Lelo Betele I Bika?

Betele i dijina dya mu Kihebelu dishintulula’mba “Njibo ya Leza.” (Ngalwilo 28:17, 19, kunshi kwa dyani) Dino i dijina dyendele’mo dya mobo engidijibwa na Batumoni ba Yehova ntanda yonso mwanda wa kuludikila’mo mwingilo wa busapudi ne kwiukwatakanya. Kitango Kyendeji kingidilanga ku kité kya ntanda yonso kidi mu New York, mu États-Unis, kwine’kwa ko kuludikilwa mwingilo wingilwa mu mabilo a misambo adi mu matanda mavule. Boba bengila mu ano mobo betwanga mu kikonge bu kisaka kya Betele. Byobadi kisaka kimo, bashikatanga ne kwingidila pamo, badīla pamo, kadi bebunga pamo mwanda wa kwifunda Bible mu bumo.—Ñimbo ya Mitōto 133:1.

I kifuko kya pa bula kidi’mo bantu bepāne mu mingilo bashikete mu kisaka. Mu Betele ne Betele mudi bana-balume ne bana-bakaji bene Kidishitu bepāne mwanda wa kulonga kiswa-mutyima kya Leza ne kwingidila kitatyi kyonso tumweno twa Bulopwe. (Mateo 6:33) I kutupu nansha umo ufutwanga lupeto, inoko bonso bapebwanga mwa kulāla ne byakudya kadi ne kalupeto katyetye mwa kusokwela tubisakibwa twabo. Muntu ne muntu ku Betele udi na mwingilo wapelwe, shi mu bilo, shi ku mpishi, shi mwa kudīla. Bamo bengilanga ku kitampilo kya mabuku, nansha ku kukundula mobo, ku kukenda bisandi, ku kulongolola bintu, ne bikwabokwabo.

I kifuko kya mingilo mivule ya kukwatakanya busapudi bwa Bulopwe. Kitungo kinekine kikadile’ko Betele ne Betele i kya kulombola bantu bavule bubine bwa mu Bible. Mu bino byobalupula, mubadilwa ne kano kakitabo. I kalembwe mu bwendeji bwa Kitango Kyendeji, kupwa batuma’ko kupityila ku Entelenete ku bisumpi bya bwalamuni tutwa na tutwa kujokoloka ntanda yonso, katampwa na mashini atampa lubilo adi mu bitampilo bya mu Mabetele amoamo, ne kutumwa mu bipwilo 120 000 ne kupita. Mu ino mingilo yonso, kisaka ne kisaka kya Betele kikwatakanyanga mwingilo wa kampeja-bukidi kupita yonso—ke wa kusapula myanda miyampe kadi.—Mako 13:10.

• Le i bāni bengilanga ku Betele, ne bebakwashanga namani?

• Le Betele ne Betele ikwatakanyanga mwingilo’ka wa kampeja-bukidi?