Yelemia Kālekelepo Kwisamba Myanda ya Yehova

Kyaba kimo bantu betupunikanga nansha kwitulobela potwibasapwila myanda ya Yehova. Kino kibwanya kwitulengeja tuleke kwisamba myanda ya Leza. Le nobe kino ke kikufikile?— Bible witulombola nkasampe umo wādi usenswe Yehova, ino kyaba kimo kwashele’tu patyē aleke kwisamba myanda yandi. Dijina dyandi i Yelemia. Ivwana lusango lwandi.

Yelemia paākidi nsongwalume, Yehova wāmunene adyumune bantu baleke bilongwa bibi. Kino kekyādipo kipēla kudi Yelemia kadi wāivwene moyo. Wālombola Yehova’mba: ‘Nkikōkejapo kwisamba, mwanda ne mwanuke.’ Ino Yehova amba: ‘Kokikwatwa moyo. Ami nkakukwasha.’

Penepo kala Yelemia wāshilula kudyumuna bantu’mba shi kebashintyilepo bakapebwa mfuto. Le ulanga bantu bālongele byēbalombwele Yelemia?— Mhm. Bāmupunikile ne kumulobela bininge. Bakwabo bāsakile’nka ne kumwipaya! Le ulanga, Yelemia wēivwene namani?— Moyo mwine wao, wānena’mba: ‘Nkikesambepo monka myanda ya Yehova.’ Lelo bine wālekele’byo?— Kutupu, kālekele’byopo. Byaādi usenswe Yehova bininge, kābwenyepo kuleka kwisamba myanda yandi. Yehova wāmupandije mwanda kālekelepo kwisamba myanda yandi.

Kimfwa, kitatyi kimo bantu babi bāelele Yelemia mu kīna kilampe kiyule ntoto bā. Kemwādipo bya kudya ne mema mene. Bano bantu bādi basaka Yelemia afwile’mo. Ino Yehova wākwasha, Yelemia wāabuka’mo!

Le kimfwa kya Yelemia kibakufundija bika?— Nansha byaādi na moyo kyaba kimo, kālekelepo kwisamba myanda ya Yehova. Nobe powisamba myanda ya Yehova, bantu bakokeja kukupunika ne kukulobela. Bibwanya kukuvutakanya ñeni nansha kukutuyula. Ino kokalekapo nansha dimo kwisamba myanda ya Yehova. Ukakukwasha enka na mwaākwashishe Yelemia.