Kukwatakanya Mwingilo wa Bulopwe Kwenu ne Ntanda Yonso

BATUMONI BA YEHOVA i bafikije mwingilo wa myanda miyampe “ne kulakula kwine kwa ntanda” mwanda wa kufikidija bupolofeto bwa Yesu butala pa mafuku a mfulo. (Bil. 1:8; Mat. 24:14) Pa kwingila uno mwingilo, bapānanga na mutyima tō kitatyi ne bukomo bwabo mu kupāna bintu bya ku mushipiditu. Bakulupile mudi Yehova ukwatakanyanga bengidi nandi, kadi bendelelanga kutangidija Bulopwe bwa Leza kumeso mu būmi bwabo. (Mat. 6:25-34; 1 Ko. 3:5-9) Bipa bilupukile’ko bilombola patōka’mba Yehova wibetabije ne kwibesela.

KUKWATAKANYA TUMWENO TWA BULOPWE NTANDA YONSO

² Bantu bamo pobamonanga manwa etu a kusapula ne kuyuka’mba twabanyanga Mabible ne mabuku esambila pa Bible pampikwa kulomba bantu lupeto, beipangulanga’mba: “Le byonso’bi bibwanikanga namani?” Kunena na bubine, kutampa ne kulupula Mabible ne mabuku esambila pa Bible bilombanga lupeto luvule. Kadi kūbaka ne kulongolola mobo a Betele ashikete’mo bengidi bengila ku bitampilo, batala mwingilo wa busapudi, ne bengila mu miswelo mikwabo mwanda wa kwendeleja kumeso myanda miyampe nabyo bilombanga lupeto luvule. Ne kadi batadi ba bipindi, bamishonele, bapania ba pa bula, ne bengidi bakwabo ba pa bula ba mu mwingilo wa kitatyi kyonso bapebwanga’ko bukwashi bwa ku ngitu bamone muswelo wa kwendelela na mwingilo. Bibamweka patōka’mba mwingilo wa busapudi bwa myanda miyampe mu ano etu mafuku, ekale kwetu nansha ntanda yonso, ulombanga kulupula lupeto luvule mpata. Le luno lupeto lonso lutambanga kwepi?

³ Bavule basangela mwingilo wa bufundiji bwa mu Bible bwa Batumoni ba Yehova basangelanga kutūla byabuntu bya mwingilo wingilwa ntanda yonso. Inoko, mwingilo wetu ukwatakanibwanga dibajinji na Batumoni abo bene, bamo batumanga byabuntu bya na mutyima tō ku bilo ya musambo wa Batumoni ba Yehova wa kwabo. Balombolanga mushipiditu wa buntu pamo bwa bengidi ba Leza ba pa kala bāpēne byabuntu na mutyima tō bya kukwatakanya lūbako lwa kifuko kya kutōtela’po Yehova. (Div. 35:20-29; 1 Bi. 29:9) Kudi byabuntu bimo bya lupeto luvule bipyanikwanga bulongolodi, ino byabuntu bikwabo nabyo bitūlwanga na bantu, bipwilo, ne bipindi, bino bikalanga divule bya lupeto lutyetye. Shi bino byabuntu bibakongakanibwa pamo, bikwashanga kwendeleja nyeke mwingilo.

⁴ Batumoni ba Yehova bamwene amba i dyese kwingidija lupeto lwabo ne bintu bikwabo bya ku ngitu mwanda wa kwendeleja mwingilo wa busapudi kumeso. Yesu ne bandi bana ba bwanga bādi na kasanduku ka lupeto mobādi basela lupeto lwa kwingidija. (Yoa. 13:29) Bible witulombola bana-bakaji bāingidile Yesu ne bandi bana ba bwanga. (Mako 15:40, 41; Luka 8:3) Mutumibwa Polo wāitabije na mutyima wa kufwija’ko bukwashi bwa ku ngitu bwa buswe bwādi bumupa boba bādi basaka kwendeleja myanda miyampe kumeso ne bādi basaka kulunga kuboko ku mwingilo wandi. (Fid. 4:14-16; 1 Tes. 2:9) Batumoni ba Yehova balondanga nyeke bino bimfwa bya kala bya kwingila na bupyasakane ne kupāna na mutyima tō. O mwanda twi babwanye kupāna “mema a būmi ku bitupu” ku bantu ba mityima yampikwa budimbidimbi konso kobatanwa.​—Kus. 22:17.

KUKWATAKANYA BISAKIBWA BYA KIPWILO KYA PENU

⁵ Lupeto lulupula kipwilo kya penu lutambanga ku byabuntu bya na mutyima tō. Kekuloñwangapo mikongo ya lupeto; nansha kupityija lubenji, nansha kya mulambu. Ino kutūlwanga tumasanduku twa byabuntu ku bifuko bipwidilwa’ko mwanda wa muntu ne muntu apāne “mwafwatakenya mu mutyima wandi.”​—2 Ko. 9:7.

⁶ Lupeto lutūlwa lwingidijibwanga bidi ku mingilo ya ku Njibo ya Bulopwe ne kwiilongolola. Kitango kya bakulumpe kikokeja kutyiba mbila ya kutuma lupeto lumo ku bilo ya musambo wa Batumoni ba Yehova wa kwabo lwa kwendeleja mwingilo wa ntanda yonso. Shi bidi namino, kipwilo kifwaninwe kutyipa lukwembo. Mu uno muswelo, bipwilo bivule bitūlanga kitatyi ne kitatyi byabuntu bya mwingilo wa ntanda yonso. Shi bonso batele mutyima ku bisakibwa bya kitatyi ne kitatyi, kebikalombepo kwela misapu kyaba ne kyaba ya kulomba byabuntu.

MWA KWINGIDIJIJA BYABUNTU

⁷ Kupwa kupwila ne kupwila, batutu babidi bomonanga lupeto lonso lutūdilwe mu tumasanduku twa byabuntu, kupwa belulemba. (2 Ba. 12:9, 10; 2 Ko. 8:20) Kitango kya bakulumpe kikakwata mpangiko miyampe ya kulama ino mikōlo ya lupeto enka ne byoitumwa ku bilo ya musambo nansha kwingidijibwa ku bisakibwa bya kipwilo. Tutu wimanine lubalo lwa kipwilo uteakanyanga’ko lapolo ya kuyukija kipwilo kweji ne kweji, kadi kyaba kyonso kupwa kwa myeji isatu, mukwatakani wa kitango kya bakulumpe ukakwata’ko mpangiko ya kubandaula lubalo.

LUPETO LULUPULA KIPINDI

⁸ Lupeto lwa kulonga nalo bitango ne lukwabo lulupulanga kipindi, lutambanga ku byabuntu bitūla Batumoni ba mu kipindi’kya. Tumasanduku twa byabuntu tutūlwanga ku mobo a bitango mwanda wa kutūla byabuntu bya kwilanga bya kipindi. Ne kadi, pa kwikala na lupeto lwa kulupula monka, bipwilo bibwanya kutūla’ko byabuntu mu bitatyi bikwabo.

⁹ Mungya buluji, bipindi bifwaninwe kwaluja lupeto lulupulwa, mukōlo wa lupeto ushala’ko bakatūla’o bu byabuntu bya mwingilo wa ntanda yonso. Shi kekudipo mukōlo mubwane mu lubalo lwa kipindi, wa kufuta lupeto lwalupwilwe ku kitango kyapityile nansha wa kufuta ku kitango kilonda’ko, kimfwa lupeto lulombwa pa kulama njibo ya bitango, mutadi wa kipindi ukokeja kuyukija bipwilo madyese obidi nao a kupāna byabuntu. Kitango ne kitango kya bakulumpe kikabandaula uno mwanda ne kuyuka i kyabuntu’ka kikapāna kipwilo kyabo ku mukōlo wa kipindi. Bakapwa uno mwanda na kutyipa lukwembo.

¹⁰ Shi kubaikala myanda ilomba lupeto kadi ilomba kutebwa mutyima na bakulumpe badi mu kipindi, bakulumpe ba mu kipindi bakalonga lenyo mu difuku dya kitango kya kipindi. Butyibi bonso, kutalula’mo bobwa bwa lupeto lulupulwanga na kipindi, bufwaninwe kukwatwa na lukwembo lutyipilwe na bakulumpe. Luno lukwembo lufwaninwe kulembwa na kulombola buvule bupotoloke bwa lupeto kadi lufwaninwe bidi kwitabijibwa ponso pomusaka kusela mu mukōlo wa kipindi.

¹¹ Kukakwatwa mpangiko ya kubala kyaba kimokimo lubalo lwa kipindi.

KUTA BALANDA MUTYIMA

¹² Kitungo kimo kyātūdilwe’ko kasanduku ka lupeto kādi kalaminwe na Yesu ne bandi bana ba bwanga i kukwasha balanda. (Mako 14:3-5; Yoa. 13:29) Kino kiselwa kya bwine Kidishitu kikyendelela, mwanda Yesu wānenene amba: “Balanda mudi nabo mafuku onso.” (Mako 14:7) Le Batumoni ba Yehova baselanga kino kiselwa namani dyalelo?

¹³ Dimodimo, banabetu ba kikōkeji badi mu kipwilo bakokeja kusakilwa bukwashi bwa ku ngitu pa mwanda wa bununu, bulema, nansha makambakano makwabo ebapita kipimo. Ba kisaka, babutule, ne bantu bakwabo bayuka bino bisakibwa, mutyima ubwanya kwibatonona balonge’po kintu. Kulonga namino kukwatañene na binenwa byānenene mutumibwa Yoano amba: “Yewa ense udi na bintu bya mu ino ntanda, umona mwanabo mufudilwe, ino wapela kumwivwanina lusa, le buswe bwa Leza budi nyeke mwadi namani? Twanwe twana tutyetye, ketufwaninwepo kusanswa na binenwa ne ludimi bitupu, ino tusanswei na bilongwa ne bubine.” (1 Yo. 3:17, 18; 2 Ts. 3:6-12) Butōtyi bwa bine bulomba ne kukwatakanya banabetu ba kikōkeji basakilwa bukwashi ku ngitu.​—Yak. 1:27; 2:14-17.

¹⁴ Mutumibwa Polo, paātumīne Temote mukanda wandi umbajinji, wāshintulwile muswelo ukokeja kukwashibwa boba basakilwa bukwashi. Ukokeja kutanga madingi andi mu 1 Temote 5:3-21. Mwine Kidishitu yense ye mwinē kiselwa kya kusasaketa ba mu njibo yandi. Banunu nansha balemane bafwaninwe kukwashibwa na babo bana, bankana, nansha na babutule ba pabwipi. Kyaba kimo bukwashi bwa ku ngitu buletwanga na Leta nansha na bitango bya bukwashi, nanshi babutule ne bakwabo bakokeja kukwasha bafudilwe balombe buno bukwashi. Makambakano amo abwanya kulupuka alomba kipwilo kyonso kibandaule i bukwashi’ka bobakakwasha batutu ne bakaka bafudilwe baingile bininge mingilo na kikōkeji. Shi kekudipo ba kisaka nansha babutule bakwabo ba kwibakwasha ne shi Leta ne bitango bya bukwashi kebibakwashangapo mobifwaninwe, nankyo kitango kya bakulumpe kikokeja kukwata’ko mpangiko myendele’mo ya kuleta’ko bukwashi kampanda. Bene Kidishitu bamonanga’mba kwiabila bintu byabo bya ku ngitu na bano bafudilwe i dyese.

¹⁵ Batutu ne bakaka bavule bakokeja kuponena mu bufudile pa mwanda wa kupangwapangwa, mavita, kutenkana kwa ntanda, malobe, bipupo bya nzala, nansha binzengele bikwabo bivudile mu bino bitatyi bya malwa. (Mat. 24:7-9) Bipwilo bya penu bibwanya kubulwa bintu bya kwikwasha nabyo abo bene na bene, o mwanda Kitango Kyendeji kikwatakanyanga bukomo bulonga banabetu ba konsokonso bwa kuleta bya bukwashi bisakibwa. Bino i biifwane na byālongele bene Kidishitu ba mu Azia Minele bāpele banabetu ba mu Yudea byakudya mu kitatyi kya kipupo kya nzala. (1 Ko. 16:1-4; 2 Ko. 9:1-5) Shi tulonde kimfwa kyabo, nankyo tubamwekeja buswe botuswele banabetu ne kwilombola’mba twi bana ba bwanga ba bine ba Yesu Kidishitu.​—Yoa. 13:35.

KWABANYA MABUKU

¹⁶ Mabible ne mabuku esambila pa Bible engilanga mwingilo mukatampe mu kusambakanya musapu wa Bulopwe. Divule mwingidi wa mingilo ye upēbwanga na kitango kya bakulumpe kutala mabuku a kipwilo a kwabanya. Batutu bapebwa mwingilo wa kutala ano mabuku baselanga kiselwa kyabo na kusumininwa. Bakalemba myanda senene pa kusaka’mba mabuku alaminwe engidijibwe mwanda wa bisakibwa bya kipwilo.

¹⁷ Byotudi bene Kidishitu bepāne, tuyukile amba kitatyi kyetu, ñeni yetu ne byabupeta byetu bya ku ngitu, bwino bwetu, bituntwa byetu, enka ne būmi bwetu bwine i byabuntu bitupele Leza kadi bifwaninwe kwingidijibwa mu mwingilo wandi. (Luka 17:10; 1 Ko. 4:7) Shi twingidija biyampe byabupeta byetu byonso, nabya tubalombola buswe bukatampe botusenswe Yehova. Tudi na mutyima wa kulēmeka Yehova na bintu byetu bya bulēme, mwanda tuyukile amba usangelanga kyabuntu kyo-kyonso kipānwa mwanda wa kulombola kwipāna kotwipēne na muya wetu onso. (Nki. 3:9; Mako 14:3-9; Luka 21:1-4; Kol. 3:23, 24) Yesu wānenene amba: “Mubatambula ku bitupu, nenu pānai ku bitupu.” (Mat. 10:8) Potwipāna ne kupāna bintu byetu mu mwingilo wa Yehova, netu twikalanga na nsangaji mivule.​—Bil. 20:35.