Le Lupeto Lukwasha ku Mwingilo Wetu Wingilwa Ntanda Yonso Lutambanga Kwepi?

Bulongolodi bwetu bulupulanga ne kwabanya ku bitupu Mabible ne mabuku makwabo mavule mene. Tūbakanga ne kulongolola Mobo a Bulopwe ne mabilo a misambo. Tukwashanga bengidi ba ku Betele ne bamishonele bavule, kadi tukwashanga ne bantu baponenwa na byamalwa. Padi ukeipangula’mba, ‘Le lupeto lulongwa nalo bino byonso lutambanga kwepi?’

Ketutūlangapo kya kujikija, milambu, nansha mikongo. Nansha kukwatakanya mwingilo wa busapudi byo kulomba lupeto, inoko batwe ketulombenga’lopo. Pano kepadi myaka katwa ne kupita, nimelo ya bubidi ya Kiteba kya Mulami yānenene amba, tukulupile’nka Yehova ye wa kwitukwasha ne amba “ketukalombepo nansha kukimba kukwatakanibwa na bantu”—ne ketwekilongele kashā!—Mateo 10:8.

Mingilo yetu ikwatakanibwanga na byabuntu bya kwilanga. Bantu bavule basangelanga mwingilo wetu wa kufundija kadi batūlanga ne byabuntu. Batumoni abo bene bapānanga na nsangaji kitatyi, bukomo, lupeto ne tumweno tukwabo mwanda wa kulonga kiswa-mutyima kya Leza ntanda yonso. (1 Bilongwa 29:9) Ku Njibo ya Bulopwe ne ku bitango kwikalanga tumasanduku mwa kutūla byabuntu ku bonso basakile. Ukokeja nansha kutuma byabuntu kupityila ku diteba dyetu jw.org. Lupeto luvule lutambanga ku balanda, badi pamo bwa mukaji wa kishala mufudile wātendelwe na Yesu pa kutūla tubityele tubidi mu kilambwilo kya ku tempelo. (Luka 21:1-4) Nanshi kitatyi ne kitatyi muntu yense “alee’ko kantu kampanda” monka “mwafwatakenya mu mutyima wandi.”—1 Kodinda 16:2; 2 Kodinda 9:7.

Tukulupile amba Yehova ukendelela na kukunka mityima ya boba basaka ‘kumulēmeka na bintu byabo’ bya bulēme bakwatakanye mwingilo wa Bulopwe amba kiswa-mutyima kyandi kilongeke.—Nkindi 3:9.

• Le bulongolodi bwetu i bwishile namani na bipwilo bikwabo?

• Le byabuntu biletwa bingidijibwanga namani?