Kokikala Ngivi Nansha Dimo!

LELO ke bapwe kala kukwiba kintu kampanda?—Le weivwene namani?—Yewa wakwibile’kyo i ngivi, ne kadi i kutupu muntu usenswe ngivi. Le ulanga amba muntu wikalanga ngivi muswelo’ka? Le ubutukanga kala ngivi?—

Twafundile’nka panō amba bantu babutukanga na bubi. Nanshi batwe bonso twi bampikwa kubwaninina. Ino i kutupu muntu ubutukanga ngivi. Ngivi ukokeja kutamba mu kisaka kiyampe. Bandi bambutwile, banababo bana-balume ne bana-bakaji bakokeja kwikala bampikwa budimbidimbi. Inoko kilokoloko kyandi kya kusakasaka bintu pamo bwa lupeto ne bintu bipotwa na lupeto kikokeja kumwikadija ngivi.

Molangila le ngivi mubajinji i ani?—Tulange’po bidi. Mufundiji Mukatampe, paādi ukidi momwa mūlu, wādi kala muyuke uno muntu. Mwine ngivi’o wādi mwikeulu. Ino Leza wālongele bamwikeulu bonso babwaninine, le penepo kadi yao mwikeulu wāikele ke ngivi muswelo’ka?—Eyo, pamo’nka na motwefundile mu Shapita wa 8 wa dino dibuku, wādi kakimbe kintu ke kyandipo. Lelo ukivulukile amba kyādi i kika?—

Leza pa kupwa kupanga mwana-mulume umbajinji ne mwana-mukaji umbajinji, yao mwikeulu wādi kasake bamutōte aye. Kebādipo bafwaninwe kumutōta aye. Butōtyi bwabo bwādi bwa kutōta Leza kete. Ino wāibile’bo! Paāfikije ba Adama ne Eva kumutōta aye, yao mwikeulu wāikele ke ngivi. Wāikala ke Satana Dyabola.

Le i kika’le kyāfikije uno muntu ku kwikala ngivi?—I kilokoloko kya kusaka bintu bya bene. Kino kilokoloko kibwanya kubaya ne kwalamuna nansha ke bantu bayampe nabo balonga bintu bibi. Kitatyi kimo, bantu bekalanga ke bangivi kebālamukangapo nansha dimo pa mutyima nansha kulonga monka biyampe. Ye mwāikadile mutumibwa umo wa Yesu. Dijina dyandi i Yudasa Isakadiota.

Yudasa wādi uyukile’tu amba i bibi kwiba mwanda wāfundijibwe Bijila bya Leza tamba ukidi mwanuke. Wādi uyukile’tu amba difuku dimo Leza wānene Aye mūlu ne kusapwila bantu bandi amba: “Kokeba, mhm.” (Divilu 20:15) Yudasa pa kutama, wētene na Mufundiji Mukatampe, penepo wāalamuka ke wandi mwana wa bwanga. Mafuku pa kupita’po, Yesu wāfikila enka ne pa kutonga Yudasa wāikala ke umo wa mu bandi batumibwa 12.

Yesu ne batumibwa bandi bādi benda pamo. Bādi badīla bidibwa byabo pamo. Kadi lupeto lonso lobādi bamona lwādi lubikwa mu kasanduku. Yesu wāpele Yudasa kasanduku’ka amba ekalame. Inoko lupeto’lwa kelwādipo lwa Yudasa. Ino le uyukile byālongele Yudasa mafuku pa kupita’po?—

Yudasa wāshilwile kwiyatyila lupeto mu kasanduku’mwa kwampikwa kupebwa kishima. Wādi uyata’mo shi bakwabo kebamwenepo, kadi wādi kakimbe ne mashinda a kumona lupeto luvule kupita. Wāshilula kulanga’nka myanda ya lupeto kitatyi kyonso. Pano tutale kwāmufikije kino kilokoloko kibi mafuku matyetye’tu kumeso kwa Mufundiji Mukatampe kwipaibwa.

Madia, mwanabo na Lazalasa mulunda na Yesu, wāyatyile māni malumbuluke mpata wāpungulwila’o pa maulu a Yesu. Ino Yudasa wātompola. Le uyukile kyaādi utompwela?—Wānena amba ano māni ādi afwaninwe nansha kupotejibwa ne lupeto’lwa lwapebwa balanda. Inoko kyaādi usaka i kwikala na lupeto luvule mu kasanduku mwa kwibila’lo.—Yoano 12:1-6.

Yesu wāsapwila Yudasa amba kakikambakanya Madia, mwanda wādi na mutyima muyampe mpata. Yudasa kāsangedilepo bino byāmunene Yesu, o mwanda wāendele kudi babitobo bakatampe, bādi balwana na Yesu. Bādi bakimba kukwata Yesu, ino bādi basaka bamukwate bufuku kutyina amba bantu bakebamona.

Yudasa wāsapwila babitobo amba: ‘Shi mumpe lupeto nkemusapwila muswelo wa kukwata Yesu. Le mukampa inga?’

Babitobo nabo bāmulondolola’mba: ‘Tukakupa bityele makumi asatu bya ndalama.’—Mateo 26:14-16.

Yudasa wāsela lupeto’lwa. Byādi pamo’nka bwa aye wāpoteje Mufundiji Mukatampe kudi boba bantu! Lelo ubwanya kufwatakanya amba muntu ukokeja kulonga kintu kibi kidi namino?—Eyo, ye mobikadilanga shi muntu waalamuka ke ngivi, kaibe ne lupeto. Uswanga lupeto kutabuka ne mwaswidile bantu bakwabo nansha ke mwaswidile Leza mwine.

Padi usa kunena’mba, ‘Ami nkibwanyapo kuswa nansha dimo kintu kampanda kutabuka’ko monswelele Yehova Leza.’ Shi ulanga nankyo i biyampe. Yesu paātongele Yudasa ekale mutumibwa, kepabulwe padi ne Yudasa nandi wādi ulanga uno muswelo. Bakwabo bāalamukile ke bangivi nabo bādi padi balanga enka nankyo. Pano twisambile’ko bidi pa bamobamo.

Umo wādi mwingidi wa Leza wa dijina dya bu Akana, wāikele’ko pa kalā ne Mufundiji Mukatampe mwine kābutwilwe. Akana wāmwene mutwelo muyampe, ludimi lwa nsahabu, ne bityele bya ndalama. Kebyādipo byandi. Bible unena amba byādi bya Yehova mwanda byāselelwe ku balwana na bantu ba Leza. Ino Akana wāabile’byo mpata ne kwiba wāiba’byo.—Yoshua 6:19; 7:11, 20-22.

Tala kimfwa kikwabo. Tamba kalā, Yehova wātongele Davida kwikala mulopwe wa bene Isalela. Difuku dimo, Davida wāshilula kubandila mwana-mukaji wa buya bwa dyangi, Bafesheba. Wābambila Bafesheba meso sō kalanga kumuselela ku njibo yandi akekale nandi bu mukaji. Inoko, wādi mukaja Udia. Le Davida wādi wa kulonga kika?—

Davida wādi wa kuleka kulanga bya kuyata Bafesheba. Ino kālongelepo nankyo. Penepo Davida wāmuselela ku njibo. Kupwa wāipaija ne Udia mwine. Le i kika kyālongeje Davida bintu bibibibi namino?—Mwanda wāendelele kwabila mukaja bene.—2 Samwele 11:2-27.

Davida byaēsashile, Yehova wāmulekele mūmi. Inoko tamba penepa Davida wātenwe na bikambija bivule. Wandi mwana Abisalome wādi kasake kubikula Davida amupingakane bu mulopwe. Wādi ulonga namino: shi muntu waiya kumona Davida, Abisalome wādi olola maboko andi wāmufumbakanya ne kumwimuna na kumufifya milomo. Bible unena amba: ‘Abisalome waiba mityima ya bantu ba Isalela.’ Wāalamuna bantu bekale na mutyima wa kumusaka aye bu mulopwe pa kyaba kya Davida.—2 Samwele 15:1-12.

Lelo nobe kodi musake kwikala na kintu kipite bukata na mwālongele ba Akana, Davida, ne Abisalome?—Shi kintu’kya i kya bene, kusela’kyo kwampikwa lupusa i kwiba. Lelo ukivulukile kyādi kisaka yewa ngivi mubajinji, Satana?—Wādi usaka bantu bamutōte aye pa kyaba kya kutōta Leza. Nanshi Satana wāibile pa kwalamuna ba Adama ne Eva bamukōkele.

Shi muntu udi na kintu kyandi, i aye mwine udi na lupusa lwa kupāna’kyo. Kimfwa, ukokeja kukakaila na bakwenu mu yabo njibo. Lelo i biyampe kusela’mo shi kintu’ka shi kintu’ka ne kwenda nakyo mu yenu njibo?—Mhm, ukasela’kyo poso shi shabo nansha inabo wakusapwila amba sela’kyo. Ino shi usele kintu kampanda mu njibo kwampikwa kulomba, bwabo i bwivi.

I kika kinenenwa amba nobe ukokeja kwikala na mutyima wa kwiba?—I shi wabila kintu ke kyobepo. Nansha shi i kutupu muntu ukumwene posela’kyo, le i ani ukumwene?—I Yehova Leza. Kadi tufwaninwe kuvuluka amba Leza ushikilwe bwivi. Nanshi buswe bwa kuswa Leza ne mukwenu bo bukakukwasha uleke kwikala ngivi nansha dimo.