Batadi Bendakana​—⁠Bengidi Netu mu Bubinebine

Mu kipwilo kya myaka katwa imbajinji, mwādi batadi bādi benda bapempula bipwilo mwanda wa kwibitamija. Bādi bēpene abo bene, pampikwa kukimba kamweno ka abo bene, mwanda wa bamone muswelo wa kukwasha bantu mu bipwilo bekale nyeke na mwiendelejo mulumbuluke ku meso a Leza.​—⁠Bilongwa 11:23, 24; 14:21, 22; 15:32; 20:​2, 31-35; Fidipai 2:​20-22, 29; 1 Tesalonika 2:​5-12.

Dyalelo nadyo, bipwilo bya ba Tumoni twa Yehova bitambulanga bukwashi butamba ku batadi bendakana. Bano bana-balume badi na bwino bwa umbula bwa myaka mivule mu mwingilo wa busapudi wa ba Tumoni twa Yehova ne mu wa bukumbi. I bashiye mingilo yabo ya makasa ne biselwa bya kulela balongo babo mwanda wa kwipānina mu mwingilo wa kitatyi kyonso. Ku boba basonge, pavule ne babo bakaji bene nabo bēpānanga mu mwingilo wa kitatyi kyonso pamo na babo balume.

Mutadi wa kipindi i mupēbwe kutala kipindi kidi na bipwilo kubwipi kwa 18 kufika ne ku 25. Upempulanga kipwilo ne kipwilo kidi mu kipindi kubwipi kwa misunsa ibidi pa mwaka, kupwa kwa myaka ibidi nansha isatu, wapebwa kipindi kikwabo. Mu uno muswelo, bipwilo bikokeja kumwena mu bwino ne mu manwa a batadi ba bipindi beshileshile.

Mutadi wa kipindi ubandaulanga ngikadilo ya kumushipiditu ya kipwilo ne mingilo yakyo. Upityijanga bishinte bivule pa kipwilo ne kwibungila pamo na bakulumpe ne bengidi ba mingilo mwanda wa kubandaula muswelo obakokeja kwilemununa mu mingilo yabo ya pa kipwilo.

Umbula bwa yenga wa bupempudi, aye pamo ne mukajandi, shi i musonge, batwalanga ba Tumoni ba pa kipwilo umbusapudi, bebakwasha na kwibalombola mwa kwilemunwina mu mwingilo wabo wa ku njibo ne njibo. Aye pamo ne mukajandi bapempulanga ne bantu basangela musapu bakidi bapya mwanda wa kwibakankamika mu lwitabijo. Nobe ubwanya kulomba baye kukupempula.

Mutadi wa distrike nandi i mubwanye bisakibwa bya kumushipiditu bya muswelo umo onka ne bwino mu mwingilo. Upempulanga kipindi ne kipindi, wimaninanga mingilo ya kubungakana kwa bipindi. Aye ne mukaji wandi nabo bengilanga ne mwingilo wa busapudi na ba Tumoni ba pa kipwilo kimo kya mu kipindi kyobapempula’kya. I aye utalanga kwiteakanya konso kwamfulo kutala pa mpangiko ya kubungakana kwa kipindi, kadi uletanga bishinte bishileshile umbula bwa kubungakana, kubadila’mo ne kishinte kya bantu bonso.

Shi ekale batadi bendakana abavuya bwabo bupempudi mu kipwilo nansha mu kipindi kampanda, bendelelanga na kukapempula kikwabo, balondanga’nka mpangiko ya muswelo umo, kufika ne pakapempulwa bipwilo byonso nansha bipindi byonso umbula bwa myeji kubwipi kwa isamba; ebiya bashilula kadi monka.

Mu matanda mavule, batadi bendakana bendanga na motoka, pakwabo bendanga na bipungwa bya ñendo biselwanga’mo bantu bonso. Mu matanda makwabo bendanga lwa nkinga, pakwabo nansha lwa panshi. Sosiete ufutanga ñendo yonso ya mutadi wendakana ne kwibapa, aye ne wandi mukaji, lupeto lutyetye lwa kwikwasha nalo. Pavule, mutadi wendakana pamo ne wandi mukaji bapebwanga njibo ya kufikila’mo ne bidibwa na basapudi ba pa kipwilo ne kipwilo.

Uno mwingilo ulombanga mushipiditu wa kwipāna kwabinebine. Batadi bendakana ne babo bakaji, kitungo kyabo i kusaka kukwasha bipwilo pakubulwa kwibitwika kiselwa kilēma.​—⁠1 Tesalonika 2:9.

• Batadi bendakana ba mu myaka katwa imbajinji lelo bādi na kitungo’ka?

• Le batadi bendakana bafikilanga pa kufwaninwa ne kutwela mu uno mwingilo namani?

• Shintulula mwikadile mwingilo wa batadi ba bipindi ne ba madistrike, ne badi na būmi bwa muswelo’ka.

[Kapango pa paje 20]

Mutadi wa distrike upityija kishinte ku kubungakana kwa kipindi

[Kapango pa paje 21]

Batadi ba bipindi baletanga bulombodi butala pa busapudi bwa ku njibo ne njibo, besambanga na bakulumpe ba pa kipwilo, bapempulanga befundi ba Bible ne bapya mu kusangela musapu, ne kupityija bishinte mu bipwilo