Mukanda wa Musambo

Basapudi ba Bulopwe Baswedibwe:

Tudi na nsangaji ya kwimusapwila myanda imoimo itala lūbako lwa mobo asatu mapya a kulāla’mo aubakwa mu lubanza lwa Betele ya Kinshasa. Pano, lūbako lwine ke lupwe, ne misaka nayo ke mipwe kala kupopwa, kadi mingilo mityemitye ya kuvuya munda nayo yendelela kumeso biyampe byonka. Ne kadi tudi na nsangaji ya kwimuyukija amba mu Kweji 6, 2006 twashilwile kulongolola pa kifuko pa kūbaka njibo ya kudila’mo mwa kwala bishikatwa 450 ne mpishi’ko. Ino mingilo yonso ingilwanga na kompani ya lūbako ya muno mwetu. Inoko Mwingilo Utala Lūbako lwa Betele yetu o uludika mingilo ne kwendelela kutala shi mobo obakwanga senene. Potutala mwingidilwa biyampe shē uno mwingilo wa lūbako lwa Betele ne kwendelela kowendelela kumeso, tubamone amba Yehova weselanga njibo yandi ikale kutandabuka.

Ne kadi tubafwija’ko pangala pa bukwashi bwakwashibwe batutu ne bakaka tununu ne tununu baponenwe na divita ne byamalwa byodyalengele.​—Yoa. 13:35.

Mu 2006, twakweshe bipwilo 845 na kwabanya bivwalwa mu bifuko mwadi banabetu bakolelwe bininge. Kitango Kyendeji kyaitabije kuletwe buno bukwashi, ne kadi banabetu ba mu Bulaya batumine makilo 21000 a bisandi ne bilato. Twalongele muswelo umo onka mu 2003 ne 2004 na kukwasha bipwilo bidi mu bifuko bikwabo bya mu mwaba wetu.

Twimulomba mwendelele kulombela pangala pa bano banabetu bonso, ko kunena’mba boba batenwe na byamalwa ne boba baleta bya bukwashi bene.​—2 Kod. 1:11.

Banabenu,

Bilo ya Musambo wa Congo