipe amba, na bukwashi bwa Yehova, Betele ikekala nyeke yami njibo kadi nkepāna na muya wami onso mu kwendeleja tumweno twa Bulopwe kumeso.”

¹² Bano bengidi ba mu kisaka kya Betele abetutelela’tu madyese matyetye kete mu madyese mavule okokeja nobe kweselwa shi ubaitaba ku lwito lwa kukengidila ku Betele. Inoko, pamo’nka na mutambwilwanga madyese makwabo a mwingilo, ufwaninwe kubwanya bidi bisakibwa kampanda. Le i bisakibwa’ka bimobimo bifwaninwe kubwanya pa kwikala mwingidi wa mu kisaka kya Betele?

¹³ Bisakibwa bya Kubwanya pa Kwingila ku Betele: Bisakibwa bikatampe bya kubwanya mwa kwingidila ku Betele i bilombolwe mu kapango kadi mu kino kishinte. Kadi i kiyampe boba bāya ku Betele bekale bantu basenswe kwingila na kininga, kebakekala bantu “bakusanswa byamazua.” (2 Tem. 3:4; 1 Kod. 13:11) Bengidi ba mu kisaka kya Betele bafwaninwe kwikala bana-balume ne bana-bakaji bapye ku mushipiditu, batamije kibidiji kya kwifunda kwa kasuku ne bwino bwabo bwa kuyuka ‘kushiañanya ne biyampe ne bibi.’ (Bah. 5:14) Kutama kwabo kwa ku mushipiditu kufwaninwe kwilombola tamba kala mu bintu byonso bya mu būmi bwabo, kifwa mu muvwadilo, mu mwidyangwilo ne butongi bwa minjiki ne mu kwipwija mukose kwabo. Bengidi bakubulwa nsengwa ba mu kisaka kya Betele bengidilanga konso kobebatuma. Bankasampe bapebwanga divule mingilo ya makasa, kifwa kutampa, kuteakanya ne kutuma mabuku, kulongolola bintu byoneka, kukolopa, kukomba, kukenda bisandi, ne kuteka byakudya. (Nk. 20:29) Ino mingilo i mishile na twaji twa ku ngitu, mwanda mwingilo ne mwingilo uletanga kuloelelwa kukatampe mwanda i mwingilo ukola upeja Yehova ntumbo.​—⁠Kol. 3:⁠23.

¹⁴ Kitatyi kityetye bininge kya kwija boba betyilwe kwingidila ku Betele i mwaka umo. Kino kibapanga muswelo wa kufundijibwa mwa kwikadila’bo bengidi bengila mingilo ya kamweno. Ino kisakwa i bekale kushikata ku Betele mu būmi bwabo bonso. Buswe bobaswele Yehova bo bulengeja bengidi ba mu kisaka kya Betele batangidije mwingilo wa Bulopwe kumeso, tumweno twabo kunyuma, bine kino kisangajanga Yehova.​—⁠Mat. 16:⁠24.

¹⁵ Bisakibwa bya Ano Mafuku: Kukwatañana na mingilo ingilwa ku Betele, tukimbanga dibajinji batutu bankungulume. Nakampata batoñwanga i bapania nansha kino byokekibadilwapo mu bisakibwa, mwanda abo badi kala mu mwingilo wa kitatyi kyonso. Ino kubwanya kwitwa ne bakaka bankungakaji ne banabetu besonge badi na myaka kushilwila pa 19 kutūla ku 35, badi na bwino kampanda bukimbwa ku Betele. Kadi batutu ne bakaka bamo bapite bityetye pa myaka 35 ino abo’ko badi na bwino ne bufundi bwa pa bula bukokeja kwingidijibwa ku Betele nabo tubebakankamika badinge mafomu. Tusaka kifwa bañanga bondapa meno, badokitele, banabetu badi na mapolome mu myanda ya lubalo, basendwe mu lūbako, balongolodi ba byuma, baemfidimye, basendwe ba myotoka ne mudilo wa nshinga, kubala nkonde i kuswa. Inoko ketukankamikilepo umo ne umo amba akafundile’ko masomo kampanda nansha bufundiji kampanda mwa kwikadila na dyese divule dya kwitwa ku Betele. Boba bapwile kala kufunda ano masomo a pa bula, pakwabo kumeso kwa kuyuka bubinebine, bakokeja kulemba ne kulombola mwikadile būmi bwabo bonso pa papye ungi, kupwa bakalamika’ye ku fomu wa kulomba kwitwa ku Betele.

¹⁶ Shi ubadinge fomu ino kebakwityilepo ku Betele, kokatyumuna mutyima. Ubwanya kudinga fomu umo ku mwaka ne mwaka. Kudi kadi banabetu bamo bafundile masomo ne busendwe bwa pa bula bukimbwa ku Betele bekalanga betaba ku lwito na kwiya kwingila bu bengidi ba kwituma ba kitatyi kityetye. Bakokeja kulomba kwingidila ku Betele kyaba kityetye umbula mwa yenga umo, mayenga abidi, asatu nansha aná, nansha kufika ku myeji isatu. Mulembi wa pa kipwilo udi na mafomu a bengidi ba kwituma kitatyi kityetye bakimba kwitukwasha’ko mu uno muswelo. Mubwanya kulombela’ko mafomu makwabo a banabetu ba kwituma kitatyi kityetye, mulombela’o ku Fomu Ulombelwanga’ko Mabuku.

¹⁷ Kwingidila bininge Yehova pamo na banababo na Kidishitu i dyese dyakubulwa dikwabo didingakene nadyo ku boba bengidila ku Betele. Kitango Kyendeji kitendelanga mutyima wa kwipāna wa bonso betaba ku lwito mwanda wa kwingidila kisaka kya bana na bana kujokoloka ntanda yonso.​—⁠Fid. 2:​20-22; 2 Tem. 4:⁠11.

¹⁸ Bankasampe​—Mwiteakanyei Tamba Pano mwa Kwiila Kwingidila ku Betele: Kwiteakanya mwa kukengidila ku Betele kushilulanga ku meso kwa kufikila pa myaka 19 itungilwe. Lelo bankasampe bafwaninwe kulonga bika pa kwiteakanya mwa kukengidila ku Betele? Yesu wānene amba: “Lelo wa kwenu i ani wa mutyima wa kushimika kiteba, kabadikile kubala lupeto mwakukapwila’kyo ni?” (Luka 14:28) Kwiteakanya ne kukwata mpangiko kudi na mvubu pa kubwanya lūbako, ne ku bankasampe nako monka na monka, i kipite buya balanguluke bininge pa muswelo obateakanya lūbako lobobaka būmi bwabo bwa kumeso mu mwingilo wa Yehova! Bafwaninwe kushimika kyalwilo kikomo pobakidi banuke mwa kufikila’bo pa bitungo byabo bya ku mushipiditu. A nkasampe, lelo ushimikanga kyalwilo kyobe namani? Shi usaka kukengidila ku Betele, ukamona biyampe shi ubandaule byabinebine ino myanda ilonda’ko.

¹⁹ ‘Itabijai’ mwa Kupelwa Madyese a pa Bula a Mwingilo: Kukwatañana na Mateo 19:​12, Yesu wākankamikile bandi bana-babwanga ‘kwitabija’ bukunga. Mwanda waka? Ke pa mwandapo wa kamweno ka abo bene, mhm, ino i “ponka pa mwanda wa bulopwe bwa mūlu.” Polo nandi muswelo umo onka, wākankamikile uno mwikadilo amba bene Kidishitu ‘bate mutyima kudi Mfumwetu kwampikwa ne kyakwibapuakanya.’ (1 Kod. 7:​32-35) Ino bavule babulwanga ano madyese a kwingila bu bankungulume ku Betele mwanda beyumbilanga kusonga abo bakidi banuke. Tukankamika batutu bankasampe bengidije bukomo bobadi nabo mu mwingilo wa kitatyi kyonso pokebaikele na kiselwa kya kwendeja kisaka. Nansha shi mwenda mafuku kebatyibe mbila ya kusonga, bakekala balume balumbuluke mwanda wa bwino buvule bobatambwile mu bwabo būmi ne mu mwingilo wa bwine Kidishitu. Batutu bamo bengilanga mu bula bwa myaka kampanda ku Betele kupwa basonga ne kwendelela na mwingilo wabo abo bonso. Nansha shi mwenda mafuku abapebwa madyese angi, kifwa mwingilo wa bu mutadi wendakana, bu mishonele, kebealakanyangapo pangala pa myaka yobapityije bukungulume bwabo mu mwingilo wa ku Betele.

²⁰ Kokapuakanibwa na Kulondalonda bya Bupeta: I kiyampe nkasampe ne nkasampe eipangule amba: ‘Shi natambula dipolome, lelo kitungo kyami i kya kwingila mwingilo wa kitatyi kyonso wa ku ngitu’ni nansha i kwingidila Yehova kitatyi kyonso?’ Eyo, kutonga kwingidila Yehova kitatyi kyonso kulombanga kwipāna kwabinebine. Ne kwingila kaji ka ku ngitu nako i monka na monka! Ino ku mfulo, i mwingilo’ka ukakuletela kamweno kaendaenda kadi ka mvubu? Yesu wālondolwele patōkelela. Kukwatañana na Mateo 6:​19-21, wānene amba: “Kemukīkala kwibīkila lupeto luleme panopantanda, mhm, padi ne mpemvu ne ndyabilonda byakudya’lo. Nanshi mukēbīkila lupeto luleme momwa mūlu mwampikwa mpemvu, nansha ndyabilonda mīne byakwiludya, nansha bangivi bakukola basabilamo kwiba’lo, mutupu. Ke-kuntu kokwa kōbīkile lupeto lobe luleme ne mutyima ōbe ukēkala konka.” Tusaka mityima yetu ileke kwitutonwena nansha dimo ku kwipeka na kaji ka ku ngitu nansha ku kulondalonda bya bupeta pa kyaba kya kwipāna na muya wetu onso mu mwingilo wa Yehova. Batwe bonso tufwaninwe kuyuka amba lupeto lwetu lulēme lotufwaninwe kulondalonda i kipwano kilumbuluke kyotupwene na Yehova, mwanda wa kusangaja mutyima wandi. (Nk. 27:11) Potutūla Yehova pa kifuko kibajinji mu bunkasampe bwetu tulombolanga kotutūdile byabulēme byetu, ne muswelo otukwete Bulopwe na mutyika. Vuluka amba, “dyese dya Yehova dipeteja bupeta, kadi kalundilekopo kanjia nansha kamo kene.” (Nk. 10:22) Bankasampe badi na mukenga muyampe wa kulombola kulēmenene mityima yabo na kupa Yehova kintu kilumbuluke pangala pa bintu byonso byaebapele. Mwingilo wa ku Betele upānanga uno mukenga mulumbuluke ku boba babwanya bisakibwa.

²¹ Boba Bengila ku Betele Bafwaninwe Kwikala Batōka mu Mwikadilo: Mulembi wa mitōto wāipangwile amba: “Lelo kukatōkeja mulumyana dishinda dyandi i kwepi?” Kupwa wālondolola’mba: “Ponka pa kutámo mutyima mwendele mwanda obe.” (Mit. 119:⁠9) Kuno kuta mutyima i ne kwepuka kilongwa kyo-kyonso kya mu ino ngikadilo ya bintu ya Satana kikokeja kuboleja mwikadilo wetu. Bifwatulo bya bantu badi mutaka bilombolwa ku Entelenete, kulonga bya bukobakane na bantu ba ngitu ingi, minjiki ya busenga, kwipwija mukose kwa bwendalavu, ne kutoma bitomibwa bikolwañana, ano o makinga amoamo mu makinga mavule engidijanga Satana mwanda wa kukankaja betu bankasampe batunye kufikila pa bitungo byabo bya ku mushipiditu. Pa kunekenya ano manwa onso a Satana kilomba kusumininwa kwabinebine. Byodi nkasampe, shi ubamone amba koloñanga bintu bimobimo mu bino byatelwa’bi, nankyo lombola bakulumpe ba mu kyenu kipwilo ne kupwa ino myanda kumeso kwa kudinga fomu wa kukengidila ku Betele. I biyampe kwikala na mutyima wa mundamunda utōka pa kwingidila Yehova na bukankamane.​—⁠1 Tem. 1:⁠5.

²² Yuka Kwingidila Pamo na Bakwenu: Kisakibwa kya mvubu kifwaninwe kubwanya mwa kwingidila ku Betele senene i kuyuka kwingidila pamo na bakwetu. Kisaka kya Betele kya mu États-Unis i kibundwe na tununu ne tununu twa batutu ne bakaka batambile mu bantu ba būmi bwa miswelo yonso. Eyo, kuno kwishila kwa bumuntu bwa bantu kuneñenyanga Betele shako, ino nako kubwanya kuleta myanda mivule. Shi ulanga kukengidila ku Betele, ufwaninwe kwiipangula amba: ‘Lelo nkijangapo kufitwa shi bakwetu abapele milangwe yoñenda nayo? Lelo bakwetu bapēlelwanga kwingidila nami pamo?’ Shi bikulomba kwilemununa mu ino ngikadilo, nankyo alwila’ko tamba pano. Kulonga namino, kukakukwasha ukebidile kwingidila pamo na banabenu bakwabo ba mu kisaka kya Betele.

²³ Longa buninge bwa kwikala muntu mukomo ku mushipiditu na kuningisha kipwano kya mpwaninine na Yehova. Tamija kibidiji kilumbuluke kya kwifunda kwa kasuku, tweja’mo ne butangi bwa Bible bwa difuku ne difuku. Sapwila bakwenu myanda miyampe na bukankamane. Shi ulonge bino bintu, kwendelela kobe ku mushipiditu kukamweka patōka. (1 Tem. 4:15) Bine, boba bonso beteakanya pano mwa kukengidila mwingilo wa kitatyi kyonso bakemwena bintu bya kutendelwa!

²⁴ Bambutwile, Fundijai Benu Bana: I bika bikokeja kulonga bambutwile pa kukwasha babo bana bengile mwingilo wa kitatyi kyonso? Yesu wānene amba: “Yewa ufundijibwa, wafunda biyampe, ukekala’nka pamo bwa mufundiji wandi.” (Luka 6:​40, MB) Mwanā masomo ufundijibwe senene ne pa mfulo ubwanya kwikala na ngikadilo milumbuluke ya mufundiji wandi mwipāne. Uno musoñanya ufwaninwe kulangulukija bambutwile kitatyi kyobalonga bukomo bwa kufundija babo bana kwitūdila ‘lulamato lwa bwine Leza bu kitungo kyabo.’ (1 Tem. 4:⁠7) Bana bavudile kulonda mumweno umonanga bambutwile babo bintu bya ku mushipiditu, o mwanda bambutwile bafwaninwe kwiipangula amba: ‘Lelo batwe bene tukwete na mutyika mwingilo wingilwa ku Betele wa kukwatakanya mutōtelo utōka wa Yehova? Lelo tuyukile amba Yehova weselanga mpangiko ya Betele madyese? Lelo tukulupile amba kupityija būmi mu mwingilo wa Yehova bo butongi bulumbuluke bufwaninwe kutonga betu bana?’ Muswelo otukwete na mutyika wabinebine Betele ne mwingilo wingilwa’ko uketupa muswelo wa kukuna ino ngikadilo mu mityima ya betu bana.

²⁵ Ba Elekana ne Hana bādi bakwete mutōtelo wabine na mutyika. I bashile bambutwile bene Kidishitu ba dyalelo kifwa kiyampe mpata kya kulonda. Mu Isalela wa kala, enka bana-balume bo badi banenwe kwenda ‘kukamweka ku meso a Mwine Leza, Yehova’ misunsa isatu ku mwaka ku tabenakulo. Ino Elekana aye wādi wenda kubwipi kwa kilometele 30, divule lwa panshi, na kisaka kyandi kyonso “ku mwaka ku mwaka” kukela kitapwa ku kité kya mutōtelo wa Yehova. (Div. 23:17; 1 Sam. 1:​3, 4, 9, 19; 2:19) Mobimwekela uno mutwe wa kisaka wādi usaka kisaka kyandi kyonso kikale na mumweno waādi umwene bintu bya ku mushipiditu.

²⁶ Hana nandi wādi na mutyima usepelela mutōtelo wabine. Wādi wimona bu muntu ufwaninwe kukwatakanya mutōtelo wabine ku tabenakulo. O mwanda wāpikile mpiko amba shi Yehova amupe mwana, nabya ukamupāna ku mingilo ya ku tabenakulo. (1 Sam. 1:11) Bijila bya Mosesa byādi bipe mulume mbila ya kupela mpiko ya kubulwa kwendela’mo ya wandi mukaji. (Umb. 30:​6-8) Ino mobimwekela Elekana wāitabije mpiko ya Hana, nandi wālombola amba witabije kino kilomboji kya mutōtelo wabine!​—⁠1 Sam. 1:​22, 23.

²⁷ Lelo wabo mwana Samwele wātengelwe biyampe na uno mutyima wa kutendela bintu ne mushipiditu muyampe wādi na bambutwile bandi? I amo, wātengelwe. Mu bunkasampe bwandi, Samwele wādi wingila kwakubulwa nsengwa kadi na kikōkeji mingilo yobādi bamupa, wāfundijibwa ne kufundijibwa mwa kupelwa madyese makwabo ādi abilwa mu mwingilo wa Leza. Kuta kwādi kutele ba Elekana ne Hana mutyima ku mwingilo wādi wingila Samwele ku tabenakulo kekwāpwilepo pa kumona wabo mwana wingila’ko. Ino bāendelele na kumupempula kitatyi ne kitatyi, bamukankamika ne kumukwatakanya mu mwingilo wandi wa kitatyi kyonso.​—⁠1 Sam. 2:​18, 19.

²⁸ Kino i kifwa kilumbuluke mpata kishile ba Elekana ne Hana ku bambutwile bene Kidishitu ba dyalelo! Shi betu bana betwivwana tutendela na mutyima umo madyese a kwingidila ku Betele, bamona ne motwipānina mu kukwatakanya tumweno twa Bulopwe, nabo kebakabulwepo kutamija mutyima wa kusaka kwingidila Yehova ne kwingidila bakwabo. Bambutwile bavule bakunanga senene shē uno mushipiditu mu mityima ya babo bana. Mwana umo wa myaka isamba-ibidi wasonekele amba: “Shi natama, kenda ku Betele, kudi bintu bityetye byonsaka kukengila’ko. (1) Kutampa mapepala Kiteba kya Mulami ne Réveillez-vous !, (2) kwingila ku mwingilo wa kufwatula bifwatulo, (3) kukenda bisandi. Eyo, mwingilo o-onso ukamweka kengila’o, ke mwandapo.” Bine kisangajanga mpata pa kumona bana batamija uno mutyima wa kwituma!

²⁹ A bankasampe, vulukai amba “ino ntanda ipitanga, ne kilokoloko kyayo kine kumo, ino yewa ulonga kiswa-mutyima kya Leza ushala’ko nyeke ne nyeke.” (1 Yoa. 2:​17, NW) Endelelai na kulondalonda bitungo bya ku mushipiditu, ne madyese a pa bula a kwingidila ku Betele. Bambutwile, nenu iulai kifwa kya bengidi bakikōkeji ba pa kala bādi bakankamika babo bana batamije lulamato lwa bwine Leza. (2 Pet. 3:11) Shi ke pano, batwe bonso tukwashei batutu ne bakaka bankasampe bamone kwingidila Umpangi wetu Mwine Mukatampe na bukankamane bonso, mwanda uno mwingilo uselele ‘mulao wa būmi bwa pano ponka, ne bukāya kumeso.’​—⁠1 Tem. 4:8; Mus. 12:⁠1.

[Kapango pa paje 4]

Bisakibwa Bikatampe bya ba Kwingila ku Betele

● Mubatyijibwe nansha’tu mwaka umo kunyuma

● Muntu mukomo ku mushipiditu muswe Yehova ne bulongolodi bwandi byabinebine

● Mukomo ku mushipiditu, mu ñeni, mu mulangilo, ne ku ngitu

● Mwanā kibundi wa mu Congo-Kinshasa nansha Congo-Brazzaville, nansha mweni wa kushikata lonso uyukene ku Leta

● Uyukile kutanga, kwandika, ne kunena Falanse biyampe

● Udi na myaka 19-35