I Bika Biloñwanga ku Bilo ya Musambo?

Bana ba mu kisaka kya Betele bengilanga mu mingilo palapala, bakwatakanyanga mwingilo wa busapudi mu ntanda imo nansha mavule. Bakokeja kwingila mu bisumpi bya bwalamuni, mu bitampilo bya mapepala, mu kulamika bitabo, mu bibīko bya mabuku, mu kukwata mawi ne mavideo, nansha kutala myanda mikwabokwabo ya mu ntanda’ya.

Komite wa Musambo ye utalanga mingilo’ya. Kitango Kyendeji kipanga Komite wa Musambo, wa bakulumpe basatu nansha ne kupita babwenye bisakibwa, mwingilo wa kutala bilo ya musambo. Komite uyukijanga Kitango Kyendeji mwendela mingilo mu ntanda yobapelwe kutala ne makambakano obatanwa nao. Kwibayukija namino kukwashanga Kitango Kyendeji kitonge i myanda’ka ikokeja kutwejibwa mu mabuku, mu mpangiko ya kupwila, ne ya bitango. Mikendi ya Kitango Kyendeji itumwanga kitatyi ne kitatyi kupempula misambo ne kupa Makomite a Misambo bwendeji bwa mwa kuvuijija mingilo yabo. (Nkindi 11:14) Mpangiko ya pa bula, mubadilwa ne mwisambo wa mukendi wa kité kya ntanda yonso, iteakanibwanga mwanda wa kukankamika boba bashikete mu bibundi bya musambo’wa.

Ukwashanga bipwilo. Batutu bapelwe biselwa mu bilo ya musambo betabijanga kushimikwa kwa bipwilo bipya. Bano batutu batalanga mwingilo wa bapania, bamishonele, ne batadi ba kipindi bengila mu ntanda yobatala. Bateakanyanga bitango, bendeja mwingilo wa kūbaka Mobo a Bulopwe mapya, ne kutala shi mabuku atuminwanga bipwilo mwanda wa kuvuija bisakibwa byabo. Kintu kyonso kilongwa ku musambo, kilongelwanga mwanda wa kuvuija senene mwingilo wa busapudi.—1 Kodinda 14:33, 40.

• Le Komite wa Musambo ukwashanga’ko namani Kitango Kyendeji?

• Le i mingilo’ka ingilwanga ku bilo ya musambo?