“Kōkela Bidi Diwi dya Yehova”

1, 2. Boba balonda enselele mu “dishinda dyandi” bekalanga divule na ngikadilo ya muswelo’ka, ne mwanda waka ufwaninwe kwishila nabo?

KUKŌKELA i kusakane mu ntanda ya dyalelo. Bavule kebalondangapo nansha ke musoñanya wa bantu bonso, kimfwa wa amba ‘Longa kyoloke.’ Inoko, tubwanya kunena mu kīpi amba milangwe yabo i ya ‘Longa kyosaka’ nansha amba ‘Longa kyokya kikupēlela.’ Kimfwa, bashofele bajilulanga biyukeno bya mu mashinda, bampeta bajilula bijila bitala lupeto, balupusa nabo batyumunanga bijila enka ne byobatūdile’ko abo bene. Dyalelo kubavula bantu beendeja muntu enselele mu “dishinda dyandi,” nansha shi i dibi dileta makambakano, mo monka mobyādi bikadile ne mu mafuku a Yelemia.​—Yel. 8:6

² Ubamone amba boba basaka kwitabijibwa na Leza Mwine bukomo bonso, kebafwaninwepo kulonda enselele mu “dishinda dyandi,” ditabijibwe na bavule. O mwanda mwine, Yelemia wātelele kwishila kudi pa bukata bwa boba “kebakōkelepo diwi dya Yehova” ne boba bāsakile kumukōkela. (Yel. 3:25; 7:28; 26:13; 38:20; 43:4, 7) Umo ne umo ufwaninwe kwibandaula shi udi ku mutamba’ka mu uno mwanda. Mwanda waka? Bulwi bwa Satana bwa kōna bululame bwa batōtyi ba bine pano bubanane. Udi pamo bwa nyoka ufyeme ubenza kikwatwa mwa kwikisumina mu kitulumukila. Kusumininwa kotusumininwe kukōkela diwi dya Yehova kwitukwashanga tunyeme meno a bulembe a nyoka. Ino i muswelo’ka otukaningisha mutyima wetu wa kukōkela Yehova? Bilembwa bya Yelemia biketukwasha pa kino.

MWINE OTUFWANINWE KUKŌKELA

3. Mwanda waka tufwaninwe kukōkela Yehova?

³ Mwanda waka tufwaninwe kukōkela Yehova mu byonso? Yelemia ulombola bubinga bumo na kumutela bu “walongele panopanshi ne bukomo bwandi, wakomeja panopantanda ne bwino bwandi.” (Yel. 10:12) Yehova ye Mubikadi wa diulu ne ntanda. Tufwaninwe kumutyina kutabuka balopwe bakwabo bonso. Udi na lupusa lwa kwitunena tulonde bijila byandi biyampe, byotukokeja kumwena’mo nyeke.​—Yel. 10:6, 7.

4, 5. (a) Le i bubinebine’ka bwāfundile Bayuda mu bitatyi bya mulanga? (b) Lelo bekadi ba mu Yuda bādi basupakanya namani “mema a būmi” ādi ebapa Yehova? (c) I muswelo’ka okokeja kutoma “mema a būmi” atamba kudi Leza?

⁴ Inoko, Yehova nansha byadi Mubikadi wa Diulu ne Ntanda, i Mukwatakani wa būmi​—ke būmi bwetu kadi. Kino kyāmwekele patōka ku Bayuda ba mu mafuku a Yelemia. Ntanda ya Edipito yādi ikwashibwa bininge na munonga wa Nile, inoko ngikadilo yādi mishile mu Ntanda ya Mulao. Pakatampe pene bantu ba Leza bādi bamwena mu bitatyi bya buyo, divule balama mema a mvula mu byumbu bya panshi. (Kup. 11:13-17) Enka Yehova kete ye wādi ubwanya kunokeja mvula ne kubombeja nshi amba ipe bipa. Kadi wādi ukokeja kukankaja mvula keyakinoka. O mwanda mu mafuku a Yelemia, Bayuda bampikwa kikōkeji bemwenine mu bitatyi bivule mulanga wa malwa wāfumbije madimi ne mañanza, mishimwa yabo ne byumbu bine byauma.​—Yel. 3:3; 5:24; 12:4; 14:1-4, 22; 23:10.

⁵ Nansha byādi bimwene Bayuda amba mema ādi na mvubu, ino bāpelele “mema a būmi” ādi ebapa Yehova ku buntu bitupu. Bāpelele’o na kuleka kukōkela Bijila bya Leza ku kusaka ne kukulupila mu kipwano kyobāsambile na mizo yādi ibajokolokele. Bādi pamo bwa bantu bela mema mu byumbu, bisūma mu kitatyi kisakene mema, Bayuda nabo bāsusukile ku byalupukile’ko. (Tanga Yelemia 2:13; 17:13.) Bine, tudi na bubinga bwa kuleka kwiletela byamalwa batwe bene na kwiendeja uno muswelo. Yehova wendelelanga kwitupa buludiki buvule kupityila ku Kinenwa kyandi kya ku bukomo bwa mushipiditu. I kimweke patōka amba, tukamwena mu ano “mema a būmi” enka shi twifunda’o kitatyi ne kitatyi ne kulonga bukomo bwa kwingidija’o mu būmi bwetu.

6. (a) Shintulula mwikadilo wa Mulopwe Zedekia pa bitala kukōkela Yehova. (b) Molangila, mwanda waka mulopwe wābudilwe tunangu?

⁶ Pādi penda pafwena difuku dya Leza dya kulandula mambo kudi Yuda, po pene pāikele kikōkeji na mvubu mikatampe. Muyuda umo ne umo pa kusaka kwitabijibwa ne kukingwa na Yehova, wādi ufwaninwe kwisāsa ne kushilula kumukōkela. Mulopwe Zedekia wādi utalwa na uno mwanda. Kādipo wimanije mu kulonga byoloke. Bandi bantu pa kumulombola amba basakanga kwipaya Yelemia, wābudilwe bukankamane bwa kwibakankaja. Enka na motwekimwena mu shapita ushele kunyuma, mupolofeto wākūdilwe na Ebede-meleke ku bādi bakimba kumwipaya; kupwa wāmwisashila Zedekia amba: “Kōkela diwi dya Yehova.” (Tanga Yelemia 38:4-6, 20.) Nanshi, pa kusaka bimwikadile biyampe, mulopwe wādi ufwaninwe kushinta milangwe yandi: Le wādi wa kukōkela Leza?

KUKŌKELA YEHOVA I MWANDA WA KAMPEJA-BUKIDI

7. Le i ngikadilo’ka imo imo ibwanya kutūla kikōkeji kyobe pa ditompo?

⁷ Dyalelo kikōkeji kidi na mvubu monka mokyādi kikadile mu mafuku a Yelemia. Lelo usumininwe kukōkela Yehova? Shi Diteba dya Entelenete dya bantu badi mutaka dibakumwekela mu kitulumukila, le ukendelela kubandila’dyo’ni nansha ukakōmena dino ditompo na kushita dino diteba? Le bikekala namani shi muntu wampikwa kwitabija wa ku kaji nansha ku masomo wakusake? Le ukekala na bukomo bwa kupela? Le usangelanga mabuku a batupondo ne mateba a Entelenete’ni nansha wibipelanga? Tá mutyima ku binenwa bya Yelemia 38:20, potanwa mu ngikadilo ya uno muswelo nansha mikwabo.

8, 9. (a) Mwanda waka i biyampe kwimvwana bakulumpe po basaka ku kudingila? (b) Le ukamona namani kudingilwadingilwa na bakulumpe?

⁸ Divule Yehova wādi utuma Yelemia ku bantu bandi mwanda wa kwibadyumuna amba: “Alukai muntu ense ku dishinda dyandi dibi, ne kulongolola bilongwa.” (Yel. 7:3; 18:11; 25:5; tanga Yelemia 35:15.) Mo monka, bakulumpe Bene Kidishitu dyalelo, baloñanga bukomo bwa kukwasha banababo betabije badi mu kyaka ku mushipiditu. Shi kyaba kimo bakulumpe bakupa madingi atala kwepuka mwiendelejo wampikwa kwendela’mo nansha mubi, wibevwane. Kitungo kyabo kidi pamo na kya Yelemia.

⁹ Bakulumpe bakokeja kukuvuluja misoñanya ya mu Bisonekwa yokebadi bakulombole kala. Yuka’mba kudingila mwanā bwa inobe i kūmwa mu meso, ne bikomanga nakampata kudingilañana shi mwine ukwashibwa udi na ngikadilo na ya Bayuda bādi bateja Yelemia. Tompa kumona bukomo bulonga bakulumpe kitatyi ne kitatyi mwanda wa kukukwasha bu kilomboji kya buswe bwa Yehova. Kadi vuluka’mba, Yelemia kādipo usakilwa kupitulukapituluka mu bidyumu shi bantu bādi balonda’byo. Bine, muswelo wa kwepuka kudingilwadingilwa, i na kwingidija madingi nakampeja-bukidi.

YEHOVA ULEKELANGA​—NA MUTYIMA TŌ, INO KE BULEKELELEKELEPO

10. Mwanda waka Yehova kalekelangapo bubi bulekelelekele?

¹⁰ Ketukokejapo kukōkela Yehova mu muswelo mubwanine mu ino ngikadilo ya bintu, inoko tuloñanga bukomo bwa kukōkela. O mwanda tumufwija’ko pa mutyima wadi nao wa kwitulekela kutupatupa kwetu. Inoko, kalekelangapo bubi bulekelelekele. Mwanda waka? Mwanda bubi i kya munyanji kudi Yehova. (Is. 59:2) Pa kino, usakanga kuyuka shi bine twi bafwaninwe kulekelwa.

11. Mwanda waka kebikokejikapo kufya fyē bubi bulongelwa kufula?

¹¹ Monka motwekimwena kala, Bayuda bavule mu mafuku a Yelemia bādi na kibidiji kya kubulwa kukōkela Leza mwanda’po amba udi na kitūkijetyima ne lusa. Le bikokejika mwingidi wa Leza dyalelo kwikala na ino ngikadilo? Eyo, shi upumpunya bivulujo bya Yehova ne kulongalonga bubi. Kyaba kikwabo, kino kimwekanga patōkelela, kimfwa shi muntu weela mu busongi bwa makoji. Nansha shi bubi kebumwenwepo na bantu, yewa uleka kukōkela Yehova witūlanga mu kyaka. Muntu udi kulu mu dishinda kulu mu biyombo ukokeja padi kulanga amba, ‘I kutupu usa kuyuka.’ Ino bubine i buno amba, Leza umonanga milangwe idi munda mwetu ne mu mutyima kadi ukokeja kumona bipita munda mwa njibo mishite. (Tanga Yelemia 32:19.) Le i bika bifwaninwe kulongwa shi muntu kakikōkelelepo Leza bya binebine?

12. Le i bika bifwaninwe kulonga bakulumpe kyaba kimo mwanda wa kulama kipwilo?

¹² Bayuda bavule bafutulwile bukwashi bwādi buleta Yehova kitatyi ne kitatyi kupityila kudi Yelemia. Dyalelo nadyo muswelo umo onka, muntu ukokeja kulonga bubi bukatampe kwisāsa mpika, ne kupela bukwashi bwa bakulumpe. Pa kino, bakulumpe bakalonda buludiki bwa mu Bisonekwa mwa kulamina kipwilo na kupanga nonga-bibi’wa. (1 Kod. 5:11-13; tala kapango “Bantu Bampikwa Mukanda wa Bijila,” pa paje 73.) Ino le kino kishintulula’mba kubapu kakibwanyapo kujoka monka ne kwitabijibwa na Yehova? Mhm. Bene Isalela bātombokele kitatyi kilampe; ino Leza wādi’nka wibanena’mba: “Jokai banwe bāna bashetemuka, ami nkōndapa kushetemuka kwenu.” (Yel. 3:22)a Yehova witanga banonga-bibi bajokele kwadi. Na bubine, wibanenanga balonge namino.

KŌKELA YEHOVA NA KUJOKELA KWADI

13. Shi muntu usaka kujokela kudi Yehova, i bika byafwaninwe kwitabija?

¹³ Shi muntu usaka kujokela kudi Leza, na mwānenene Yelemia, i biyampe eipangule’mba, ‘Lelo kyo nalonga i kika, a?’ Ebiya, mungya misoñanya ya mu Bisonekwa, ufwaninwe kwitabija malondololo ampikwa budimbidimbi. Bayuda bampikwa kwisāsa bāfutulwile kino kipangujo. Bāpelele kwitabija bukatampe bwa bubi bwabo, o mwanda Yehova kēbafwidilepo lusa—kādipo wa kwibafwila’lo. (Tanga Yelemia 8:6.) Inoko, nonga-bibi wisāsa witabijanga amba wafutulwije dijina dya Leza ne kipwilo kya Bwine Kidishitu na kubulwa kukōkela Yehova. Muntu wisāsa bya bine mutyima wandi umusansanga bininge pa bibi byaalongele bantu bampikwa mambo. Ufwaninwe kuyuka’mba poso etabije ne bipa bya ku bilongwa byandi bibi penepa milombelo yandi ya kufwilwa lusa keikala na mvubu kudi Yehova. Kadi, kudi bikwabo bisakilwa pa kujokela kudi Leza ne kwitabijibwa nandi.

14. Le muntu ubwanya “kwaluka monka kudi Yehova” namani? (Tala ne kapango “Le Kwisāsa Kushintulula Bika?”)

¹⁴ Muntu wisāsa bya bine ukimbanga ne kubandaula mifwatakanyo yandi, bilokoloko, ne bibidiji byandi. (Tanga Madilo 3:40, 41.) Ukabandaula bintu bya umbūmi bwandi mwadi na bukōkekoke, kimfwa kipwano kyandi na bantu ba ngitu ingi, mutomeno wa malwa nansha mfwanka, mwingidijijo wa Entelenete, nansha myanda itala byabusunga. Enka mukombelanga mwana-mukaji kufika ne kufula kwa mafinko a mpishi mwanda wa kukundula ne kutōkeja njibo yandi, muntu wisāsa ufwaninwe kulonga bukomo bwa kutōkeja milangwe yandi ne bilongwa byandi bya kufula. Ufwaninwe “kwaluka monka kudi Yehova” na kulonga bisaka Leza ne kwiendeja mungya mbila Yandi. Mu kitatyi kya Yelemia Bayuda bamo bājokele “na bubelabubela” kudi Yehova. Bādi beenga kwialakanya ino kebāshintyilepo nansha dimo mityima nansha būmi bwabo. (Yel. 3:10) Pa kyaba kya kwibeula, muntu ulomba kulekelwa bya bine kasakangapo kudimba Yehova nansha kipwilo kyandi kine. Ino pa kyaba kya kusaka kulama ntumbo yandi nansha kipwano na ba kisaka nansha banababo mu bubinebine, usakanga kuvundamina bubi bwalongele ebiya kafwaninwa kulekelwa ne kwitabijibwa na Leza.

15. Lelo muntu wisāsa bya bine ulombelanga milombelo ya muswelo’ka kudi Leza?

¹⁵ Milombelo idi na mvubu pa kwisāsa. Pa kala, bantu bādi na kibidiji kya kutulula makasa mūlu kitatyi kya kulombela. Dyalelo, muntu wisāsa bya bine pālombela, ‘utululanga mutyima wandi ne makasa andi kudi Leza,’ na mwānenene’kyo Yelemia. (Mad. 3:41, 42) Mutyima wa kwialakanya ukunkanga yewa wisāsa bubi akwatakanye mwiendelejo wandi na milombelo yalomba kulekelwa. Milombelo yandi i yampikwa budimbidimbi, itamba ku mutyima.

16. Mwanda waka i kyendele’mo kujokela kudi Leza?

¹⁶ Ubamone amba nonga-bibi witabija bine bilubo byandi ufwaninwe padi kunekenya mitatulo. Ino mwanda mwine i uno: Yehova usakanga banonga-bibi bajokele kwadi. Leza pamona kwisāsa mu mutyima wa muntu, mutyima wandi uteñwanga. ‘Kajina’ na kanye mwanda usakanga kulekela bonso besāsa bubi bwabo, enka mwaāfwidile lusa Bene Isalela batambile mu bumisungi. (Yel. 31:20) Bine, i kintu kikankamika kuyuka’mba Leza upānanga ndoe ne lukulupilo ku boba bamukōkele! (Yel. 29:11-14) Bakokeja kwitabijibwa monka mu bengidi bepāne ba Leza.

KIKŌKEJI KIKOKEJA KUKULAMA

17, 18. (a) Le Bene Lekaba i bāni? (b) Mungya kifwatulo kya pa paje 77, i bayukene pa bika?

¹⁷ Kukōkela Yehova umbyonso i bulami. Tubwanya kwikimona mu kimfwa kya Bene Lekaba ba mu mafuku a Yelemia. Myaka tutwa tubidi ne musubu kunyuma, nkambo wabo Yehonadaba Mwine Kena, muntu wākweshe Yehu na dikōkeji, wēbapele bijila bivule bilēma. Kimo bidi kyādi kibakankaja kutoma vinyu. Yehonadaba wādi ke mufwe tamba kala, ino Bene Lekaba bāendelele kumukōkela. Pa kusaka kwibatompa, Yelemia wēbaleta mu kandimbwa ka mu tempelo ka kudila’mo wēbatūdila vinyu, kāebanena batome. Bāmunena’mba: “Ketutomepo vinyu nansha tutyetye.”​—Yel. 35:1-10.

¹⁸ Ku Bene Lekaba, kukōkela nkambo wabo wāfwile tamba kala kwādi na mvubu. Batōtyi ba bine bafwaninwe kukōkela na kininga kutabuka bijila bya Leza mūmi. Kusumininwa kukōkela kwa Bene Lekaba kwātengele Yehova, kadi kwādi kwishile kulampe na kubulwa kikōkeji kwa Bayuda. Leza wālaile Bene Lekaba kukebalama ku kyamalwa kikaya. Pa kulonda buno bufundiji dyalelo, mwene i kyendele’mo boba bakōkela Yehova umbyonso bakulupile amba ukebalama kitatyi kya malwa makatakata?—Tanga Yelemia 35:19.

BOBA BAKŌKELE YEHOVA KEBADIPO BUNKA BWABO

19. Lelo Leza ukokeja kukulama namani shi umukōkele?

¹⁹ Bulami bwa Leza kebwāimaninepo enka ku bantu bandi ba pa kala. Nansha ke pano pene, Yehova ulamanga boba bamukōkele ku kyaka kya ku mushipiditu. Monka mwādi mulaminwe bibundi bya kala na nsakwa milamila ku bādi baya kwibitamba bulwi, mo monka mulamine ne bijila bya Leza boba befunda’byo ne kwibilama. Lelo nobe ubulwe’po kulamwa mu nsakwa ya misoñanya ya Leza? Yuka amba bikakwikadila biyampe shi ukōkela. (Yel. 7:23) Myanda mivule mimweke ilombola bubinebine pa uno mwanda.​—Tala kapango kanena amba, “Kukōkela Yehova I Bulami.”

20, 21. (a) Le i bika byokokeja kukulupila poingidila Yehova? (b) Le Mulopwe Yehoyakimi wātambwile namani musapu wa Leza kupityila kudi Yelemia?

²⁰ Balwana bakokeja kukukoleja kwingidila Leza, bekale ba mu kisaka, ku kaji, ku masomo, nansha ke balupusa ba mu kifuko kyoshikete. Ino yuka amba, shi ukōkele Yehova mu byonso, ukakukwasha nansha ke mu makambakano makomo mene. Kokelwa’ko amba​—Leza wālaile kukwasha Yelemia mu kupangwapangwa kwa malwa kwādi kwa kumutana, ne Yehova wāmukweshe. (Tanga Yelemia 1:17-19.) Kitatyi kimo bukwashi bwa Yehova bwāmwekele patōka mu mafuku a Mulopwe Yehoyakimi.

²¹ Balopwe batyetye ba Isalela bāpelele musedi wa myanda wa Leza na bukalabale pamo bwa Yehoyakimi. Kino kimweka mu kimfwa kya mupolofeto Udiya, wāikele’ko mu myaka ya Yelemia. Mulopwe umbi Yehoyakimi wāsakile bakalonde Udiya ne mu ntanda ingi mwine. Mupolofeto wa Yehova pobāile nandi, mulopwe wāmwipaija. (Yel. 26:20-23) Mu mwaka wa buná wa bulopwe bwa Yehoyakimi, Yehova wāsoñenye Yelemia alembe binenwa byonso byaāmulombwele mu kine kitatyi’kya kupwa atange’byo na diwi ditunduke mu tempelo. Yehoyakimi wāyete muvungo wa Yelemia ne kwiutangija na mukatampe umo wa mu kipango kyandi. Kitatyi kya butangi, mulopwe wāsana mukanda’wa kaewela mu mudilo kipeta kimo kimo, ino bamfumu bamo kebamusenge aleke kulonga namino. Penepa wātuma bantu bakakute Yelemia ne Baluki. Byāikala namani? “Yehova webafya.” (Yel. 36:1-6; tanga Yelemia 36: 21-26.) Yehova kālekelepo Yehoyakimi onakanye bano bantu babidi ba kikōkeji.

22, 23. Mwanda mumweke wa Kamoni umo wa mu ntanda ya pa bukata bwa Asha ukulombola bika pa bukwashi bwa Leza?

²² Ne dyalelo dine Yehova ufyanga bengidi bandi ku kyaka shi wamone’mba i kyendele’mo. Ino divule dine, wibapanga bukomo ne ñeni ibakwasha bamukōkele ne kwendelela na kusapula myanda miyampe. Lolo umo witwa bu Gulistan ulelele bana baná bunka. Watambwile bukwashi bwa Yehova. Kitatyi kimo, wadi Kamoni umo kete mu yabo ntanda mikata pa bukata bwa Asha mukankeje balupusa busapudi bwa Bulopwe. Kipwilo kya pabwipi kidi ku bula bwa makilometele 400, o mwanda Gulistan wadi witana na banababo Bene Kidishitu bapye na dimo’tu. Nansha byadi mu kukankajibwa ne mu makambakano makwabo, usapulanga ku njibo ne njibo ne kutana bantu bavule basangela musapu. Mungya lapolo wa panopano, wadi wendeja bifundwa bya Bible 20 ne musubu ne kuta mutyima ku kisumpi kya mikōko ya Yehova kyenda kibaya.

²³ Enka na mwaākwashishe Yelemia ne Batumoni pamo bwa Gulistan, Leza utengele kukukwasha abe ne bengidi bandi bakwabo ba kikōkeji. Sumininwa kumukōkela bu Mulopwe kupita’ko bantu. Nabya, kupangwapangwa ne bikoleja bikwabo kebikakukankajapo kutendela Leza umo kete wa bine kumeso a bantu bonso mu wenu mwaba.​—Yel. 15:20, 21.

24. Le kikōkeji kikuletelanga madyese’ka dyalelo?

²⁴ Kwampikwa Umpangi wetu, i bikomo kutana nsangaji ne kuloelelwa kwa binebine umbūmi. (Yel. 10:23) Pa kupwa kwifunda byāsonekele Yelemia bitala kikōkeji, le ubamone miswelo mokokeja kuleka Yehova aludike matabula obe ne pa mfulo? Mbila yandi bo buludiki bumo kete mu būmi butwala ku nsangaji ne ndoe. “Tejai diwi dyami,” i Yehova unena, “nabya kikemwikadila biyampe ko mudi.”​—Yel. 7:23.