Lelo Leza I Ani?

1. Mwanda waka tufwaninwe kutōta Leza?

Leza wa bine i yewa wāpangile bintu byonso. Kadipo na ngalwilo kadi kakekalapo na mfulo. (Ñimbo ya Mitōto 90:2) Aye ye Nsulo ya myanda miyampe itanwa mu Bible. (1 Temote 1:11) Byadi i aye witupele būmi, nanshi i aye kete otufwaninwe kutōta.​—Tanga Kusokwelwa 4:11.

2. Lelo Leza udi namani?

I kutupu muntu nansha umo ke mumone Leza mwanda aye i Mushipiditu, ko kunena’mba udi na būmi bwa muswelo wa peulu bininge kupita bipangwa bya pano pa ntanda. (Yoano 1:18; 4:24) Ino nansha nankyo, tukokeja kuyuka mwaikadile kupityila ku bintu byālongele. Kimfwa, bipa ne maluba a miswelo palapala bitulombola’mba udi na buswe ne tunangu. Bukatakata bwa diulu ne ntanda bilombola bukomokomo bwandi.​—Tanga Loma 1:20.

Tukokeja kuyuka bivule bitala pa mwikadile Leza na kutanga Bible. Kimfwa, Bible witulombolanga bine bisenswe Leza ne byashikilwe, mwamwena bantu, ne byakokeja kwibalongela mu myanda ya miswelo palapala.​—Tanga Ñimbo ya Mitōto 103:7-10.

3. Lelo Leza udi na dijina?

Yesu wānenene amba: “Tata wetu udi mūlu, dijina dyobe dipandulwe.” (Mateo 6:9) Nansha Leza byadi na bitenta bivule, ino udi na dijina dimo kete. Ludimi ne ludimi lwiditelanga mu muswelo walo. Mu Kiluba ditelwanga bu “Yehova.” Inoko bantu bamo beditelanga bu “Yahweh.”​—Tanga Ñimbo ya Mitōto 83:18.

Dijina dya Leza i ditalulwe mu malamuni mavule a Bible ne kwidipingakanya na bitenta pamo bwa Mfumwetu nansha Leza. Ino kitatyi kyāsonekelwe Bible, dyādi ditanwa’mo kubwipi kwa misunsa 7 000. Yesu wāyukenye dijina dya Leza kitatyi kyaādi usapwila bantu myanda ya Leza.​—Tanga Yoano 17:26.

Tala video Lelo Leza Udi na Dijina?

4. Lelo Yehova witutele mutyima?

Le masusu asambakene koku ne koku alombola’mba Yehova i Leza ketutelepo mutyima? Bantu bamo balañanga’mba Leza witususulanga mwanda wa kwitutompa. Ino buno i bubela.​—Tanga Yakoba 1:13.

Leza i mupe muntu bwanapabo bwa kwitongela. Lelo ketukokejapo kusangela buno bwanapabo na kutonga kumwingidila? (Yoshua 24:15) Ino yō, bantu bavule i batonge kulonga bibi bisusula bakwabo. Yehova ufitwanga mutyima pa kumona buno bukondame.​—Tanga Ngalwilo 6:5, 6.

Yehova i Leza witutele mutyima. Witusakilanga tusangele būmi. Panopano ponka usa kutalula masusu ne bene balengeja’o. Pano’ko bidi, Leza udi na bubinga bwalekele’o mu bula bwa kitatyi kityetye. Mu Kifundwa kya 8, tukayuka buno bubinga.​—Tanga 2 Petelo 2:9; 3:7, 13.

5. Le tukokeja kufwena namani kudi Leza?

Yehova witwita tumufwene na kwisamba nandi kupityila ku milombelo. Witutele mutyima umo ne umo. (Ñimbo ya Mitōto 65:2; 145:18) Witulekelanga bilubo na mutyima umo. Uyukile bukomo botulonga mwanda wa kumusangaja nansha byotukankalwanga kitatyi kimokimo. Nansha byotudi bampikwa kubwaninina, tukokeja kupwana kipwano kya mpwaninine na Leza.​—Tanga Ñimbo ya Mitōto 103:12-14; Yakoba 4:8.

Yehova byadi i aye witupele būmi, nanshi tufwaninwe kumusanswa kupita muntu ye-yense. (Mako 12:30) Kitatyi kyolombola buswe bobe kudi Leza na kwifunda yandi myanda mivule ne kulonga byasaka, ukekala mulunda nandi wa binebine.​—Tanga 1 Temote 2:4; 1 Yoano 5:3.