Yehova Wākingile Yesu

Mu ntanda imo ya kutunduka kwa Isalela, mwādi bantu bakulupile mu kuludikwa na ñenyenye. Difuku dimo bufuku, bana-balume bamo ba Kutunduka bāmwene kintu kimo kidi bwa luñenyenye lweñenya kyenda, bāanza kwikilonda. Luno “luñenyenye” lwēbaludikile kufika ne ku Yelusalema. Bana-balume’ba bāanza kwipangula bantu amba: ‘I kwepi kudi mwana wabutulwa ukekala mulopwe wa Bayuda? Tubaiya kumufukatyila.’

Heloda mulopwe wa Yelusalema pa kwivwana myanda ya mulopwe mupya wabutulwa, ñeni yāmuvutakana bininge. Kāipangula babitobo bakulu amba: ‘Le kyālailwe amba uno mulopwe ukabutwilwa kwepi?’ Nabo bāmulondolola’mba: ‘Bapolofeto bānenene amba ukabutwilwa mu Betelema.’ Penepo Heloda wāityija bana-balume bātambile Kutunduka’ba, kāebanena’mba: ‘Endai ku Betelema mukasokole yao mwana. Kupwa mwiye munsapwile kwadi. Mwanda nami nsaka nkamufukatyile.’ Inoko byādi bya bubela.

Kupwa, luno “luñenyenye” lwāanza kwenda monka. Bana-balume’ba kēbelulonda kufika ne ku Betelema. “Luñenyenye” pa kwimana dya peulu pa njibo imo nenki, bana-balume’ba batwela mu njibo’ya. Batana’mo Yesu na inandi Madia. Bāfukatyila mwana kēbamupe byabuntu bya olo, ensense, ne mpakwa. Le bine Leza ye wātumine bano bana-balume mwanda wa bakasokole kudi Yesu? Aa.

Mu dine difuku’dya bufuku, Yehova wāsapwila Yosefa mu kilotwa amba: ‘Heloda usakanga kwipaya Yesu. Sela obe mukaji ne mwana munyemene ku Edipito. Mushikate konka kufika ne byonkemunena’mba jokai.’ Ponka na ponka, Yosefa ne kisaka kyandi bāenda ku Edipito.

Yehova wāsapwidile bana-balume bātambile Kutunduka’ba amba kemwakijokelai kudi Heloda. Heloda pa kumona’mba kebajokēlepo kwadi, wāloba bininge. Byākadipo ubwanya kusokola Yesu, wāsoñenye bantu bepaye bana batyetye bonso bana-balume ba mu Betelema. Inoko Yesu wāpandile, mwanda bānyemēne nandi mu Edipito.

Mwenda mafuku, Heloda wāfwa. Penepo Yehova wāsapwila Yosefa amba: ‘Pano mubwanya kukajokela kwenu.’ Ba Yosefa, Madia, ne Yesu bākajokela ku Isalela, bākashikata mu kibundi kya Nazala.