Abanyema Mulopwe Mubi

Yosefa walangula Madia ne kumusapwila musapu wa kampeja-bukidi. Mwikeulu wa Yehova wamumwekelanga mu kilotwa ne kumusapwila’mba: “Imana, sela mwana mutyetye ne inandi unyemene mu Edipito, ikala monka kufika ne byonkakulombola, ke-muntu Heloda kasake kukimba yao mwana mutyetye mwanda wa kumwipaya.”​—Mateo 2:13.

Ponka na ponka, Yosefa, Madia ne wabo mwana abanyema bufuku. Abanyema bukidibukidi, mwanda Heloda wayuka’mba babuka na ñenyenye abamongola. Webanenene bapite kwandi pa kujoka bamusapwile myanda. Ino abo abaenda pampikwa kupityila’ko. Pano Heloda i mukalabale. Byakisaka kwipaya Yesu, wasoñanya bepaye bana bonso ba myaka ibidi ne kwika mu Betelema ne bibundi bya kufulakufula. Watunga ino myaka na kupikula pa byamulombwele babuka na ñenyenye batambile Kutunduka.

Kwipaya bana batyetye bonso i kibi mpata! Ketuyukilepo bungi bwa bana baipaibwa, ino kuyoyokota ne madilo a bainabana bafwilwa kubafikidija bupolofeto budi mu Bible bwānenene Yelemia, mupolofeto wa Leza.​—Yelemia 31:15.

Mu kitatyi’kya ba Yosefa ne kisaka kyandi abanyemena ku Edipito, kebashikete konka. Mu bufuku bukwabo, mwikeulu wa Yehova wamwekela monka Yosefa mu kilotwa. Wamunena’mba: “Imana, sela mwana mutyetye ne inandi, wende mu ntanda ya Isalela, mwanda boba badi bakimba būmi bwa mwana mutyetye’ba abafu.” (Mateo 2:20) Pano Yosefa wayuka’mba kisaka kibwanya kujokela mu yabo ntanda. Mu uno muswelo bupolofeto bukwabo bwa mu Bible bubafikidila bwa amba, Mwana mwana-mulume wa Leza waitwe kutamba mu Edipito.​—Hosea 11:1.

Bimweka bu Yosefa udi na mutyima wa kushikata na kisaka kyandi mu Yudea, kubwipi na kibundi kya Betelema, kobadi bekele kumeso kwa kunyemena mu Edipito. Inoko abamulombola’mba Akeleusa mwanā Heloda pano ye mulopwe wa mu Yudea. Mu kilotwa kikwabo, Leza wadyumuna Yosefa monka ku kino kyaka. O mwanda Yosefa ne kisaka kyandi abaenda kulampe dya kungala abakashikata mu kibundi kya Nazala kidi mu ntanda ya Ngadilea kulampe na kitako kya mutōtelo wa Bayuka, ke Yelusalema kadi. Yesu watamina mu kino kibundi, kino kibafikidija bupolofeto bukwabo bwa amba: “Uketwa bu mwine Nazala.”​—Mateo 2:23.