Wifunde Kinenwa Kya Leza

Lelo Leza I Ani?

Kino kishinte kidi na bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisamba nobe ano malondololo.

1. Lelo Leza I Ani?

Leza wa bine i Umpangi wa bintu byonso. Bible umutela bu “Mulopwe wa nyeke,” ko kunena’mba kadipo na ngalwilo kadi kakekalangapo ne na mfulo mine. (1 Temote 1:17) Leza byadi Nsulo ya būmi, tufwaninwe kumutōta enka aye.—Tanga Kusokwelwa 4:11.

2. Leza mwine udi namani?

I kutupu muntu ke mumone Leza mwanda i Mushipiditu, ko kunena’mba udi na būmi bwa peulu kupita bipangwa bimweka bidi pano pa ntanda. (Yoano 1:18; 4:24) Bumuntu bwa Leza i busokokele mu bintu byalongele. Kimfwa, kitatyi kyotubandila miswelo ne misaka ya bipa ne maluba, tujingululanga buswe ne tunangu twa Leza. Bukatampe bwa madiulu ne ntanda bwitulombola bukomo bwa Leza.—Tanga Loma 1:20.

Tukokeja kwifundila’ko bivule bitala bumuntu bwa Leza kupityila ku Bible. Kimfwa, Bible witulombola byobya bisenswe Leza ne byakaswele, muswelo waikalanga na bantu, ne mwalongelanga mu ngikadila palapala.—Tanga Mitōto 103:7-10.

3. Lelo Leza udi na dijina?

Yesu wānene’mba: “Abe Tata wetu wa mūlu, dijina dyobe dijile kijila.” (Mateo 6:9) Nansha Leza byadi na bitenta bivule, udi na dijina dimo kete. Ditelwanga mu miswelo palapala mungya ludimi ne ludimi. Mu Kiluba tuvudile kwiditela bu “Yehova” kyaba kimo ne bu “Yawe.”—Tanga Mitōto 83:18.

Dijina dya Leza i ditalulwe mu ma Bible mavule ne kupingakanibwa na bitenta kimfwa Mfumwetu nansha Leza. Ino kitatyi kyāsonekelwe Bible, dijina dya Leza dyādi’mo kintu kya misunsa 7000. Yesu wāyukenye dijina dya Leza na kwidingidija paādi ushintulwila bantu Kinenwa kya Leza. Wākweshe bantu bafikile pa kuyuka Leza.—Tanga Yoano 17:26.

4. Lelo Yehova witutele mutyima?

Yehova ulombolanga’mba witutele mutyima na kuteja aye mwine milombelo yetu. (Mitōto 65:2) Lelo kuvula kwa masusu kushintulula’mba Leza ketutelepo mutyima? Bantu bamo banenanga’mba Leza witususulanga mwanda wa kwitutompa, ino kino ke kya binepo. Bible unena’mba: “Leka! Leka! Leka! kulampe kwine, Leza kalongapo bibi.”—Yoba 34:10; tanga Yakoba 1:13.

Leza i mulēmeke muntu na kumupa bwanapabo bwa kwitongela. Lelo tusangelanga bwanapabo bwetu ne kutonga kwingidila Leza? (Yoshua 24:15) Masusu abavula mwanda bavule batoñanga kulonga bakwabo bibi. Yehova bimusansanga pamona bukondame bwa uno muswelo.—Tanga Ngalwilo 6:5, 6.

Panopano, Yehova usa kwingidija Yesu mwanda wa kupwija masusu ne bene bealengeja. Pano’ko bidi, Yehova udi na bubinga buyampe bwa kuleka’ko masusu mu kyaba kityetye. Kifundwa kilonda’ko mu bino bishinte kikashintulula mwanda waka Leza ulekele’ko masusu.—Tanga Isaya 11:4.

5. Lelo Leza usakanga tulonge bika?

Yehova wetupangile na bukomo bwa kumuyuka ne kumusanswa. Usakanga twifunde bubinebine butala padi aye. (1 Temote 2:4) Shi twifunde Bible, tubwanya kuyuka Leza pamo bwa Mulunda.—Tanga Nkindi 2:4, 5.

Yehova byaetupele būmi, tufwaninwe kumusanswa kutabuka muntu mukwabo e-ense. Tukokeja kulombola Leza amba tumusenswe na kwisamba nandi mu milombelo ne kulonga byasaka. (Nkindi 15:8) Yehova usakanga tulongele bantu bintu na buswe.—Tanga Mako 12:29, 30; 1 Yoano 5:3.

Shi usaka kuyukila’ko bintu bivule, tala shapita 1 wa dino dibuku Lelo I Bika Bine Bifundija Bible? dilupwilwe na Batumoni ba Yehova.

[Kifwatulo pa paje 23]

Lelo kudi bubinga buyampe bulekelwe’ko masusu mu kyaba kityetye?