Malondololo ku Bipangujo Byenu

◼ I muswelo’ka muyampe wa kutūla byabuntu bikakwasha batutu bafudilwe mu matanda makwabo?

Kyaba kimo, twivwananga amba banabetu mu ntanda kampanda badi mu bufudile shi pa mwanda wa kupangwapangwa, shi pa mwanda wa bimpengele, nansha bikoleja bikwabo. Banabetu bamo bekalanga na mutyima wa kutuma lupeto pityipityi ku musambo wa mu ntanda’ya, ne kulombola amba lupeto’lwa lwingidijibwe ku kukwasha bantu kamukaya, kipwilo kansangwa, nansha lūbako kampanda.​—2 Kod. 8:1-4

Shako kuta mutyima banabetu betabije mutyima uno muswelo i kuyampe, inoko divule bisakibwa bya kampeja-bukidi bikalanga bivule kutabuka ne bine bilanga yewa uleta lupeto. Kyaba kimo, bine byafwila kukwasha bikalanga padi ke bilongololwe kala. Bine, tukulupilei amba byabuntu byotutuma ku bilo bya musambo mwanda wa kukwasha mwingilo wa ntanda yonso, mukōlo wa lūbako lwa Mobo a Bulopwe, nansha kukukila boba batanwa na bimpengele, bingidijibwanga enka mu kukwasha bine byotutumine’byo.

Banabetu ba misambo yonso i balombolwe senene kukwasha lubilo lonka boba batanwa mu bufudile bwibafikila mu kitulumukila. Ne kadi musambo uyukijanga Kitango Kyendeji mwendela myanda yonso. Shi kudi bukwashi busakilwa’ko, Kitango Kyendeji kilombanga musambo wa kubwipi ukwashe’ko, nansha kadi kité kimanine mwingilo kitumininanga mukōlo ku musambo’wa.​—2 Kod. 8:14, 15.

O mwanda, byabuntu byonso, bikale bitala mwingilo wa ntanda yonso, lūbako lwa mu matanda makwabo, nansha kukwasha baponenwa na bimpengele bifwaninwe kutumwa ku musambo wa mu ntanda yoshikete’mo, pityipityi nansha kupityila ku kipwilo. Mu uno muswelo, “umpika wa binebine, udi na manwa,” kupityila ku mpangiko ya bulongolodi bwa Kitango Kyendeji, ukatala bisakibwa bya banabetu ba ntanda yonsololo monka mobyendele.​—Mat. 24:45-47; 1 Kod. 14:33, 40.