Shapita 7

Yesu ne Bambuki ba Malumba

BANA-BALUME bavule abaiya batamba Kutunduka. I bambuki ba malumba—bantu babuka na kutala mwimanino wa ñenyenye. Pobadi bakidi kwabo Kutunduka, badi abamone luñenyenye lupya, abelulonda kufika ne ku Yelusalema, ku tutwa twa makilometele.

Bambuki ba malumba abafika mu Yelusalema, abaipangula’mba: “Lelo mulopwe wa Bayuda wabutwilwe’u udi kwepi le? Mwanda twamwene luñenyenye lwandi kutunduka, netu tubaiya kumwivukwila.” (MB)

Heloda Mulopwe wa Yelusalema pa kwivwana namino, mutyima munda uwamupena. Waite babitobo bakatampe, webepangula kukabutwilwa Kidishitu i kwepi. Nabo abamulondolola mungya Bisonekwa, amba: “I ku Betelema.” Pa kino, Heloda waite bambuki ba malumba, webasapwila’mba: “Byo muya’byo mwenda mukimbidila kako kāna, kadi shi mubekamone nankyo mwiye munsapwile mwanda, ami nami nkafikeko kwikatōta.” Ino kunena na bubine, Heloda usaka kusokola kudi mwana akamwipaye!

Abo pa kutaluka, kuwalongeka kintu kitulumukwa. Luñenyenye lobadi bamwene pobadi Kutunduka lubebatangidila kumeso. I bine, ke luñenyenyepo bitupu, ino i lutūlwe’ko mwanda wa kwibaludika. Bambuki ba malumba benda belulonda, tululūu ne pangala pa njibo mushikete ba Yosefa ne Madia, lubaimana.

Bambuki ba malumba abatwela mu njibo, abatana Madia na wandi mwana Yesu. Ponka’po abo bonso abafukata kebamwivukwila. Abakutulula mu bitundu, byabuntu byabo bya nsahabu, binunka bīya ne mpakwa, abamulambula. Kupwa, abo kebasake kujoka bakasapwile Heloda ku kifuko kudi mwana, Leza webadyumuna mu kilotwa amba kebakilongai namino. Penepo abataluka kebenda ku ntanda yabo, abalonda dishinda dingi.

Lelo molangila, i ani watūdile’ko luno luñenyenye mu diulu mwanda wa kuludika bano bambuki ba malumba? Vuluka, luno luñenyenye kelwibaludikilepo pityipityi ku Betelema kudi Yesu. Ino lwadi lubebaludikila ku Yelusalema kobadi abaketana na Mulopwe Heloda, wadi usaka kwipaya Yesu. Wadi wa kumulonga’nka namino, shi Leza kadipo ukankeje bambuki ba malumba na kwibadyumuna baleke kukayukija Heloda ku kifuko kudi mwana. I Satana Dyabola, walwana na Leza, wadi usaka kwipaija Yesu, ye aye wingidije luno luñenyenye mwanda wa kufikidija nkuku yandi. Mateo 2:1-12; Mika 5:2.

▪ I kika kilombola amba luñenyenye lwadi lumwene bambuki ba malumba kelwadipo luñenyenye bitupu?

▪ I kwepi kudi Yesu kwamutana bambuki ba malumba?

▪ Le tubayuka namani amba i Satana wadi utūdile’ko luno luñenyenye mwanda wa kuludika bambuki ba malumba?