Le I Kwepi kutambanga Lupeto Lukwatakanyanga Mwingilo Wetu?

Mwaka ne mwaka, tutampanga ne kwabanya tutwa na tutwa twa midiyo ya Mabible ne mabuku esambila pa Bible. Tūbakanga ne kwingidija mabilo a musambo ne bitampilo kujokoloka ntanda yonso. Tununu makumi a bipwilo ebungilanga mu bifuko biyampe bya kutōtela’mo bitwa bu Mobo a Bulopwe. Lelo i ani uletanga lupeto lwa kupota bino bintu byonso’bi?

Mwingilo wetu ukwatakanibwanga na byabuntu bya kwisakila. (2 Kodinda 9:7) Kishinte kya bubidi kyalupwilwe mu 1879 kya dino dipepala kyanene amba: “‘Kiteba kya Mulami kya Ziona’ (Angele) i kikwatakanibwe na YEHOVA, ne byokidi uno muswelo, kekikalombepo kashā nansha kwabija muntu amba ekikwashe.” Milangwe yetu ikidi’nka nabya pa uno mwanda.

Byabuntu byetu bitumwanga bukidibukidi ku mabilo a musambo nansha mu tumasanduku tudi mu Njibo yo-yonso ya Bulopwe. Inoko, ketulombangapo nansha dimo mukongo nansha kulomba kufutwa pa mingilo yetu nansha pa mabuku. Kadi kebetufutangapo potusapula, potufundija mu bipwilo, nansha potukwasha ku lūbako lwa bifuko bya kutōtela’po. Ino, Yesu wānene amba: “Mubatambula ku bitupu, nenu pānai ku bitupu.” (Mateo 10:8) Bengidi bonso bengila ku mabilo a misambo yetu ne ku kité kyetu kya ntanda yonso, kubadila’mo ne boba badi mu Kitango Kyendeji kya Batumoni ba Yehova, i bengidi ba myanda ya kipwilo bengila bitupu pampikwa kufutwa.

Kadi mukōlo wingidijibwanga ne kukwasha boba bafikilwe na kimpengele. Bene Kidishitu ba mu myaka katwa kabajinji bāsepelele kupāna byabo bintu mwanda wa kukwasha boba batanwa na kupangwapangwa. (Loma 15:26) Netu tukwashanga basusuka na kubakulula mobo abo ne bifuko byabo bya kutōtela’po, kwibapa bidibwa ne bivwalwa ne malawa.