Shapita 8
Abanyema Mulopwe Mukalabale
YOSEFA walangula Madia kamusapwila mwanda wa kampeja-bukidi. Mwikeulu wa Yehova wamumwekela, wamusapwila’mba: “Taluka, usele mwana, ne inandi kumo, munyemene mu Edipito mukēkale bidi monka poso’nka nkakulombole mwanda, ke-muntu Heloda usa kwiya kusaka kāna kwikēpaya.”
Kepejijepo, abo bonso busatu abanyema. Kadi i pakidi’ko kitatyi, mwanda Heloda wayuka amba bambuki ba malumba i bamudimbe, kadi ke batambe kala mu kibundi. Vuluka, badi bafwaninwe kujoka kumuyukija ku kifuko kobadi batene Yesu. Heloda wakalabala. Ukanina kwipaya Yesu, waleta mbila amba bepaye bana bana-balume bonso ba mu Betelema ne ba mu bulolo bwandi, ba myaka ibidi ne boba kebabwenye’yo bene. Watunga ino myaka kukwatañana na myanda yobamusapwidile kudi bambuki ba malumba batambile Kutunduka.
Bine, kwipaibwa kwa bana-balume bonso ba ku kyadi i mwanda ulenga luzakalo pa kwiumona! Bashidika ba Heloda abapone kilukute, benda batwela mu njibo ne njibo. Mwana wa lukeke mwana-mulume yense obatana, basompola’ye inandi mu maboko. Ketuyukilepo shi i bana banga bepailwe, ino miyoa ne miyoyokoto ya bainabana iyafikidija bupolofeto bwa Bible bwānenwe na Yelemia, mupolofeto wa Leza.
Papo Yosefa ne kisaka kyandi ke bafike kala mu Edipito pakubulwa kyaka, ke bashikete mwine’mwa. Ino bufuku bumo, mwikeulu wa Yehova wamwekela monka Yosefa mu kilotwa. “Taluka, usele ne kāna ne inako,” ye mwikeulu umusapwila, “wende mu ntanda ya Isalela ke-bantu abafu badi basaka būmi bwa kāna.” Kisaka kibajokela mu ntanda yakyo, bino bibafikidija bupolofeto bukwabo bwa Bible, bunena amba mwanā Leza uketwa kutamba mu Edipito.
Kimweka bu Yosefa usaka kushikata mu Yudea mu kibundi kya Betelema, mobādi bashikete kumeso kwa kunyemena mu Edipito. Ino waivwana amba Akeleusa, mwanā mulopwe Heloda mukalabale ye ke mulopwe wa Yudea, kadi mu kilotwa kikwabo, Yehova wamudyumuna kino kyaka. Penepo Yosefa ne kisaka kyandi abaenda kungala mu kibundi kya Nazala mu Ngadilea. Yesu watamina mu kino kibundi, kulampe na mu kité kya mutōtelo wa Bayuda. Mateo 2:13-23; Yelemia 31:15; Hosea 11:1.
▪ Lelo Mulopwe Heloda pa kumona bambuki ba malumba kebakijokēlepo kwadi, walonga kintu’ka kilenga luzakalo, ino Yesu wakingwe namani?
▪ Pa kutamba mu Edipito, mwanda waka Yosefa kakishiketepo kadi mu Betelema?
▪ I bupolofeto’ka bwa Bible bwafikidila mu kyakyo kitatyi?